ສຳນັກຂ່າວຕ່າງປະເທດ ລາຍງານໃນວັນທີ 27 ກໍລະກົດນີ້ວ່າ ຫວຽດນາມມີຈຸດມຸ່ງໝາຍ ທີ່ຈະແກ້ໄຂບັນຫາຂໍ້ຂັດແຍ່ງຢູ່ທະເລຈີນໃຕ້ ຜ່ານການເຈລະຈາລະດັບທະວິພາຄີ ຊຶ່ງຝ່າຍຫວຽດນາມໄດ້ສະແດງຈຸດຢືນດັ່ງກ່າວ ໃນລະຫວ່າງເຂົ້າຮ່ວມກອງປະຊຸມ ລັດຖະມົນຕີການຕ່າງປະເທດອາຊຽນ ທີ່ນະຄອນຫລວງວຽງຈັນ ສປປ ລາວ ໂດຍຫວຽດນາມລະບຸ ຕົນເອງມີນະໂຍບາຍແກ້ໄຂຂໍ້ຂັດແຍ່ງ ດ້ວຍວິທີການສັນຕິວິທີ ຕາມກົດໝາຍລະຫວ່າງປະເທດ ແລະ ສະຫະປະຊາຊາດ ໃນນັ້ນແມ່ນໃຫ້ຄວາມສຳຄັນຕໍ່ການເຈລະຈາ ໃນລະດັບທະວິພາຄີ.
ທັງນີ້ ຈີນ ແລະ ຫວຽດນາມ ມີຂໍ້ຂັດແຍ່ງດິນແດນມາຍາວນານ ໃນບໍລິເວນໝູ່ເກາະສະແປຣດລີ ແລະ ໝູ່ເກາະພາຣາເຊວ ໃນທະເລຈີນໃຕ້, ແນວໃດກໍຕາມ ຈີນໄດ້ເປັນຄູ່ຄ້າລາຍໃຫຍ່ສຸດຂອງຫວຽດນາມ ໂດຍທັງສອງປະເທດ ພະຍາຍາມທີ່ຈະແກ້ໄຂ ແລະ ຟື້ນຟູຄວາມສຳພັນ ດ້ວຍການແລກປ່ຽນການຢ້ຽມຢາມ ຂອງເຈົ້າໜ້າທີ່ລະດັບສູງ ເພື່ອຫລຸດຜ່ອນຄວາມເຄັ່ງຕຶງ.
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!