ຂປລ. ຕາມການລາຍງານຈາກ ພະແນກກະສິກຳ ແລະ ປ່າໄມ້ແຂວງ ໃຫ້ຮູ້ວ່າ: ການປູກພືດເປັນສິນຄ້າ ທົ່ວແຂວງໄຊຍະບູລີ ເຫັນວ່າມີການຂະຫຍາຍຕົວດີພໍສົມຄວນ ໂດຍສະເພາະ ໄລຍະ 9 ເດືອນຜ່ານມາ ສາມາດສົ່ງອອກສິນຄ້າໄປຕ່າງປະເທດ ມີມູນຄ່າເກືອບ 17 ລ້ານໂດລາສະຫະລັດ, ໃນນີ້ເດັ່ນກວ່າໝູ່ແມ່ນ ພືດສິນຄ້າທີ່ໄດ້ມີການເຊັນສັນຍາ SPS ເຊັ່ນ: ສາລີແຂງ 77.199 ໂຕນ, ມັນຕົ້ນ 53.350 ໂຕນ, ໝາກເດືອຍ 6.530 ໂຕນ ແລະ ພືດອື່ນໆອີກເຊັ່ນ: ຖົ່ວດິນ, ດອກແຂມ, ໝາກງາ, ໝາກຕາວ, ປໍສາ ແລະ ຂີງພັນ ເຊິ່ງສິນຄ້າເຫລົ່ານີ້ ແມ່ນໄດ້ສົ່ງອອກດ່ານສາກົນ ພາຍໃນແຂວງ.
ນອກຈາກສົ່ງພືດກະສິກຳອອກຕ່າງປະເທດແລ້ວ ການລ້ຽງສັດເປັນສິນຄ້າ ກໍໄດ້ມີການຂະຫຍາຍຕົວ ແລະ ມີປັດໄຈໃໝ່ເກີດຂຶ້ນ ກ້າວໄປສູ່ການລ້ຽງແບບເປັນຟາມ. ທົ່ວແຂວງມີຟາມລ້ຽງໝູ 52 ຟາມ ມີໝູ 9.986 ໂຕ, ຟາມລ້ຽງໄກ່ພັນໄຂ່ 32 ຟາມ ມີໄກ່ 72.340 ໂຕ, ໄກ່ພັນຊີ້ນ 10 ຟາມ, ເປັດພັນໄຂ່ 4 ຟາມ, ເປັດພັນຊີ້ນ 4 ຟາມ, ມີກະຊັງປາ 103 ກະຊັງ ສາມາດສົ່ງອອກສັດຂາຍ ທັງພາຍໃນ ແລະ ຕ່າງແຂວງ ໄດ້ທັງໝົດ 55.950 ໂຕ. ສ່ວນສິນຄ້ານຳເຂົ້າ ແມ່ນໝາກໄມ້, ພືດຜັກຕ່າງໆ ລວມທັງເບ້ຍໃມ້ໃຫ້ໝາກ ມີມູນຄ່າທັງໝົດ 304.913 ໂດລາສະຫະລັດ.
ແຫລ່ງຂ່າວ:
/ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!