ກະຊວງການເງິນຈີນຖະແຫຼງວ່າ ລັດຖະບານໄດ້ຈັດສັນງົບປະມານ 199 ລ້ານຢວນ ໃຫ້ແກ່ໂຄງການປ່ຽນແປງສະພາບອາກາດ ພາຍໃຕ້ນະໂຍບາຍຕໍ່ສູ້ກັບພາວະໄພແຫ້ງແລ້ງ ແລະ ຫຼຸດຜ່ອນຜົນກະທົບຈາກໄພພິບັດທາງທຳມະຊາດ ຫຼັງຈາກມີລາຍງານປະຊາຊົນເສຍຊີວິດຈາກອຸທົກກະໄພ 237 ຄົນ.
ກະຊວງການເງິນລະບຸວ່າ ໃນບ້ວງເງິນດັ່ງກ່າວ ຈະນຳໄປຊ່ວຍພື້ນທີ່ຕ່າງໆຮັບມືກັບສະພາບອາກາດຮຸນແຮງທີ່ເກີດຂຶ້ນຫຼາຍຄັ້ງໃນປີນີ້ເປັນຕົ້ນ: ນ້ຳຖ້ວມທາງພາກໃຕ້-ພາກກາງ ແລະ ໄພແຫ້ງແລ້ງທາງພາກຕາເວັນຕົກສຽງເໜືອ ປັດຈຸບັນຈີນໃຊ້ເຕັກໂນໂລຊີປ່ຽນແປງພາບອາກາດເຊັ່ນ: ຫວ່ານສານເຄມີເຂົ້າໄປໃນເມເພື່ອເຮັດຝົນທຽມໃນໄລຍະແຫ້ງແລ້ງ ແລະ ເຮັດໃຫ້ສະພາບອາກາດປອດໂປ່ງ ຈີນເຄີຍລະບຸໃນເອກະສານທີ່ເຜີຍແພ່ໃນປີກ່ອນວ່າ ຈະໃຊ້ເຕັກໂນໂລຊີປ່ຽນແປງສະພາບອາກາດເຮັດຝົນທຽມປີລະ 60 ຕື້ແມັດກ້ອນພາຍໃນປີ 2020.
ສຳນັກຂ່າວຊິນຮວາລາຍງານວ່າ ຕຳຫຼວດໄດ້ທຳລາຍເຂື່ອນແຫ່ງໜຶ່ງໃນມົນທົນຫູເປ່ຍ ທາງຕອນກາງຂອງປະເທດໃນທ້າຍອາທິດທີ່ຜ່ານມາ ເພື່ອບັນເທົານ້ຳຖ້ວມຂັງທີ່ເກີດຈາກຝົນຕົກໜັກຫຼາຍມື້ ຂະນະມີລາຍງານວ່າ ນັບຈົນເຖິງວັນທີ 13 ກໍລະກົດມີຜູ້ເສຍຊີວິດເພາະນ້ຳຖ້ວມແລ້ວ 237 ຄົນ ສູນຫາຍ 93 ຄົນ ແລະ ສະຖານະການນີ້ຍັງໜັກຢູ່.