ວັນທີ 24 ກໍລະກົດ ປີ 1997 ຫຼືມື້ນີ້ເມື່ອ 19 ປີທີ່ແລ້ວ ເປັນມື້ວາງຈຳໜ່າຍຂອງເກມ Monster Rancher ເທິງເຄື່ອງ PS1 ທີ່ປະເທດຍີ່ປຸ່ນ. ແຕ່ບາງຄົນອາດຈະຮູ້ຈັກກັບຊື່ Monster Farm ຫຼາຍກວ່າ ເພາະຊື່ Monster Farm ນັ້ນເປັນຊື່ທີ່ໃຊ້ວາງຈຳໜ່າຍໃນຍີ່ປຸ່ນ ຫຼັງຈາກທີ່ອອກໄປຈຳໜ່າຍນອກຍີ່ປຸ່ນກໍປ່ຽນຊື່ໃຫ້ເປັນສາກົນຂຶ້ນກໍຄື Monster Rancher. ໂດຍໂຕເກມ Monster Rancher ພາກນີ້ເປັນພາກທຳອິດຂອງຊີຣີທີ່ Tecmo ພັດທະນາຂຶ້ນມາ ແລະເປັນເກມທີ່ບຸກເບີກແນວເກມທີ່ສ້າງມອນສເຕີ້ ທີ່ເກີດຂຶ້ນໃນເວລານັ້ນນຳ.

ດ້ານລະບົບເກມ Monster Rancher ຈະມີລະບົບຊອກຫາມອນສເຕີ້ທັງແບບວິທີທຳມະດາຄືໄປຫາລູກມອນສເຕີ້ໃນຕະຫຼາດ ກັບອີກວິທີຄືໃຊ້ລູກຫຼິ້ນສະເພາະຂອງເກມນີ້ ນັ້ນກໍຄືໄປໃນໂໝດສ້າງມອນສເຕີ້ ຈາກນັ້ນເກມຈະຢຸດລົງຊົ່ວຄາວເພື່ອໃຫ້ຜູ້ຫຼິ້ນເອົາແຜ່ນຊີດີອັນໃດກໍໄດ້ທີ່ມີຂໍ້ມູນຢູ່ໃນນັ້ນ ບໍ່ວ່າຈະເປັນຊີດີເພງ, ຊີດີຮູບເງົາ, ຊີດີເກມອື່ນ ຫຼືແມ້ແຕ່ຊີດີທີ່ມີແຕ່ໄຟລ໌ວຽກຂອງເຮົາເຂົ້າໄປໃນເຄື່ອງ PS1 ແລ້ວປິດຝາ, ແປັບໜຶ່ງເກມຈະເຮັດການອ່ານຂໍ້ມູນແຜ່ນຊີດີທີ່ເຮົາໃສ່ເຂົ້າໄປ ຈົນປະມວນຜົນອອກມາເປັນມອນສເຕີ້ສາຍພັນຕ່າງໆ ຕາມຊະນິດຂອງຂໍ້ມູນແຜ່ນຊີດີນັ້ນໆ ເຊິ່ງຈະມີແຜ່ນຊີດີບາງປະເພດທີ່ສາມາດສ້າງມອນສເຕີ້ແບບພິເສດອອກມາໄດ້ເຊັ່ນ: ແຜ່ນເພງຮ້ອງສະເຫຼີມສະຫຼອງວັນຄຣິສມາດ ກໍຈະສ້າງມອນສເຕີ້ທີ່ເປັນສາຍພັນ Santa ໄດ້. ນອກຈາກນີ້ ຫາກຜູ້ຫຼິ້ນມີມອນສເຕີ້ຕັ້ງແຕ່ 2 ໂຕຂຶ້ນໄປກໍສາມາດຈັບມາປະສົມກັນອອກມາເປັນມອນສເຕີ້ໂຕໃໝ່ທີ່ມີຄ່າພະລັງອ້າງອີງຈາກໂຕທີ່ເປັນພໍ່ກັບແມ່ໄດ້ເຊັ່ນກັນ. 

