ວັນທີ 21 ກໍລະກົດ ປີ 1995 ຫຼືມື້ນີ້ເມື່ອ 21 ປີທີ່ແລ້ວ ເປັນມື້ວາງຈຳໜ່າຍຂອງເກມ Castlevania: Dracula X ເທິງເຄື່ອງ Super Famicom ທີ່ປະເທດຍີ່ປຸ່ນ ພັດທະນາໂດຍບໍລິສັດ Konami ອີກຢ່າງໜຶ່ງ ພາກນີ້ຖືເປັນພາກຣີເມກຈາກພາກ Rondo of Blood ທີ່ເຄີຍລົງໃຫ້ກັບເຄື່ອງ PC-Engine ມາກ່ອນ ເຖິງວ່າເຄື່ອງ Super Famicom ນັ້ນຈະມີຖານຜູ້ຫຼິ້ນຫຼາຍກວ່າ PC-Engine ກໍຕາມ ແຕ່ເນື່ອງຈາກສະເປັກເຄື່ອງ Super Famicom ນັ້ນຕ່ຳກວ່າ ອີກທັງເຄື່ອງ Super Famicom ຍັງໃຊ້ກະແຊັດເກມໃນການຫຼິ້ນເຊິ່ງມີຄວາມບັນຈຸໜ້ອຍກວ່າ ຈຶ່ງເຮັດໃຫ້ທັງກຣາບຟິກແລະລາຍລະອຽດຕ່າງໆ ຖືກຫຼຸດລົງຈາກເວີຊັ່ນ PC-Engine ຢູ່ພໍສົມຄວນ (ແຕ່ເລື່ອງຄວາມຍາກຍັງຄືເກົ່າ)
ເນື້ອເລື່ອງຂອງ Castlevania: Dracula X ຈະເກີດຂຶ້ນໃນປີ ຄ.ສ 1792 ເມື່ອຣິດເຕີ ເບວມອນ (Richter Belmont) ທາຍາດຕະກູນຂ້າແວມໄພຣ໌ທີ່ຫາກ່ອນມີອາຍຸພຽງ 19 ປີ ໄດ້ບຸກມາທີ່ປະສາດແດຣັກຄູລ້າເພື່ອຊ່ອຍແອນເນັດ ແຟນສາວຂອງຣິດເຕີ ແລະມາເຣຍ ນ້ອງສາວຂອງແອນເນັດທີ່ຖືກລັກພາໂຕໄປ ເຊິ່ງໂຕເກມຈະມີສາກຈົບທັງໝົດ 3 ແບບໄດ້ແກ່: ຈົບແບບບໍ່ຊ່ອຍໃຜເລີຍ, ຊ່ອຍມາເຣຍພຽງຄົນດຽວ ແລະຊ່ອຍໄດ້ທັງ 2 ຄົນ ເຊິ່ງສາກຈົບເຫຼົ່ານີ້ຈະຂຶ້ນກັບວ່າເຮົາໄດ້ເກັບກະແຈລະຫວ່າງທາງເພື່ອໄປຊ່ອຍສາວໆຫຼືບໍ່.
ດ້ານລະບົບເກມພາກນີ້ເຮົາຈະໄດ້ບັງຄັບເປັນ ຣິດເຕີ ເບວມອນ ຜູ້ໄດ້ຮັບແສ້ແວມໄພຣ໌ຄິວເລີ້ເປັນມໍລະດົກຕົກທອດຈາກຕະກູນຂອງລາວເອງ ເຊິ່ງລະບົບທີ່ເພີ່ມເຂົ້າມາໃນພາກ Rondo of Blood ແລະພາກນີ້ແມ່ນລະບົບ Item Crush ທີ່ຈະເປັນການໃຊ້ທ່າໄມ້ຕາຍຂອງອາວຸດເສີມຕ່າງໆ ເຊັ່ນມີດສັ້ນທີ່ການໃຊ້ປົກກະຕິຈະເປັນການດຶກອອກໄປພຽງອັນດຽວ ແຕ່ຖ້າກົດໃຊ້ Item Crush ຂອງມີດກໍຈະເປັນການດຶກມີດລົວໆອອກໄປຫຼາຍໆອັນແທນ ຫຼືການໃຊ້ Item Crush ຂອງນ້ຳມົນກໍຈະເປັນການເອີ້ນນ້ຳມົນລົງມາເປັນສາຍຝົນ ເພື່ອໂຈມຕີສັດຕູທັງໝົດເທິງໜ້າຈໍ ເປັນຕົ້ນ.
