ເມື່ອວັນທີ 20 ກໍລະກົດຜ່ານມາ ສະມາຄົມເຟີນີເຈີລາວໄດ້ເປີດງານວາງສະແດງເຄື່ອງເຮືອນລາວຄັ້ງທີ I ຂຶ້ນທີ່ ສູນການຄ້າລາວ-ໄອເຕັກໂດຍໃຫ້ກຽດເຂົ້າຮ່ວມຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີແຫ່ງ ສປປ ລາວ, ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສະຫະກຳ ແລະການຄ້າ ທ່ານ ຄຳໄພ ສົມຊະນະ ປະທານສະມາຄົມເຟີນີເຈີລາວ ແລະແຂກທີ່ຖືກເຊີນຈາກພາກສ່ວນທີ່ກ່ຽວຂ້ອງຕ່າງໆເຂົ້າຮ່ວມ.
ທ່ານ ຄຳໄພ ສົມຊະນະ ກ່າວວ່າ: ງານດັ່ງກ່າວແມ່ນເລີ່ມແຕ່ວັນທີ 18 ຫາ 24 ກໍລະກົດ 2016 ທີ່ສູນການຄ້າລາວ-ໄອເຕັກ, ຈຸດປະສົງກໍເພື່ອເປັນການອະນຸ ລັກຮັກສາປ່າໄມ້, ນຳໃຊ້ໄມ້ໃຫ້ເກີດປະໂຫຍດສູງສຸດ ແລະມີໄມ້ໃຊ້ຢ່າງຍືນຍົງ ໂດຍການປຸງແຕ່ງໃຫ້ເປັນຜະລິດຕະພັນ ສຳເລັດຮູບມາຈາກໄມ້, ຫວາຍ ແລະໄມ້ ປ່ອງໃຫ້ມີຫຼາກຫຼາຍຜະລິດຕະພັນຕາມສັງຄົມປະຈຸບັນຕ້ອງການ ແລະເປັນທີ່ນິຍົມກັນຢູ່ ດ້ວຍການນຳໃຊ້ເຕັກໂນໂລຊີ ທີ່ທັນສະໄໝ ແລະພ້ອມທັງເປັນການສ້າງມູນຄ່າເພີ່ມໃຫ້ກັບຜະລິດຕະພັນເຟີນີເຈີໄມ້ລາວ, ໂດຍສະເພາະກໍ່ແມ່ນ (ມູນຄ່າຈໍລະຈອນຊື້-ຂາຍສິນຄ້າ ລວມທັງໝົດໃນງານມີປະມານ 20 ຕື້ກີບ, ແລະຄາດຄະເນຈະມີການຊື້-ຂາຍໄດ້ປະ ມານ 80%, ຕົກເປັນມູນຄ່າຢູ່ປະມານ 16 ຕື້ກີບ.
ສຳລັບຜູ້ເຂົ້າຮ່ວມວາງສະແດງສິນຄ້າຄັ້ງນີ້ ແມ່ນມີຈຳນວນທັງໝົດ 47 ຫົວໜ່ວຍ ແລະມີ 143 ຫ້ອງຂາຍ, ມາຈາກຫົວໜ່ວຍການຜະລິດເຟີນີເຈີທີ່ຜະລິດຈາກໄມ້ຫວາຍ, ໄມ້ປ່ອງ ແລະເຄື່ອງແກະສະຫຼັກໄມ້ຕ່າງໆ ມີ 8 ຫົວໜ່ວຍ 22 ຫ້ອງ ວາງສະແດງ, ຫັດຖະກຳມີ 8 ຫົວໜ່ວຍ 12 ຫ້ອງວາງສະແດງ, ມາຈາກ 8 ແຂວງໃນທົ່ວປະເທດແມ່ນມີຈຳນວນ 9 ຫົວໜ່ວຍທຸລະກິດ, ສ່ວນອີກ 22 ຫົວໜ່ວຍ ແລະມີ 101 ຫ້ອງວາງສະແດງ ແມ່ນຜູ້ຜະລິດເຟີນີເຈີມາຈາກນະຄອນຫຼວງວຽງຈັນ.
ແນວໃດກໍດີເພື່ອເຮັດໃຫ້ງານວາງສະແດງສິນຄ້າດັ່ງກ່າວມີຄວາມໝາຍ, ຫຼາກຫຼາຍສີສັນ ແລະຄຶກຄື້ນມ່ວນຊື່ນ, ສ້າງຄວາມປະທັບໃຈໃຫ້ແກ່ຜູ້ເຂົ້າມາຊື້-ຂາຍສິນຄ້າ ແລະຜູ້ມາທ່ຽວຊົມງານວາງສະແດງເຄື່ອງເຮືອນລາວຄັ້ງນີ້ ໃນວັນທີ 22 ກໍລະກົດ 2016 ແມ່ນມີການສະແດງຄອນເສີດລາວ-ໄທ ແລະການແຂ່ງຂັນຕີມວຍ, ຊຶ່ງເລີ່ມແຕ່ ເວລາ 18:00 ເປັນຕົ້ນໄປ.
ທີ່ມາ: ເສດຖະກິດ-ສັງຄົມ