ເມື່ອຜູ້ຫຼິ້ນສ້າງມອນສເຕີ້ຫຼືມີມອນສເຕີ້ຮຽບຮ້ອຍແລ້ວ ກໍຕ້ອງມີການເຝິກຝົນມັນໃຫ້ເຮັດວຽກແລະອອກກຳລັງກາຍເພື່ອເພີ່ມຄ່າພະລັງຕ່າງໆໃຫ້ສູງຂຶ້ນ ແລະພໍໄດ້ຄ່າພະລັງທີ່ສູງລະດັບໜຶ່ງ ເຮົາກໍຕ້ອງພາມັນໄປຕໍ່ສູ້ທີ່ລານປະລອງ ໂດຍມອນສເຕີ້ຈະເຮັດການສູ້ຂອງມັນເອງ ຜູ້ຫຼິ້ນຈະເປັນພຽງຜູ້ຊົມຂ້າງສະໜາມເທົ່ານັ້ນ ຫາກມອນສເຕີ້ຂອງເຮົາເອົາຊະນະໄດ້ກໍຈະໄດ້ເງິນລາງວັນແລະໄອເທັມຕອບແທນ. 

Fact ເລັກນ້ອຍກ່ຽວກັບເກມ Monster Rancher

• ປັດຈຸບັນນີ້ Monster Rancher ໄດ້ວາງຈຳໜ່າຍໃນທຸກແພລັດຟອຣ໌ມລວມກັນເຖິງ 17 ພາກ ໂດຍແບ່ງເປັນ PS1 ຈຳນວນ 4 ພາກ, Game Boy Color ຈຳນວນ 2 ພາກ, PS2 ຈຳນວນ 3 ພາກ, Game Boy Advance ຈຳນວນ 2 ພາກ, Nintendo DS ຈຳນວນ 2 ພາກ, PC ຈຳນວນ 1 ພາກ (ໃຊ້ຊື່ວ່າ Monster Farm Online ເຊິ່ງເປີດບໍລິການສະເພາະໃນຍີ່ປຸ່ນ) ແລະເທິງສະມາດໂຟນອີກ 3 ພາກ (ແຕ່ມີພຽງ My Monster Rancher ເທົ່ານັ້ນທີ່ວາງຈຳໜ່າຍນອກຍີ່ປຸ່ນ), ເຖິງວ່າໂຕເກມຈະວາງຈຳໜ່າຍມາຫຼາຍແພລັດຟອຣ໌ມ ແຕ່ມີພຽງແພລັດຟອຣ໌ມ PS1 ເທົ່ານັ້ນທີ່ເຮັດຍອດຂາຍໄດ້ສູງທີ່ສຸດ ແລະໄດ້ຮັບຄຳວິຈານໄປໃນທາງບວກຫຼາຍ.

• ຕອນທີ່ຈະສ້າງມອນສເຕີ້ຂຶ້ນມາຫາກຜູ້ຫຼິ້ນລອງໃສ່ແຜ່ນເກມ Tecmo’s Deception (PS1) ເຂົ້າໄປຈະສາມາດສ້າງມອນສເຕີ້ພິເສດທີ່ມີຊື່ວ່າ Ardebaran ໄດ້. 

• ຕໍ່ຈາກຂໍ້ຄວາມດ້ານເທິງ ຫາກລອງໃສ່ແຜ່ນເພງລວມຮິດຂອງ Billy Joel (Billy Joel Greatest Hits) ຈະສາມາດສ້າງມອນສເຕີ້ພິເສດທີ່ມີຊື່ວ່າ Shades ໄດ້. 

• ແຜ່ນແທ້ຂອງເກມນີ້ຈະມີເພງລັບເຊື່ອງຢູ່ ໂດຍການນຳເອົາແຜ່ນເກມໄປລອງເປີດທີ່ເຄື່ອງຫຼິ້ນ CD ເພງທົ່ວໄປແລ້ວລອງຫຼິ້ນ track ທີ 2 ເບິ່ງກໍຈະສາມາດຟັງເພງລັບທີ່ເວົ້ານີ້ໄດ້. 

ທີ່ມາ:online station