ໃນໂອກາດລະນຶກວັນສ້າງຕັ້ງ ສາຍພົວພັນການທູດ ລະຫວ່າງ ສປປ ລາວ ແລະ ມາເລເຊຍ ຄົບຮອບ 50 ປີ, ເມື່ອທ້າຍອາທິດຜ່ານມານີ້, ກະຊວງສາທາລະນະສຸກ ໄດ້ຮ່ວມກັບສະຖານທູດມາເລເຊຍ ປະຈຳລາວ ແລະ ພາກສ່ວນກ່ຽວຂ້ອງອື່ນໆ ຈັດກິດຈະກຳກວດເຊັກສຸຂະພາບ ໃຫ້ປະຊາຊົນບ້ານໂພນສະຫວັນໃຕ້, ເມືອງສີໂຄດຕະບອງ ນະຄອນຫລວງວຽງຈັນ, ໂດຍບໍ່ເສຍຄ່າໃດໆ ໂດຍການເຂົ້າຮ່ວມເປີດພິທີຂອງ ທ່ານຮອງລັດຖະມົນຕີກະຊວງສາທາລະນະສຸກ ແລະ ທ່ານເອກອັກຄະລັດຖະທູດດັ່ງກ່າວ ເຂົ້າຮ່ວມນຳດ້ວຍ.
ການບໍລິການກວດເຊັກສຸຂະພາບ ໂດຍບໍ່ເສຍຄ່າຄັ້ງນີ້, ໂດຍໄດ້ເຊີນເອົານັກສຶກສາ ຈາກມະຫາວິທະຍາໄລ ວິທະຍາສາດສຸຂະພາບຂອງລາວ ມາໃຫ້ຄຳປຶກສາ ແລະ ກວດເຊັກສຸຂະພາບດັ່ງກ່າວ ແລະ ກໍຖືໂອກາດນີ້ ໃຫ້ນັກສຶກສາທັງສອງມະຫາວິທະຍາໄລ ໄດ້ແລກປ່ຽນບົດຮຽນ ແລະ ປະສົບການຕ່າງໆ ໃນວຽກງານການແພດ ເພື່ອຍົກສູງຄວາມຮູ້, ຄວາມສາມາດໃນວຽກງານວິຊາສະເພາະຂອງຕົນ. ນອກຈາກກິດຈະກຳດັ່ງກ່າວແລ້ວ ນັກສຶກສາຈາກປະເທດມາເລເຊຍ ຍັງໄດ້ມອບເຄື່ອງນຸ່ງຫົ່ມຈຳນວນໜຶ່ງ ທີ່ໄດ້ຈາກການສະໜັບສະໜູນຂອງປະເທດ ມາມອບໃຫ້ປະຊາຊົນຜູ້ທຸກຍາກ ແລະ ຂາດເຂີນ ຢູ່ໃນເຂດຊົນນະບົດຫ່າງໄກສອກຫລີກຂອງລາວອີກດ້ວຍ.
ໃນໂອກາດນີ້ ທ່ານຮອງລັດຖະມົນຕີກະຊວງສາທາ ໄດ້ມີຄຳເຫັນໃນພິທີວ່າ: ໄລຍະຜ່ານມາ, ສປປ ລາວ ແລະ ມາເລເຊຍ ໄດ້ມີການພົວພັນຮ່ວມມື ຊ່ວຍເຫລືອຊຶ່ງກັນ ແລະ ກັນ ໃນຫລາຍຂົງເຂດຄື: ດ້ານການຄ້າ, ການລົງທຶນ, ການປ້ອງກັນຊາດ ແລະ ວັດທະນະທຳ-ສັງຄົມ, ໂດຍສະເພາະແມ່ນ ໃນຂອບການຮ່ວມມື ຂອງບັນດາປະເທດອາຊຽນ ແລະ ການຮ່ວມກັນເຮັດກິດຈະກຳຄັ້ງນີ້, ຊຶ່ງເປັນກິດຈະກຳໜຶ່ງ ທີ່ປະກອບສ່ວນເສີມຂະຫຍາຍການຮ່ວມມື ໃນຂົງເຂດວຽກງານສາທາລະນະສຸກລາວ-ມາເລເຊຍ ໃຫ້ກວ້າງຂວາງ ແລະ ກ້າວສູ່ລວງເລິກ.
ແຫລ່ງຂ່າວ:
ສຳຫຼັບທ່ານທີ່ຮັກສຸຂະພາບ ຕິດຕາມເລື່ອງດີດີ ກົດໄລຄ໌ເລີຍ!