ຕົ້ນກຳເນີດແມ່ນເປັນຄົນຫຼວງພະບາງ ແຕ່ຍ້າຍລົງມາເຮັດວຽກທີ່ນະຄອນຫຼວງຕັ້ງແຕ່ປີ 2002 ເພື່ອມາປູກເຫັດຂາຍກັບຄອບຄົວເຮັດ ໄດ້ປະມານ 2–3 ປີ ກໍປາກົດວ່າທຸລະກິດປະເພດນີ້ບໍ່ເຂ້ົາກັບໂຕເອງພໍເທົ່າໃດ ບໍ່ມີກຳໄລຂາດທຶນຢ່າງໜັກແຖມຍັງຕ້ອງໄດ້ເພິ່ງຄົນງານຫຼາຍຄົນນຳອີກ.

ຫຼັງຈາກນັ້ນຈິ່ງໄດ້ຫັນມາ ຂາຍເຂົ້າຈີ່ທຳມະດາ ແລະໃສ່ນົມເລາະຕາມບ້ານຕາມເຮືອນທົ່ວໄປພໍມີເງິນເກັບ, ເງິນກິນເຂົ້າ ແລະໃສ່ ນ້ຳມັນລົດໄປວັນໆຈົນເວລາຜ່ານ ໄປ 3-4 ປີ ຕໍ່ມາກໍໄດ້ໄປເປັນລູກນ້ອງເຂົາເພື່ອໄປຮຽນເຮັດເຂົ້າຈີ່ປາເຕ້ປີ 1 ເຕັມໆ ເມື່ອຮູ້ວ່າຕົວ ເອງພໍເຮັດເອງແລ້ວຈິ່ງໄດ້ດັດລົດຈັກມາເປັນຮ້ານຂາຍເຂົ້າຈີ່ແບບເຄື່ອນທີ່ເປັນຂອງຕົນ.

ປະຈຸບັນນີ້ເພີ່ນມີເຂົ້າຈີ່ລ້າ, ເຂົ້າຈີ່ໃສ່ນົມ ແລະເຂົ້າຈີ່ປາເຕ້ ສ່ວນວ່າລາຄາແມ່ນມີຕັ້ງແຕ່ 2 ພັນກີບຂຶ້ນໄປ ແລະເຮັດຕາມໃຈລູກຄ້າຕ້ອງການຈະເຮັດແບບໃດ ກໍສາມາດສັ່ງໄດ້ຕາມໃຈ ດ້ວຍເຫດນີ້ຈິ່ງເຮັດໃຫ້ມີລູກຄ້າຂາປະ ຈຳມາໃຊ້ບໍລິການເປັນຈຳນວນຫຼາຍ ຊຶ່ງເປັນອີກອາຊີບໜຶ່ງທີ່ລາຍ ໄດ້ດີແຕ່ອາດຈະເບີ່ງແລ້ວບໍ່ມີລາຄາໃນສາຍຕາຄົນທົ່ວໄປ ເພາະບໍ່ເທ້ບໍ່ງາມບໍ່ເປັນຮ້ານທີ່ຫຼູຫຼາແຕ່ກໍສາມາດສົ່ງເສີມ ແລະເບີ່ງແຍງຄອບຄົວໄດ້ເປັນຢ່າງດີຕະຫຼອດໄລຍະ 12 ປີທີ່ຜ່ານມາກັບທຸລະກິດນີ້. ເທົ່ານັ້ນຍັງບໍ່ພໍປະຈຸບັນນີ້ ມີດິນ, ມີເຮືອນ, ມີລົດໃຫຍ່ຂີ່, ມີ ຊີວິດທີ່ດີ ແລະອື່ນໆໄດ້ ກໍຍ້ອນອາຊີບນີ້.

ນອກຈາກນີ້ອ້າຍ ທອງດີ ແກ້ວ ສະໄຫວ ຍັງໄດ້ບອກອີກຕື່ມວ່າ: ທຶນທີ່ໃຊ້ໃນການຂາຍໃນທຸກມື້ ນີ້ແມ່ນຕົກຢູ່ປະມານ 5–6 ແສນ ກີບຕໍ່ມື້ເທົ່ານັ້ນ ໂດຍແຕ່ລະມື້ແມ່ນ ຈະມີກຳໄລບໍ່ຕ່ຳກວ່າ 2,50 ແສນກີບ ຖ້າຫາກວ່າລວມທັງຂອງເມຍ ທີ່ຂາຍໄດ້ມາໃສ່ນຳກັນແລ້ວ ກໍຈະຕົກຢູ່ປະມານ 14–15 ລ້ານກີບຕໍ່ເດືອນເລີຍກໍວ່າໄດ້ດັ່ງນັ້ນຖ້າທ່ານໃດຢາກລອງໄປເບິ່ງເວລາຂາຍເຂົ້າຈີ່ຕອນເຊົ້າໆ ຫຼື ຊ່ວງແລງແລ້ວອາດຈະຕ້ອງຕົກໃຈເພາະຂາຍດິບຂາຍດີທຸກລະດູ ໂດຍສະເພາະຖ້າເປັນລະດູໜາວຍິ່ງ ໄດ້ຂາຍດີເປັນພິເສດ.

ສະນັ້ນຖ້າຫາກທ່ານໃດທີ່ຕ້ອງການເຮັດອາຊີບນີ້ກໍສາມາດເຮັດໄດ້ເລີຍເພາະການລົງທຶນບໍ່ຫຼາຍແຕ່ຕ້ອງຫາສະຖານທີ່ດີສຶກສາການຕະຫຼາດກ່ອນວ່າມີເຈົ້າຂອງພື້ນທີ່ ຫຼື ບໍ່? ຫຼື ວ່າເຮົາມັກອາຊີບນີ້ ຫຼື ບໍ່? ເປັນຫຍັງຄົນຈິ່ງຈະຕ້ອງມາຊື້ທຸລະກິດເຂົ້າຈີ່ປາເຕ້ນີ້ລົງທຶນໜ້ອຍກໍຈິງແຕ່ຖ້າ ຝີມືບໍ່ດີກໍມີສິດລົ້ມລະລາຍໄດ້ເຊັ່ນກັນ.

ທີ່ມາຈາກ: ຂຽນໂດຍ: ພູວົງ (ທຸລະກິດ-ສັງຄົມ)