ການດັດສົມໂຮງງານໃຫ້ໄດ້ມາດຕະຖານ ແລະປັບປຸງເພື່ອຂະຫຍາຍການຜະລິດຈາກໂຮງງານຂະໜາດນ້ອຍມາເປັນໂຮງງານຂະໜາດກາງ ແລະໃຫຍ່ ໄດ້ເຮັດໃຫ້ໂຮງງານຂະໜາດນ້ອຍ ແລະ ຄອບຄົວຢູ່ລາວມີຈຳນວນຫຼຸດລົງ ຂະນະທີ່ປະຈຸບັນທົ່ວປະເທດມີໂຮງງານຂະໜາດນ້ອຍທັງໝົດ 6 ພັນກວ່າແຫ່ງ ສ່ວນແບບຄອບຄົວມີ 21 ພັນກວ່າແຫ່ງ ຈາກຈຳນວນໂຮງງານທຸກຂະໜາດມີທັງໝົດເກືອບ 30 ພັນກວ່າແຫ່ງໃນທົ່ວປະເທດ.
ວັນທີ 18-19 ກໍລະກົດ 2016 ທີ່ນະຄອນຫຼວງວຽງຈັນ ມີການຈັດກອງປະຊຸມປະຈຳປີ 2016 ຂອງຂະແໜງອຸດ ສາຫະກຳ ແລະການຄ້າ (ອຄ) ຂຶ້ນ ໂດຍເຂົ້າຮ່ວມເປັນປະທານຂອງທ່ານ ນາງ ເຂັມມະນີ ພົນເສນາ ລັດຖະມົນ
ຕິກະຊວງອຸດສາຫະກຳ ແລະການຄ້າ, ບັນດາຮອງລັດຖະມົນຕີ, ພ້ອມດ້ວຍຜູ້ແທນພະແນກອຸດສາຫະກຳ ແລະການຄ້າທີ່ມາຈາກ 18 ແຂວງທົ່ວປະເທດ ແລະກະຊວງກ່ຽວຂ້ອງເຂົ້າຮ່ວມ.
ທ່ານ ນາງ ເຂັມມະນີ ພົນເສນາ ໄດ້ກ່າວວ່າ: ການຈັດຕັ້ງປະຕິບັດວຽກງານໃນໄລຍະຜ່ານມາໂດຍສະເພາະສົກປີ 2014-2015 ຊຶ່ງເຫັນວ່າຍອດມູນຄ່າ ການຜະລິດອຸດສາຫະກຳປຸງແຕ່ງ ແລະ ຫັດຖະກຳທົ່ວປະເທດປະຕິບັດໄດ້ 5.462ຕື້ກີບ, ຖ້າທຽບໃສ່ສົກປີ 2013-2014 ອັດຕາການຂະຫຍາຍຕົວສະເລ່ຍ 1,2% ໃນນີ້ ອຸດສາຫະກຳທີ່ເດັ່ນກວ່າໝູ່ແມ່ນ ອຸດສາຫະກຳຜະລິດເຄື່ອງດື່ມກວມເອົາ 42,98%, ຜະລິດຕະພັນສະບຽງອາຫານກວມ 21,27%, ການປະກອບລົດໃຫຍ່, ລົດຈັກ ແລະຜະລິດອາໄຫຼ່ຕ່າງໆ ກວມ 5,9%, ການຜະລິດຜະລິດຕະພັນຈາກແຮ່ທາດທີ່ບໍ່ແມ່ນໂລຫະກວມ 4,6%, ພ້ອມນີ້, ໄດ້ເອົາໃຈໃສ່ໃນການຈັດຕັ້ງ ແລະປັບປຸງນິຕິກຳໃຫ້ສອດຄ່ອງກັບສະພາບຕົວຈິງ ເພື່ອອຳນວຍຄວາມສະດວກໃຫ້ແກ່ພາກທຸລະກິດ, ດັດສົມໂຮງງານ, ພັດທະນາເຂດ ແລະນິຄົມອຸດສາຫະກຳໃນຂອບເຂດທົ່ວປະເທດ.
ຊຶ່ງມາຮອດປະຈຸບັນໂຮງງານອຸດ ສາຫະກຳປຸງແຕ່ງທົ່ວປະເທດມີມັງໝົດ 29.628 ແຫ່ງ, ໃນນີ້ ໂຮງງານຂະໜາດ ໃຫຍ່ 714 ແຫ່ງ, ຂະໜາດກາງ 1.043 ແຫ່ງ, ໂຮງງານຂະໜາດນ້ອຍ 6.686 ແຫ່ງ ແລະອຸດສາຫະກຳແບບຄອບຄົວ ຈຳນວນ 21.185 ແຫ່ງ, ທຽບໃສ່ສົກ ປີ 2014-2015 ເຫັນວ່າ ມີທ່າອ່ຽງຫຼຸດລົງຂອງໂຮງງານອຸດສາຫະກຳຂະໜາດນ້ອຍ ແລະອຸດສາຫະກຳແບບຄອບຄົວ, ເນື່ອງຈາກການດັດສົມໂຮງງານໃຫ້ໄດ້ ມາດຕະຖານ ແລະປັບປຸງເພື່ອຂະຫຍາຍ ການຜະລິດຈາກໂຮງງານຂະໜາດນ້ອຍ ມາເປັນໂຮງງານຂະໜາດກາງ ແລະໃຫຍ່.
