ທ່ອງທ່ຽວວັນນີ້ ພວກເຮົາຈະພາທຸກຄົນມາທ່ຽວສະຖານທີ່ທ່ຽວແຫ່ງໃໝ່ໃນນະຄອນຫຼວງວຽງຈັນ ນັ້ນກໍ່ຄື ຕາດວັງຫຼວງ ເຊິ່ງບອກໄດ້ຄຳດຽວເລີຍວ່າ ຖ້າໃຜຍັງບໍ່ທັນໄດ້ມາແມ່ນຕ້ອງມາຕາດແຫ່ງນີ້ໃຫ້ໄດ້ ເພາະນອກຈາກຈະມີນ້ຳໃສໄຫລເຢັນແລ້ວ ຍັງປະກອບດ້ວຍຄວາມອຸດົມສົມບູນທາງທຳມະຊາດ ນານາພັນອີກດ້ວຍ ແບບທີ່ວ່າທ່ານບໍ່ຈຳເປັນຕ້ອງໄປຫຼິ້ນຕາດຢູ່ໄກໆ ຫຼື ປເທິງຕ່າງແຂວງ ທ່ານກໍ່ສາມາດສຳພັດຄວາມສວຍງາມທາງທຳມະຊາດແບບນີ້ໄດ້ ທີ່ຕາດວັງຫຼວງແຫ່ງນີ້
ການເດີນທາງໄປທີ່ ຕາດວັງຫຼວງ ແມ່ນໄປທາງ 13 ໃຕ້ ຮອດຂົວບ້ານໄຮ່ແລ້ວໄປຕໍ່ປະມານ 1 ກິໂລແມັດ ມີທາງລ້ຽວຊ້າຍເຂົ້າໄປ 6 ກິໂລແມັດ ກໍ່ຈະປ້າຍທາງເຂົ້າຕາດ ເຂົ້າໄປອີກປະມານ 100 ແມັດ ກໍ່ຈະຮອດຕາດວັງຫຼວງ”
ນໍ້າຕົກຕາດວັງຫຼວງ ເປັນແຫຼ່ງທ່ອງທ່ຽວທຳມະຊາດທີ່ຍັງຄົງຄວາມອຸດົມສົມບູນທາງທຳມະຊາດ ນານາພັນ ແລະ ອີກຢ່າງໜຶ່ງ ມັນບໍ່ໄດ້ຢູ່ໄກຈາກນະຄອນຫຼວງວຽງຈັນບ່ອນທີ່ສະຖານ ທີ່ທີ່ພວກເຮົາສາມາດສໍາຜັດກັບທໍາມະຊາດທີ່ແທ້ຈິງ ຢູ່ບ້ານເວີນກະເບົາ ເມືອງ ປາກງື່ມ ນີ້ເອງ. ໃນຊ່ວງທີ່ນໍ້າຫຼາຍກໍ່ຈະຢູ່ໃນ ຊ່ວງລະດູຝົນ ສ່ວນລະດູແລ້ງນັ້ນ ກໍ່ມີຢູ່ແຕ່ຂ້ອນຂ້າງໜ້ອຍ ຈຶ່ງເໝາະທີ່ຈະມາທ່ຽວຕາດວັງຫຼວງ ໃນຊ່ວງລະດູຝົນນີ້ຫຼາຍກວ່າລະດູອື່ນ. ບໍລິເວນດ້ານເທິງຂອງຕາດຖ້າໃຜໄດ້ຂຶ້ນໄປ ຮັບຮອງວ່າ ສວຍງາມ ພ້ອມທັງໄດ້ສູດດົມບັນຍາກາດເຢັນສົດຊື່ນຢ່າງແນ່ນອນ ຖືໄດ້ວ່າໄດ້ສຳຜັດກັບທຳມະຊາດຢ່າງແທ້ຈິງ.
ເປັນສະຖານທີ່ທ່ອງທ່ຽວທຳມະຊາດອີກແຫ່ງໜຶ່ງຂອງນະຄອນຫຼວງວຽງຈັນ ເຊິ່ງມີຄວາມສວຍງາມໃນແບບຂອງທຳມະຊາດທີ່ລົງໂຕ, ນໍ້າໃສ ເຢັນດີ ແຕ່ຄວນລະວັງ ເພາະເປັນແຫຼ່ງທ່ອງທ່ຽວໃກ້ພູ ອາດເກີດ ນໍ້າປ່າໄຫຼຊຸ ຊ່ວງຍາມຝົນແບບນີ້ຍິ່ງຄວນລະວັງ.
ແຫລ່ງທີ່ມາ: ຂ່າວເສດຖະກິດ-ການຄ້າ Lao Economic Daily