ສຳນັກຂ່າວຕ່າງປະເທດ ລາຍງານໃນວັນທີ 9 ສິງຫາຜ່ານມານີ້ວ່າ ລັດຖະບານໄທ ພາຍໃຕ້ການນຳຂອງ ທ່ານ ພົນເອກ ປະຍຸດ ຈັນໂອຊາ ຫົວໜ້າຄະນະລັດຖະປະຫານ ແລະ ນາຍົກລັດຖະມົນຕີ ແຫ່ງ ຣາຊະອານາຈັກໄທ ໄດ້ຢືນຢັນວ່າ ການເລືອກຕັ້ງທົ່ວໄປຂອງໄທ ຈະຖືກຈັດຂຶ້ນຢ່າງແນ່ນອນ ພາຍໃນປີ 2017 ທີ່ຈະມາເຖິງນີ້ ຫລັງຈາກທີ່ປະຊາຊົນຊາວໄທ ໄດ້ລົງປະຊາມະຕິ ຮັບຮອງເອົາລັດຖະທຳມະນູນສະບັບໃໝ່ ໃນວັນທີ 7 ສິງຫາ 2016 ທີ່ຜ່ານມາ
ທັງນີ້ ຜົນຂອງການນັບຄະແນນເບື້ອງຕົ້ນພົບວ່າ ມີຜູ້ໃຫ້ການຮັບຮອງ ຮ່າງລັດຖະທຳມະນູນສະບັບໃໝ່ ຫລາຍກວ່າ 61%. ແນວໃດກໍຕາມ, ກ່ອນໜ້າການລົງປະຊາມະຕິນີ້ ບັນດາພັກການເມືອງຫລັກຂອງໄທ ໄດ້ອອກມາວິພາກວິຈານ ຮ່າງລັດຖະທຳມະນູນສະບັບນີ້ ໂດຍໄດ້ລະບຸວ່າ ເປັນການຈຳກັດປະຊາທິປະໄຕ ຊຶ່ງໃນນັ້ນບົດບັນຍັດຂອງລັດຖະທຳມະນູນ ໄດ້ກຳນົດໃຫ້ມີ ສະມາຊິກວຸດທິສະພາ ທີ່ຖືກແຕ່ງຕັ້ງ ໂດຍການສະຫງວນຕຳແໜ່ງເຫລົ່ານີ້ ໄວ້ໃຫ້ກັບຝ່າຍທະຫານ.
ຕິດຕາມເຮາທາງFacebook ກົດຖືກໃຈເລີຍ!