ກະຊວງພາຍໃນກຳປູເຈຍເປີດເຜີຍວ່າ ກຳປູເຈຍກຽມອອກວີຊາໃໝ່ສຳລັບຕ່າງປະເທດທີ່ອອກບຳນານ ແລ້ວຢ່າງວ່ອງໄວທີ່ສຸດພາຍໃນວັນທີ 1 ສິງຫານີ້.
ສຳນັກຂ່າວຕ່າງປະເທດລາຍງານວ່າ ທ່ານ ພົນຕີ ສົກເວສນາ ຜູ້ອຳນວຍການສຳນັກງານກວດຄົນເຂົ້າເມືອງທີ່ສັງກັດກະຊວງພາຍໃນກຳປູເຈຍເປີດເຜີຍວ່າ ກຳປູເຈຍກຽມອອກວີຊາແບບໃໝ່ສຳລັບຕ່າງປະເທດທີ່ມີອາຍຸບຳນານແລ້ວຢ່າງວ່ອງໄວທີ່ສຸດພາຍໃນວັນທີ 1 ສິງຫານີ້ ນັບເປັນຄວາມພະຍາຍາມຫຼ້າສຸດໃນໂຄງການເພື່ອຊຸກຍູ້ໃຫ້ມີຊາວຕ່າງປະເທດມາພັກອາໄສຢູ່ກຳປູເຈຍຫຼາຍຂຶ້ນ ໂດຍເອກະສານທີ່ຈຳເປັນຕ້ອງໃຊ້ໃນການຍື່ນຂໍວີຊາປະເພດໃໝ່ນີ້ປະກອບມີ: ເອກະສານສະແດງຖານະຄວາມໝັ້ນຄົງທາງການເງິນ ແລະ ເອກະສານຮັບຮອງວ່າເປັນຜູ້ທີ່ອອກບຳນານຈາກປະເທດທີ່ໃຊ້ຊີວິດຢູ່ ຊຶ່ງວີຊາໃໝ່ນີ້ເອີ້ນວີຊາປະເພດ ອີອາຣ ຈະມີອາຍຸ 1 ປີ ແລະ ບໍ່ຕ້ອງຂໍໃບອະນຸຍາດເຮັດວຽກແຕ່ຢ່າງໃດ ໂດຍຜູ້ບຳນານທີ່ຂໍວີຊາປະເພດນີ້ຈະສາມາດພັກອາໄສຢູ່ກຳປູເຈຍໄດ້ ແຕ່ມີຂໍ້ກຳນົດວ່າ ຫ້າມຄອບຄອງເຮືອນຫຼືທີ່ດິນຢູ່ກຳປູເຈຍ.
ທ່ານ ໂຕ ສະເຣັງ ຮອງຜູ້ອຳນວຍການກວດຄົນເຂົ້າເມືອງກຳປູເຈຍເປີດເຜີຍວ່າ ທາງສຳນັກງານຕ້ອງການໃຫ້ວີຊາປະເພດໃໝ່ນີ້ພ້ອມອອກໃນວັນທີ 1 ສິງຫານີ້ເລີຍ ແຕ່ອາດເກີດຄວາມຫຼ້າຊ້າຂຶ້ນໄດ້ເນື່ອງຈາກທາງການກຳປູເຈຍກຳລັງຢູ່ໃນຂັ້ນຕອນການແຈ້ງຂໍ້ມູນຕໍ່ສະຖານທູດຕ່າງປະເທດກ່ຽວກັບການປ່ຽນແປງນີ້.