ສະຖານທີ່ທ່ອງທ່ຽວແກ້ງກົງພະນັງ ຕັ້ງຢູ່ບ້ານໜອງບົວທ່າ ເມືອງສອງຄອນ ຫ່າງຈາກຕົວເມືອງສອງຄອນ ແຂວງສະຫວັນນະເຂດ 18 ກິໂລແມັດ ແລະ ເທສະບານແຂວງ 78 ກິໂລແມັດ ເປັນສະຖານທີ່ທ່ອງທ່ຽວທຳມະຊາດທີ່ສວຍງາມ ກົງພະນັງ ເປັນແກ້ງທີ່ໃຫຍ່ ເຕັມໄປດ້ວຍກ້ອນຫີນທີ່ສວຍງາມ ກ້ອນຫີນມີລັກສະນະແຕກຕ່າງກັນ ຢັ່ງຢາຍເປັນສາຍຕາມແມ່ນ້ຳຂອງ ແກ້ງກົງພະນັງ ປະກອບມີຖ້ຳ ນ້ອຍ-ໃຫຍ່ປະມານ 10 ກວ່າແຫ່ງ ເຊິ່ງຖ້ຳດັ່ງກ່າວມີປະຫວັດກ່າວຂານກັນມາດົນນານ ແກ້ງແຫ່ງນີ້ໄດ້ຮັບຄວາມສົນໃຈຈາກນັກທ່ອງທ່ຽວພາຍໃນ-ຕ່າງປະເທດ ເຂົ້າມາທ່ຽວຊົມຄວາມງາມ ຂອງທຳມະຊາດ ແລະ ສຳຜັດອາກາດທີ່ສົດຊື່ນຕາມແຄມແມ່ນ້ຳຂອງ ໂດຍສະເພາະໃນໄລຍະບຸນປີໃໝ່ລາວ ຈະມີການຈັດກິດຈະກຳສະເຫຼີມສະຫຼອງມ່ວນຊື່ນຢູ່ທີ່ນີ້ທຸກໆປີ ແກ້ງກົງພະນັງ ໃນພາສາຜູ້ໄທ ເອີ້ນວ່າ (ໂກງພະນັງ) ມີຄວາມໝາຍວ່າ ສ້ວມທີ່ຫຸ້ມຫໍ່ດ້ວຍສາຍໂງ່ນຫີນຕິດຕໍ່ກັນບໍ່ສິ້ນສຸດ ແລະ ໃນປັດຈຸບັນ ປະຊາຊົນໄດ້ເອີ້ນຊື່ວ່າ ກົງພະນັງເຂັມມະລາດ ໂດຍໃນອະດີດແກ້ງແຫ່ງນີ້ ໄດ້ເປັນສະຖານທີ່ຫຼົບຫຼີກຈາກການເກນໄປກໍ່ສ້າງປະສາດຫີນຂອງທະຫານຂຸນອັງຄະລາດ ໃນສະໄໝກ່ອນ.
ສ່ວນຫໍພິພິທະພັນໄດໂນເສົາ ກໍ່ເປັນອີກສະຖານທີ່ທ່ອງທ່ຽວທາງດ້ານປະຫວັດສາດທີ່ສຳຄັນຂອງແຂວງສະຫວັນນະເຂດ ທີ່ສະແດງຮ່ອງຮອຍການປາກົດຂອງສິ່ງທີ່ມີຊີວິດຂະໜາດໃຫຍ່ທີ່ສຸດໃນໂລກ ເອີ້ນວ່າ ໄດໂນເສົາ ພິພິທະພັນແຫ່ງນີ້ເປັນສະຖານທີ່ວາງສະແດງການຄົ້ນພົບກະດູກ ແລະ ຮອຍຕີນຂອງໄດໂນເສົາ 2 ປະເພດ 4 ສາຍພັນ ໃນນັ້ນ ມີສາຍພັນກິນຊີ້ນ 1 ສາຍພັນ ແລະ ສາຍພັນໄດໂນເສົາກິນພືດ 3 ສາຍພັນ ຊຶ່ງຮ່ອງຮອຍກະດູກໄດໂນເສົາທີ່ສົມບູນທີ່ສຸດທີ່ຖືກຄົ້ນພົບຢູ່ແຂວງສະຫວັນນະເຂດ ແມ່ນສ່ວນຫາງຂອງມັນ ນອກນີ້ ຍັງມີຊິ້ນສ່ວນຫົວ ແລະ ແຂ້ວສັດດຶກດຳບັນຄ້າຍຄືຈີ່ປອມຍັກ ເປັນສັດເຄິ່ງບົກເຄິ່ງນ້ຳທີ່ເຊື່ອກັນວ່າ ເປັນສັດລ້ຽງລູກດ້ວຍນົມທີ່ເກີດກ່ອນຍຸກໄດໂນເສົາອີກດ້ວຍ.
ນອກຈາກນັ້ນ ແຂວງສະຫວັນນະເຂດ ຍັງມີສະຖານທີ່ທ່ອງທ່ຽວຫຼາຍໆແຫ່ງທີ່ໜ້າທ່ຽວຊົມ ບໍ່ວ່າຈະເປັນສະຖານທີ່ທ່ອງທ່ຽວທາງດ້ານວັດທະນະທຳ ຮີດຄອງ ປະເພນີ ສະຖານທີ່ທ່ອງທ່ຽວທາງດ້ານປະຫວັດສາດ ແລະ ສະຖານທີ່ທ່ອງທ່ຽວທຳມະຊາດ ຖ້າໃຜມີໂອກາດເດີນທາງໄປຢ້ຽມຢາມແຂວງດັ່ງກ່າວ ກໍ່ຢ່າລືມໄປສຳຜັດບັນດາສະຖານທີ່ທ່ອງທ່ຽວ ທັງນີ້ກໍ່ເພື່ອສົ່ງເສີມການທ່ອງທ່ຽວ ປະກອບສ່ວນສ້າງເສດຖະກິດໃຫ້ນັບມື້ເຂັ້ມແຂງ.