ຫຼັງໆມານີ້ເຮົາຈະເຫັນໄດ້ວ່າ Huawei ນັ້ນກຳລັງຢູ່ໃນຊ່ວງປ່ອຍໂທລະສັບລຸ້ນໃໝ່ໆອອກມາເລື້ອຍໆບໍ່ວ່າເປັນ Huawei Maimang 5, G9 lite, Honor 5A, Honor 8 ແລະອີກລຸ້ນທີ່ກຳລັງຈະເປີດໂຕຄື Honor Note 8. ແຕ່ໃນທາງດຽວກັນກ່ອນໜ້ານີ້ກໍມີລາຍງານກ່ຽວກັບຍອດຂາຍຂອງ P9 ແລະ P9 Plus ອອກມາກ່ອນແລ້ວ.
ຫຼ້າສຸດນີ້ເອງ Yu Chengdong ຮອງປະທານອາວຸໂສຂອງບໍລິສັດ ກໍອອກມາປະກາດກ່ຽວກັບຍອດຂາຍເຄິ່ງປີທຳອິດຂອງປີ 2016 ຜ່ານບັນຊີ Weibo ໂດຍບອກວ່າບໍລິສັດສາມາດເຮັດຍອດຂາຍໄປໄດ້ເຖິງ 60.56 ລ້ານເຄື່ອງ ເຊິ່ງເພີ່ມຂຶ້ນກວ່າປີແລ້ວນີ້ເຖິງ 25%. ສ່ວນສິນຄ້າທີ່ເປັນທີ່ນິຍົມຫຼາຍທີ່ສຸດຂອງບໍລິສັດແມ່ນ Mate 8, P9, P9 Plus, MateBook ແລະ Huawei Watch
ໂດຍໃນຊ່ວງເຄິ່ງປີທຳອິດຂອງປີ 2016 ນີ້ບໍລິສັດມີລາຍຮັບຈາກສະມາດໂຟນເພີ່ມຂຶ້ນຫຼາຍກວ່າປີກ່ອນເຖິງ 41% ຫຼືປະມານ 77.4 ພັນລ້ານຢວນ. ບໍລິສັດຍັງມີສ່ວນແບ່ງສະມາດໂຟນໃນຕະຫຼາດໂລກຢູ່ທີ່ 11.4% ເປັນອັນດັບ 3 ນຳຫຼັງພຽງ Samsung ແລະ Apple.
ນອກຈາກນີ້ທາງບໍລິສັດຍັງໄດ້ໂພສລາຍລະອຽດກ່ຽວກັບການຕະຫຼາດໃນບາງປະເທດອີກນຳເຊັ່ນ: UK ມີສ່ວນແບ່ງຢູ່ທີ່ 3.9%, 6.7% ທີ່ຝຣັ່ງ ແລະ 9.6% ທີ່ເຢຍລະມັນ. ການຂະຫຍາຍໂຕຂອງແບຣນໃນບາງປະເທດກໍສູງເຊັ່ນ: ປະເທດອີຢິບເຕີບໃຫຍ່ 700%, 200% ທີ່ຊິລີ ແລະ 134% ທີ່ເປຣູ.
ທີ່ມາ:gizmochina