ທ້າວ ກິ່ງແກ້ວ ອິນທະວົງ ແລະ ນາງ ຈໍຄຳ ສອງນັກກີລາແລ່ນ-ລານນັກຮຽນລາວ ຈາກໂຮງຮຽນພອນສະຫວັນກີລາ-ກາຍະກຳ ສາມາດຍາດໄດ້ 2 ຫຼຽນທອງ ໃຫ້ທີມນັກກີລານັກຮຽນລາວ ໃນການແຂ່ງຂັນແລ່ນ 4X100 ຂ້າມຮົ້ວ ປະເພດຍິງ ແລະ ຊາຍ ໃນງານມະຫະກຳກີລານັກຮຽນອາຊຽນ ຄັ້ງທີ 8 ຫຼື ASG “Asean Schools Games 2016” ທີ່ແຂວງຊຽງໃໝ່ ປະເທດໄທ ຮັບກຽດເປັນເຈົ້າພາບ ລະຫວ່າງວັນທີ 21-29 ກໍລະກົດ 2016.
ການແຂ່ງຂັນກີລາແລ່ນ-ລານມື້ທຳອິດ (ວັນທີ 25 ກໍລະກົດຜ່ານມາ) ມີການຊີງໄຊກັນທັງໝົດ 36 ລາຍການ ໃນນັ້ນ ສະເພາະ ສປປ ລາວ ສົ່ງນັກກີລາເຂົ້າຮ່ວມທັງໝົດ 9 ຄົນ ຍິງ 3 ຄົນ ລົງແຂ່ງຂັນ 16 ລາຍການ ຜ່ານການແຂ່ງຂັນຜົນປາກົດວ່າ ນັກກີລາລາວ ສາມາດແລ່ນເຂົ້າເສັ້ນໄຊໄດ້ອັນດັບທີ 3 ທັງຍິງ ແລະ ຊາຍ ສົ່ງຜົນໃຫ້ໄດ້ພຽງ 2 ຫຼຽນທອງໄປຄອງ ສ່ວນຫຼຽນຄຳ ປະເພດຍິງແມ່ນຕົກເປັນຂອງນັກກີລາຈາກອິນໂດເນເຊຍ ແລະ ຫຼຽນເງິນແມ່ນສິງກະໂປ ຂະນະທີ່ ປະເພດຊາຍ ຫຼຽນຄຳແມ່ນອິນໂດເນເຊຍ ແລະ ຫຼຽນເງິນແມ່ນໄທ ເຈົ້າພາບ.
ນອກນີ້ ຍັງມີການແຂ່ງຂັນລາຍການແລ່ນ 100 ແມັດ (ຊາຍ) ຮອບຄັດເລືອກ ມີນັກກີລາເຂົ້າຮ່ວມແຂ່ງຂັນ 9 ຄົນ ຈາກໄທ 2 ຄົນ ສິງກະໂປ 2 ຄົນ ມາເລເຊຍ 2 ຄົນ ແລະ ອິນໂດເນເຊຍ 2 ຄົນ ສ່ວນ ສປປ ລາວ ໄດ້ສົ່ງນັກກີລາ 1 ຄົນ ກໍ່ຄືທ້າວ ອຸ່ນແກ້ວ ເພັດນາມສິງ ຜ່ານການແຂ່ງຂັນຜົນປາກົດວ່າ ອຸ່ນແກ້ວ ຕົກຮອບ ແລະ ບໍ່ສາມາດຜ່ານຮອບຄັດເລືອກ.
ສຳລັບຜົນງານຂອງທີມນັກກີລາລາວ ຮອດປັດຈຸບັນ ກໍ່ສາມາດຍາດໄດ້ 4 ຫຼຽນທອງ ຈາກກີລາກະຕໍ້ 1 ຫຼຽນເງິນ 1 ຫຼຽນທອງ ແລະ ກີລາແລ່ນ-ລານ 2 ຫຼຽນທອງ ລວມ 4 ຢູ່ອັນດັບທີ 6 ຂອງການສະຫຼຸບຫຼຽນຕາຕະລາງ ຈາກ 8 ປະເທດເຂົ້າຮ່ວມ