ພ້ອມນັ້ນການຊຸກຍູ້ ແລະສົ່ງເສີມການຜະລິດເປັນສິນຄ້າ ກໍເປັນຂະບວນຟົດຟື້ນ ໂດຍສະເພາະຂະແໜງທີ່ເປັນທ່າແຮງເຊັ່ນ: ອຸດສາຫະກຳປຸງແຕ່ງໄມ້, ສະບຽງອາຫານ, ວັດສະດຸກໍ່ສ້າງ, ຕັດຫຍິບ, ຫັດຖະກຳ, ຕ່ຳຫູກ, ສິນຄ້າກະສິກຳ ແລະອື່ນໆ.
ໂດຍສະແດງອອກໃນລວມຍອດຜະ ລິດຕະພັນພາຍໃນຂອງຂະແໜງການຄ້າ ຂາຍຍົກ-ຂາຍຍ່ອຍ ແລະສ້ອມແປງລວມທັງໝົດ 8.792 ຕື້ກີບ, ເພີ່ມຂຶ້ນ 9% ທຽບໃສ່ສົກປີຜ່ານມາມູນຄ່າດັ່ງກ່າວກວມອັດຕາສ່ວນ 49% ຂອງຂະແໜງບໍລິການ ແລະກວມເອົາ 19,8% ຂອງ GDP ຂັ້ນ ຂອດກໍເຫັນວ່າເອື້ອອຳນວຍຫຼາຍຂຶ້ນ, ການຄຸ້ມຄອງທຸລະກິດເຫັນວ່າເຂົ້າສູ່ລະບຽບກົດໝາຍຫຼາຍຂຶ້ນ, ຜູ້ປະກອບກິດຈະ ການມີຄວາມຮັບຮູ້, ເຂົ້າໃຈເຖິງສະພາບການແຂ່ງຂັນການຕະຫຼາດ ໂດຍສະເພາະການເຂົ້າສູ່ປະຊາຄົມເສດຖະກິດອາຊຽນຊຶ່ງສາມາດຕີລາຄາໄດ້ຈາກການລົງທຶນໃນຂະແໜງອຸດສາຫະກຳ ແລະການຄ້າ, ການຄົ້ນຄວ້າສ້າງ ແລະປັບປຸງກົດໝາຍ, ນິຕິກຳ, ແລະນະໂຍບາຍ, ການຄົ້ນຄວ້າວິທະຍາສາດ ແລະວິທະຍາການ, ການພັດທະນາຊັບພະຍາກອນມະນຸດ, ການຕິດຕາມກວດກາ ແລະປະເມີນ, ການຄຸ້ມຄອງລາຄາສິນຄ້າ, ການປະຕິບັດຄຳສັ່ງ ເລກທີ 15/ນຍ ເຫຼົ່ານີ້ເປັນຕົ້ນ.
ທ່ານ ນາງ ເຂັມມະນີ ພົນເສນາ ຍັງໃຫ້ຮູ້ຕື່ມວ່າ: ຜ່ານການປະຕິບັດວຽກງານຂະແໜງການຄ້າໃນໄລຍະຜ່ານມາ ກໍຍັງມີບາງຈຸດອ່ອນ ແລະຂໍ້ຄົງຄ້າງຢູ່, ດັ່ງນັ້ນ ເພື່ອເປັນການປັບປຸງ ແລະແກ້ໄຂຈຸດຄົງຄ້າງຕື່ມໃນ 5 ປີຂ້າງໜ້າ ຂະແໜງອຸດສາຫະກຳ ແລະການຄ້າ ຈະໄດ້ເອົາໃຈໃສ່ປະກອບສ່ວນໃນການປະຕິບັດ 7 ຍຸດທະສາດບູລິມະສິດໃຫ້ມີປະສິດທິພາບ ແລະສືບຕໍ່ຊຸກຍູ້ການລົງທຶນໃນຂະແໜງອຸດສາຫະກຳ ແລະການຄ້າ, ການຄົ້ນຄວ້າສ້າງ ແລະປັບປຸງກົດໝາຍ, ນິຕິກຳ ແລະນະໂຍບາຍ, ການຄົ້ນຄວ້າວິທະຍາສາດ ແລະວິທະຍາການ, ການພັດທະນາຊັບພະຍາກອນມະນຸດ, ການຕິດຕາມກວດກາ ແລະປະເມີນ, ການຄຸ້ມຄອງລາຄາສິນຄ້າ ແລະເອົາໃຈໃສ່ປະຕິບັດຄຳສັ່ງເລກທີ 15/ນຍ ໃຫ້ເກີດຜົນຫຼາຍທີ່ສຸດ.
ທີ່ມາ: ເສດຖະກິດ-ສັງຄົມ