ສຳນັກຂ່າວຕ່າງປະເທດ ລາຍງານໃນວັນທີ 27 ກໍລະກົດຜ່ານມານີ້ວ່າ ເມື່ອບໍ່ດົນມານີ້ ກະຊວງປ້ອງກັນປະເທດຣັດເຊຍ ໄດ້ເຜີຍແຜ່ຮູບພາບ ເຮືອດຳນ້ຳພະລັງງານນິວເຄລຍ Svyatoy Georgiy Pobedonosets (K-433) ລຳໜຶ່ງ ຊຶ່ງເປັນໜຶ່ງໃນຈຳນວນກອງເຮືອດຳນ້ຳ ໃນລະດັບຊັ້ນດຽວກັນທັງໝົດ 43 ລຳ ທີ່ສ້າງຂຶ້ນໃນຍຸກອະດີດສະຫະພາບໂຊວຽດ ໂດຍເຮືອລຳດັ່ງກ່າວນີ້ ໄດ້ຖືກປະຈຳການຢູ່ ຖານທັບເຮືອພາກຕາເວັນອອກໄກ ແຫລມກຳຊັດກາ (Kamchatka) ຟາກຝັ່ງມະຫາສະໝຸດປາຊີຟິກ ຂອງຣັດເຊຍ.

ແນວໃດກໍຕາມ ກະຊວງປ້ອງກັນປະເທດຣັດເຊຍ ບໍ່ໄດ້ເປີດເຜີຍວ່າ ເຮືອລຳດັ່ງກ່າວນີ້ ເດີນທາງກັບຈາກພາລະກິດໃດ ແລະ ເດີນທາງມາຈາກໃສ ເນື່ອງຈາກເປັນຄວາມລັບສຸດຍອດທາງການທະຫານ ຊຶ່ງຍັກໃຫຍ່ແຫ່ງມະຫາສະໝຸດລຸ້ນນີ້ ຈະຕ້ອງບໍ່ໃຫ້ຝ່າຍກົງກັນຂ້າມຮັບຮູ້ຂໍ້ມູນ ຫລື ຖືກກວດຈັບເສັ້ນທາງໄດ້.

ເຮືອດຳນ້ຳ Svyatoy Georgiy Pobedonosets ເປັນເຮືອດຳນ້ຳທີ່ໜ້າເກງຂາມທີ່ສຸດ ຂັບເຄື່ອນດ້ວຍພະລັງງານ ຈາກເຕົາປະຕິກອນນິວເຄລຍ ແລະ ຕິດຂີປະນາວຸດໂຈມຕີແບບ RSM-50 ຊຶ່ງຂີປະນາວຸດແຕ່ລະລູກ ຈະຕິດຫົວຮົບນິວເຄລຍອີກຈຳນວນ 3 ຫົວ ໂດຍແຕ່ລະຫົວ ຈະມີຄວາມສາມາດ ເຂົ້າຫາເປົ້າໝາຍໄດ້ຕ່າງກັນ ຢ່າງມີອິດສະຫລະ ຊຶ່ງເປັນອາວຸດທີ່ຊົງພະລັງ ແລະ ເປັນຍອດແສງຍານຸພາບ ແຫ່ງ ຍຸກສະໄໝ.

ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!