ເຖິງແມ່ນວ່າການສົ່ງອອກໃນສົກປີນີ້ຈະມີການພິກຜັນຈາກຫຼາຍປີທີ່ຜ່ານມາກໍຕາມ, ແຕ່ໂດຍລວມແລ້ວກໍຍັງເຫັນວ່າມີບັນຍາກາດສືບຕໍ່ຄຶກຄື້ນຢູ່ສະເພາະໄລຍະ 9 ເດືອນມານີ້ ແຂວງສາລະວັນມີຍອດການສົ່ງອອກແລ້ວ ຫຼາຍກວ່າ 80%, ໃນນີ້ ໄທ ຍັງເປັນຕະຫຼາດຫຼັກຂອງການສົ່ງອອກພາຍໃນແຂວງກວມເອົາ 53% ຂອງຍອດການສົ່ງອອກທັງໝົດ.
ທ່ານ ສີສຸພັນ ເທບວົງສາ ຫົວໜ້າພະແນກອຸດສາຫະກຳ ແລະການຄ້າແຂວງສາລະວັນໃຫ້ຮູ້ວ່າ: ການສົ່ງອອກສິນຄ້າໃນໄລຍະ 9 ເດືອນຂອງສົກປີນີ້ຢູ່ ແຂວງສາລະວັນ ເຫັນວ່າ ຍັງສືບຕໍ່ເຄື່ອນໄຫວໄປໃນທິດທາງທີ່ຕັ້ງໜ້າ ແລະມີຜົນສຳເລັດໃນຫຼາຍດ້ານເນື່ອງຈາກວ່າໄມ້ ແລະຜະລິດຕະພັນໄມ້ທີ່ເຄີຍມີອັດຕາກວມເອົາຫຼາຍກວ່າ 50% ຂອງມູນຄ່າການສົ່ງອອກ, ແຕ່ປີນີ້ກວມເອົາ 15,8% ຊຶ່ງກົງກັນຂ້າມກັບໝວດສິນຄ້າກະສິກຳໄດ້ກາຍມາເປັນສິນຄ້າຫຼັກໃນການສົ່ງອອກໃນ 9 ເດືອນສົກປີນີ້ ມີອັດຕາກວມເອົາ 84,34% ຂອງມູນຄ່າການສົ່ງອອກທັງໝົດ.
ແຕ່ເຖິງແມ່ນວ່າການສົ່ງອອກສິນຄ້າກະສິກຳຈະເພີ່ມຂຶ້ນກວມເອົາ 84% ໃນການສົ່ງອອກກໍຍັງບໍ່ພຽງພໍກັບການ ຫຼຸດລົງຂອງມູນຄ່າສິນຄ້າໄມ້ ແລະ ຜະລິດຕະພັນໄມ້ ເຮັດໃຫ້ມູນຄ່າການສົ່ງອອກໂດຍລວມຫຼຸດ 10% ກວ່າເມື່ອທຽບໃສ່ໄລຍະດຽວກັນຂອງປີຜ່ານມາ, ສ່ວນຕະຫຼາດສົ່ງອອກສິນຄ້າແມ່ນບັນດາປະເທດໃກ້ຄຽງເປັນຕົ້ນ ສສ ຫວຽດນາມ, ໄທ, ກຳປູເຈຍ ແລະ ປະເທດຈີນ ລວມມູນຄ່າທັງໝົດ 27,58 ລ້ານໂດລາ, ໃນນັ້ນ ຫຼາຍກວ່າໝູ່ແມ່ນໄປປະເທດໄທມູນຄ່າ 14,62 ລ້ານໂດລາ.
ສ່ວນການນຳເຂົ້າສິນຄ້າເຫັນວ່າຫຼຸດ ລົງຫຼາຍ ຖ້າທຽບໃສ່ໄລຍະດຽວ ກັນຂອງ ປີຜ່ານມາ ຫຼຸດລົງ 19,77%, ໃນນັ້ນ ສິນຄ້ານຳເຂົ້າສ່ວນຫຼາຍຈະແມ່ນໝວດ ເຄື່ອງຈັກ, ລົດໄຖນາ ແລະອຸປະກອນ ກົນຈັກຮັບໃຊ້ໂຮງງານມູນຄ່າ 1,78 ລ້ານໂດລາ, ໃນນີ້ ສ່ວນຫຼາຍແມ່ນນຳ ເຂົ້າຈາກປະເທດໄທ ແລະຫວຽດນາມ.
ທ່ານຫົວໜ້າພະແນກອຸດສາຫະກຳ ແລະ ການຄ້າແຂວງສາລະວັນ ຍັງໃຫ້ຮູ້ອີກວ່າ: ເພື່ອເຮັດໃຫ້ແຜນການສົ່ງອອກບັນລຸຕາມເປົ້າໝາຍຂອງສົກປີທີ່ວາງໄວ້ນັ້ນ, ໃນ 3 ເດືອນທ້າຍສົກປີນີ້ ທາງແຂວງຈະສືບຕໍ່ເລັ່ງໃສ່ຊຸກຍູ້ສົ່ງເສີມການຜະລິດສິນຄ້າກະສິກຳດ້ວຍຮູບການຊອກຕະຫຼາດ, ການຍາດແຍ່ງແຫຼ່ງທຶນສ້າງໂຮງງານແປຮູບ ພ້ອມກັນນັ້ນ ກໍເພີ່ມທະວີການປະສານງານກັນລະຫວ່າງຂະແໜງການຕ່າງໆຂອງພາກລັດໃຫ້ມີຄວາມກົມກຽວຂຶ້ນ ແລະເປັນເອກະພາບກັນ.
ທີ່ມາ: ເສດຖະກິດ-ສັງຄົມ