ກາກໃຍ ຄືສ່ວນຂອງອາຫານ ເຊິ່ງນ້ຳຍ່ອຍໃນຮ່າງກາຍມະນຸດບໍ່ສາມາດຈະຍ່ອຍໄດ້ ແຕ່ອາດຈະຍ່ອຍໃນບາງເທື່ອໂດຍເຊື້ອແບັກທີເຣຍ ເຊິ່ງມີຢູ່ປົກກະຕິໃນລຳໄສ້ ໃນການທີ່ລຳໄສ້ຈະເຮັດໜ້າທີ່ຢ່າງມີປະສິດທິພາບນັ້ນ ຂຶ້ນຢູ່ກັບອາຫານທີ່ກິນວ່າມີກາກໃຍຫລາຍຫລືບໍ່ ?
ບາງຄົນທີ່ກິນອາຫານທີ່ມີກາກໃຍບໍ່ພຽງພໍກັບຄວາມຕ້ອງການຂອງຮ່າງກາຍນັ້ນ ໂດຍສ່ວນຫລາຍຈະມີບັນຫາກ່ຽວກັບໂລກຫົວໃຈ ລິດສີດວງທະວານ ມະເຮັງລຳໄສ້ໃຫຍ່ ຫລືທະວານໜັກ ລຳໄສ້ປູດໂປ ເສັ້ນເລືອດຂອດ ໂລກອ້ວນ ເບົາຫວານ ໄຂມັນໃນເລືອດສູງ ຄວາມດັນເລືອດສູງ ຫລອດເລືອດອັດຕັນ.
ອາຫານທີ່ມີກາກໃຍສູງໄດ້ແກ່ ເມັດເຂົ້າຕ່າງໆ ຖົ່ວທຸກຊະນິດ ມັນຝຣັ່ງ ສາລີ ໝາກກອກນ້ຳ ໝາກບວບ ໝາກອີຮຸມ ໝາກອຶ ເປືອກແອບເປີ້ນ ໝາກກ້ຽງ ອະງຸ່ນ ໝາກນັດ ຜັກ ແລະໝາກໄມ້ທຸກຊະ ນິດ.
ຄຸນປະໂຫຍດ :
- ເຮັດໃຫ້ອີ່ມດົນ ເນື່ອງຈາກກາກໃຍມີລັກສະນະເປັນກາກຫລາຍ ຈຶ່ງຜ່ານກະເພາະໄດ້ຊ້າ.
- ຫລຸດໂອກາດທີ່ສານພິດຕ່າງໆ ຈະສຳຜັດກັບຜິວໜັງລຳໄສ້ ເພາະກາກໃຍສາມາດດຶງນ້ຳໄວ້ໃນລຳໄສ້ໄດ້ເປັນຈຳນວນຫລາຍ ຈຶ່ງເປັນການເພີ່ມປະລິມານອຸດຈາລະໃນລຳໄສ້ ແລະເກີດການກະຕຸ້ນໃຫ້ມີການຖ່າຍອຸດຈາລະຢ່າງສະໝໍ່າສະເໝີ.
- ຊ່ວຍໃຫ້ຮ່າງກາຍດູດຊຶມເອົາໄຂມັນຈາກອາຫານນ້ອຍລົງ ແລະຫລຸດການດູດຊຶມ ເປັນການຫລຸດຄໍເລດສະເຕີໂຣນ ແລະໄຕຣກຣີເຊີໄຣ ເຊິ່ງເປັນໄຂມັນອັນຕະລາຍ ເພາະເປັນຕົ້ນເຫດຂອງຄວາມດັນເລືອດສູງແລະໂລກຫົວໃຈ.
- ຊ່ວຍຜູ້ເປັນເບົາຫວານ ໂດຍການໄປຫລຸດຄວາມຕ້ອງການຂອງອິນຊູລິນໃນຮ່າງກາຍ ເພາະຫລຸດການດູດຊຶມນ້ຳຕານເຂົ້າຮ່າງກາຍ.
- ປ້ອງກັນບໍ່ໃຫ້ເກີດທ້ອງຜູກ ລິດສີດວງທະວານ ໂດຍສະເພາະມະເຮັງໃນລຳໄສ້ ເພາະກາກໃຍໄປເຮັດໃຫ້ສານທີ່ກໍ່ໃຫ້ເກີດມະເຮັງຫລຸດຄວາມເຂັ້ມຂຸ້ນລົງ ແລ້ວຂັບອອກຈາກຮ່າງກາຍໄປພ້ອມກັບອຸດຈາລະໄດ້ຢ່າງວ່ອງໄວ.