Fact ເລັກນ້ອຍກ່ຽວກັບເກມ Castlevania: Dracula X
- ໃນສ່ວນຂອງລະຫັດ ຖ້າໃຜໃສ່ໄອຄອນຂວານໃນຊ່ອງຂວາລຸ່ມພຽງຊ່ອງດຽວ ແລ້ວປ່ອຍຊ່ອງອື່ນໆຫວ່າງໄວ້ ກໍຈະສາມາດຫຼິ້ນດ່ານສຸດທ້າຍໄດ້ທັນທີ ແລະຈະເປັນສາກຈົບແບບສົມບູນນຳ.
- ຖ້າຜູ້ຫຼິ້ນສາມາດຜ່ານດ່ານໃດດ່ານໜຶ່ງໄດ້ໂດຍບໍ່ຖືກໂຈມຕີຫຼືເສຍພະລັງຊີວິດເລີຍ ເມື່ອຈົບດ່ານແລະນັບຄະແນນ ເຮົາຈະໄດ້ໄອເທັມ 1UP ເພີ່ມຊີວິດໃຫ້ໂຕເຮົາ 1 ໂຕຟຣີໆທັນທີ.
- ຊ່ວງທ້າຍດ່ານ 3 ເຮົາຈະພົບກັບທຽນທີ່ໂຈມຕີແລ້ວໄດ້ກະແຈມາດອກໜຶ່ງ ເຊິ່ງກະແຈນີ້ຈະໃຊ້ໄຂປະຕູເພື່ອຊ່ອຍມາເຣຍແລະແອນເນັດໄດ້ ແລະຍັງມີຄວາມລັບອີກຢ່າງຄື ຖ້າຜູ້ຫຼິ້ນມີຈຳນວນຫົວໃຈຫຼາຍກວ່າ 15 ດວງ ເວລາກົດປຸ່ມເພື່ອໃຊ້ Item Crush ໃນຕອນທີ່ມີກະແຈ ໂຕເຮົາຈະລອຍຂຶ້ນກາງອາກາດໃນສະພາບຖືກະແຈນຳ ບ່ອນນີ້ຖ້າເຮົາກະໄລຍະດີໆ ໃຫ້ກະແຈໃນມືໄປຕຳຖືກໂຕສັດຕູ ພວກມັນຈະຕາຍທັນທີພຽງແຕ່ສຳຜັດຖືກ, ໂດຍກະແຈຖືເປັນອາວຸດເສີມທີ່ມີພະລັງໂຈມຕີສູງທີ່ສຸດໃນເກມ ແຖມຍັງບໍ່ເສຍຫົວໃຈໃນການກົດໃຊ້ Item Crush ອີກນຳ (ແຕ່ຈຳເປັນຕ້ອງມີຫົວໃຈ 15 ດວງກ່ອນຈຶ່ງຈະກົດໃຊ້ໄດ້)
- ຫາກຜູ້ຫຼິ້ນບໍ່ໄດ້ຖືອາວຸດເສີມ ຈຳພວກຂວານ, ມີດ, ໄມ້ກາງເຂນ ຫຼືນ້ຳມົນມາເລີຍ ແຕ່ມີຈຳນວນຫົວໃຈ 15 ດວງຂຶ້ນໄປ ກໍຈະສາມາດໃຊ້ແສ້ໄຟໄດ້ ໂດຍກົດປຸ່ມ Item Crush ເຊິ່ງຈະເປັນການໂຈມຕີດ້ວຍແສ້ໄຟໄປດ້ານໜ້າເກືອບສຸດຈໍພຽງເທື່ອດຽວ ແຕ່ຂໍ້ເສຍຄືມັນເປືອງຫຼາຍ ເຊິ່ງບໍ່ແນະນຳ.
ທີ່ມາ:online station