ຂປລ. ໃນໂອກາດ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງ ພັກປະຊາຊົນປະຕິວັດລາວ ໄດ້ໃຫ້ກຽດເຂົ້າຮ່ວມ ແລະ ໂອ້ລົມຕໍ່ກອງປະຊຸມ ວຽກງານກວດກາທົ່ວປະເທດ ຄັ້ງທີ III ໃນວັນທີ 20 ກໍລະກົດ 2016 ນີ້ ທີ່ຫ້ອງປະຊຸມໃຫຍ່ສູນກາງພັກ ພາຍຫລັງທີ່ໄດ້ດໍາເນີນມາເປັນເວລາ 3 ວັນ ໂດຍພາຍໃຕ້ການເປັນປະທານຂອງ ສະຫາຍ ພັນຄໍາ ວິພາວັນ ຜູ້ປະຈໍາການ ຄະນະເລຂາທິການສູນກາງພັກ, ມີບັນດາສະຫາຍກົມການເມືອງສູນກາງພັກ, ຄະນະເລຂາທິການສູນກາງພັກ, ກໍາມະການສູນກາງພັກ ແລະ ເລຂາຄະນະພັກກະຊວງ, ອົງການທຽບເທົ່າ, ນະຄອນຫລວງ ແລະ ແຂວງ ພ້ອມດ້ວຍພະນັກງານຫລັກແຫລ່ງເຂົ້າຮ່ວມ.
ໃນໂອກາດດັ່ງກ່າວ, ສະຫາຍ ບຸນຍັງ ວໍລະກິດ ໄດ້ຕີລາຄາສູງ ຕໍ່ການຈັດຕັ້ງປະຕິບັດວຽກງານກວດກາ ໃນໄລຍະ 5 ປີຜ່ານມາ ພ້ອມທັງໃຫ້ທິດຊີ້ນໍາຕໍ່ຄະນະນໍາ ແລະ ບັນດາສະຫາຍ ທີ່ເຮັດວຽກງານກວດກາ ໃຫ້ສືບຕໍ່ເອົາໃຈໃສ່ບາງບັນຫາ ເປັນຕົ້ນແມ່ນ ຕ້ອງມີຄວາມເປັນເອກະພາບເລິກເຊິ່ງ ຕໍ່ວຽກງານກວດກາໃນໄລຍະໃໝ່, ຕັດສິນໃຈເດັດຂາດ ໃນການຫັນປ່ຽນແບບບຸກທະລຸ ໃນດ້ານຈິນຕະນາການ ແລະ ການກະທໍາ, ການກວດກາຕ້ອງຮັບປະກັນຄວາມຖືກຕ້ອງ, ຕ້ອງປະຕິບັດຢ່າງເປັນລະບົບ ໃນການຈັດຕັ້ງຂອງພັກ ກໍຄືໃນອົງການລັດ ໃນນັ້ນຂັ້ນເທິງກວດກາຕໍ່ຂັ້ນລຸ່ມ ແລະ ຂັ້ນລຸ່ມ ມີສ່ວນຮ່ວມໃນການຕິດຕາມ ແລະ ສະເໜີຄວາມຄິດເຫັນຕໍ່ຂັ້ນເທິງ, ການຈັດຕັ້ງກວດກາຕໍ່ສະມາຊີກ ແລະ ອົງການກວດກາ ຕ້ອງດໍາເນີນການກວດກາຕໍ່ທຸກເປົ້າໝາຍ ຕາມພາລະບົດບາດທີ່ກໍານົດໄວ້, ບັນຫາເກີດຢູ່ບ່ອນໃດ ບ່ອນນັ້ນເປັນເຈົ້າການແກ້ໄຂ ນັ້ນແມ່ນທັດສະນະທີ່ຖືກຕ້ອງ, ຕ້ອງເປັນແບບຢ່າງ ໃນການເຮັດວຽກງານກວດກາ ແລະ ການປະຕິບັດຕາມ ຫລັກການກວດກາຂອງພັກ, ເປັນເຈົ້າການຕິດຕາມ, ກໍາແໜ້ນຕໍ່ພະນັກງານ ຢູພາຍໃຕ້ການຄຸ້ມຄອງຂອງຕົນ ເພື່ອຊຸກຍູ້, ກໍ່ສ້າງ, ສຶກສາອົບຮົມ, ນໍາໃຊ້ຢ່າງຖືກຕ້ອງ ເປັນການປ້ອງກັນບໍ່ໃຫ້ພະນັກງານກະທໍາຜິດ, ເອົາໃຈໃສ່ປັບປຸງທາງດ້ານການຈັດຕັ້ງ, ບຸກຄະລາກອນ ແລະ ລະບອບແບບແຜນວິທີເຮັດວຽກກວດກາ ເຊິ່ງເປັນສິ່ງທີ່ຕັດສິນໂດຍກົງ ເຖິງປະສິດທິຜົນຂອງວຽກງານກວດກາ, ຄະນະພັກແຕ່ລະຂັ້ນຕ້ອງເອົາໃຈໃສ່ຊີ້ນໍາ ເພື່ອເສີມຂະຫຍາຍບົດບາດຂອງ ແນວລາວສ້າງຊາດ ແລະ ຂອງບັນດາອົງການຈັດຕັ້ງມະຫາຊົນ ໃນການກວດກາ, ຖືເປັນກົນໄກສໍາຄັນ ເພື່ອໃຫ້ສັງຄົມມີສ່ວນຮ່ວມ ໃນການກວດກາ ເຊິ່ງໃຫ້ແຕ່ລະອົງການ ເອົາໃຈໃສ່ສຶກສາອົບຮົມດ້ານລະບຽບກົດໝາຍ ນັບທັງກົດລະບຽບຂອງພັກ, ບັນດານິຕິກໍາໃນການຄຸ້ມຄອງລັດ–ຄຸ້ມຄອງສັງຄົມ ທີ່ຈໍາເປັນໃຫ້ແກ່ສະມາຊິກຂອງຕົນ, ອົງການຈັດຕັ້ງກ່ຽວຂ້ອງ ນັບທັງອົງການກວດກາແຕ່ລະຂັ້ນຊາບ ແລະ ເປັນຂໍ້ມູນຕົວຈິງທີ່ເປັນປະໂຫຍດ, ເພີ່ມທະວີຄວາມຮັບຜິດຊອບຂອງຄະນະພັກ, ອົງການປົກຄອງແຕ່ລະຂັ້ນ ຕໍ່ກັບການຕົກລົງແກ້ໄຂ ຜົນຂອງການກວດກາໃຫ້ເຂັ້ມງວດ, ສັກສິດຕາມກົດລະບຽບຂອງພັກ ແລະ ກົດໝາຍ, ຖ້າກວດກາແລ້ວບໍ່ແກ້ໄຂ ຖືວ່າການກວດກາບໍ່ມີຄວາມໝາຍ, ຖືສໍາຄັນການຈັດຕັ້ງ ປະເມີນຜົນວຽກງານ ແລະ ຖອດຖອນບົດຮຽນພຶດຕິກໍາຕົວຈິງ ຢ່າງປົກກະຕິຕໍ່ເນື່ອງ ໃນການຈັດຕັ້ງປະຕິບັດບັນດາທິດທາງທີ່ວາງອອກໃນກອງປະຊຸມຄັ້ງນີ້ ຕ້ອງມີການປະເມີນຜົນເປັນແຕ່ລະໄລຍະ, ຈັດຕັ້ງຖອດຖອນບົດຮຽນເປັນປົກກະຕິ ຈາກນັ້ນດໍາເນີນການປັບປຸງ ດັດປັບແຜນເຄື່ອນໄຫວ ໃຫ້ສອດຄ່ອງກັບແຕ່ລະສະຖານະການ, ການເຄື່ອນໄຫວກວດກາ ຕ້ອງເປັນການເຄື່ອນໄຫວທີ່ກ້າຫານ, ອົດທົນ ແລະ ປະດິດສ້າງຢ່າງແທ້ຈິງ ຈຶ່ງຈະສາມາດຍົກສູງຄວາມສັກສິດຂອງວຽກງານ ທັງສ້າງຄວາມສະຫງົບ, ຄວາມເປັນລະບຽບ ແລະ ເພີ່ມທະວີຄວາມສາມັກຄີເປັນປຶກແຜ່ນຢູ່ພາຍໃນ ບົນພື້ນຖານຫລັກການຈັດຕັ້ງ ນໍາພາຂອງພັກ ແລະ ກົດໝາຍຂອງລັດ.
ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!