ຂປລ. ວັນທີ 27 ກໍລະກົດນີ້, ທ່ານ ຄຳປາວ ມົວ ຮອງເຈົ້າແຂວງຊຽງຂວາງ ພ້ອມດ້ວຍຄະນະ ໄດ້ລົງກວດກາໂຄງການຊ່ວຍເຫລືອລ້າຂອງ ແຂວງຕວຽນກວາງ ສສ ຫວຽດນາມ ໃນການທົດລອງສາທິດປູກຊາ ຢູ່ບ້ານ ຍວນທອງ ເມືອງແປກ ແຂວງໆຊຽງຂວາງ.

​ໂຄງການ​ດັ່ງກ່າວ, ​ໄດ້​ເລີ່​ມທົດລອງມາແຕ່ເດືອນພຶດສະພາ 2015, ມາ​ຮອດປັດຈຸບັນ ປູກໄດ້ແລ້ວ 74.000 ເບ້ຍ ໃນເນື້ອທີ່ 2 ເຮັກຕາ, ມີ 4 ສາຍພັນ ຄື: PH8, PH11, LDP1, LDP2, ​ໂດຍ​ມີ​ປະຊາຊົນ 5 ຄອບຄົວປູກຊາ ໃນການທົດລອງ ​ໂດຍ​ຈະ​ສ້າງເປັນຕົວແບບໃນການປູກຊາ ໃນຕໍ່ໜ້າຢູ່ເມືອງແປກ. ປັດຈຸບັນ ແຂວງຕວຽນກວາງ ໄດ້ນຳເອົາວັດສະດຸອຸປະກອນການຜະລິດຊາ ມາເຖິງບ້ານຍວນທອງ ເພື່ອຈະເລີ່ມທົດລອງການຜະລິດ, ສ່ວນແຂວງຊຽງຂວາງ ຈະສົມທົບຊ່ວຍສ້າງເຮືອນຜະລິດຊາ​ ເຊິ່ງຜົນຜະລິດແມ່ນ ສສ ຫວຽດນາມ ຈະເກັບຊື້.

ໃນ​ໂອກາດ​ນີ້, ທ່ານ​ຮອງ​ເຈົ້າ​ແຂວງ ​ໄດ້ເນັ້ນໜັກໃຫ້ປະຊາຊົນ ຈົ່ງເພີ່ມຄວາມຫ້າວຫັນ, ດຸໝັ່ນເອົາໃຈໃສ່ ຕໍ່ກັບການປູກຊາ, ປະຕິບັດຕາມການແນະນຳຂອງຊ່ຽວຊານ, ບົວລະບັດຮັກສາ, ຂະຫຍາຍສວນຊາໃຫ້ຫລາຍ, ຖ້າ​ການ​ທົດ​ລອງ​ດັ່ງກ່າວ​ປະສົບ​ຜົນສຳ​ເລັດ ​ແມ່ນຈະຂະຫຍາຍໄປເມືອງຕ່າງໆ ທີ່ເຫັນວ່າເໝາະສົມ ​ເພື່ອເປັນການຫລຸດຜ່ອນການ ຖ່າງໄຮ່ແບບເລື່ອນລອຍ, ​ໃຫ້​ປະຊາຊົນ​ຫັນປູກຊາ ​ເຊິ່ງຈະສາມາດ ສ້າງລາຍຮັບເຂົ້າຄອບຄົວ ເພື່ອຫລຸດຜ່ອນຄວາມທຸກຍາກໄປເທື່ອລະກ້າວ.