ເຈົ້າໜ້າທີ່ການບິນເຄນຢາລະບຸວ່າ ພົບຜູ້ເສຍຊີວິດຢ່າງໜ້ອຍ 4 ຄົນ ໃນມື້ນີ້ (2 ກໍລະກົດ)
ເມື່ອເຮືອບິນລຳລຽງສິນຄ້າລຳໜຶ່ງ ທີ່ກຳລັງຈະຂົນສົ່ງພືດສະໝຸນໄພ ໄປປະເທດໂຊມາເລຍ ພຸ່ງຕຳເຂົ້າ
ອາຄານ ພາຍຫຼັງບິນຂຶ້ນຈາກສະໜາມບິນຫຼັກໃນເມືອງຫຼວງຂອງເຄນຢາ ເຊິ່ງເປັນສະໜາມບິນ
ທີ່ມີການສັນຈອນໜາແໜ້ນຫຼາຍທີ່ສຸດ ໃນຂົງເຂດອັບຟຣິກາຕາເວັນອອກ. ໃນຖ້ອຍຖະແຫຼງຕອນໜຶ່ງ
ຂອງເຈົ້າໜ້າທີ່ທາງການໄດ້ເວົ້າວ່າ ” ເມື່ອຕອນເຊົ້າ ເຮືອບິນຂົນສົ່ງສິນຄ້າ ຟັອກເກີ້ 50 ທີ່ມີຜູ້ໂດຍສານ
ທັງໝົດ 4 ຄົນ ໄດ້ພຸ່ງຕຳເຂົ້າໃສ່ອາຄານການຄ້າຫຼັງໜຶ່ງພາຍຫຼັງບິນຂຶ້ນຈາກສະໜາມບິນສາກົນ
ໂຈໂມ ເຄນຍັດຕາ ຂອງນະຄອນຫຼວງໄນໂຣບີ ”
ເຮືອບິນລຳນີ້ປະສົບອຸບັດຕິເຫດກ່ອນເຊົ້າມືດຂອງມື້ນີ້ ເຊິ່ງເປັນຊ່ວງເວລາທີ່ຄາດກັນວ່າ ບໍ່ໜ້າຈະມີໃຜ
ຢູ່ໃນອາຄານຫຼັງດັ່ງກ່າວ, ຊ່າງພາບຂອງສຳນັກຂ່າວ ເອເອັຟພີ ທີ່ຢູ່ໃນບ່ອນເກີດເຫດເລົ່າວ່າ ເຮືອບິນລຳ
ນີ້ພຸ່ງເຂົ້າອາຄານ 2 ຊັ້ນ ເຊິ່ງເປັນທີ່ຕັ້ງຂອງຮ້ານຄ້າຂາຍຍ່ອຍ ທີ່ຢູ່ຫ່າງຈາກສະໜາມບິນອອກໄປປະມານ
3 ກິໂລແມັດ. ຈາກແຫຼ່ງຂ່າວຂອງຕຳຫຼວດເຄນຢາກໍໄດ້ກ່າວວ່າ ຜູ້ທີ່ໂດຍສານມາກັບເຮືອບິນລຳນີ້ ເສຍຊີ
ວິດທັງໝົດ, ເຈົ້າໜ້າທີ່ຕຳຫຼວດລະດັບອາວຸໂສຄົນໜຶ່ງເວົ້າວ່າ ” ຜູ້ໂດຍສານເສຍຊີວິດທັງ 4 ຄົນ, ເຮືອບິນ
ລຳນີ້ພຸ່ງຕຳເສົາໄຟຟ້າ ກ່ອນທີ່ຈະປະທະກັບຕົວອາຄານ ແລ້ວຈິ່ງເກີດໄຟລຸກຖ້ວມ ”
ກຸ່ມຄັວນພຸ່ງອອກມາຈາກຝາຂອງອາຄານຄອນກຣີດດ້ານໜ້າ ທີ່ຖືກເຮືອບິນຕຳ ເຊິ່ງຍັງມີບາງສ່ວນຍັງ
ຄົງຢູ່ລະຫວ່າງການກໍ່ສ້າງ, ພື້ນທີ່ໂດຍຮອບຂອງສະໜາມບິນ ເປັນເຂດອຸດສາຫະກຳ ແລະ ທີ່ຕັ້ງຂອງໂຮງ
ງານຕ່າງໆ ຕະຫຼອດຈົນບ້ານເຮືອນ ແລະ ຮ້ານຄ້າ. ສະພາກາແດງເຄນຢາ ກ່າວວ່າ ສາມາດກູ້ຮ່າງຜູ້ເສຍ
ຊີວິດໄດ້ແລ້ວໜຶ່ງລາຍ ໃນຂະນະທີ່ພາລະກິດຄົ້ນຫາ ແລະ ຊ່ວຍຊີວິດ ກໍຍັງຄົງເດີນໜ້າຕໍ່ໄປ.
ທ່ານ ອີຣິກ ຄີໄຣເທ ຫົວໜ້າຝ່າຍຄວາມປອດໄພຂອງສະໜາມບິນກ່າວວ່າ ສະໜາມບິນແຫ່ງນີ້ຖືກສັ່ງປິດ
ໃນບໍ່ເທົ່າໃດນາທີຜ່ານມານີ້ ເພື່ອດຳເນີນການຕາມຂັ້ນຕອນ, ແຕ່ມາຮອດປະຈຸບັນນີ້ແມ່ນໄດ້ກັບມາເປີດ
ໃຫ້ບໍລິການເປັນປົກກະຕິແລ້ວ.