ຈາກຂໍ້ມູນຫຼ້າສຸດໃນອາທິດນີ້ບໍລິສັດ Nokia ກຳລັງກຽມທີ່ຈະປ່ອຍສະມາດໂຟນ 2 ລຸ້ນລົງສູ່ຕະຫຼາດໃນໄວໆນີ້. ໂດຍອີງຕາມລາຍງານທີ່ວ່າໂທລະສັບລຸ້ນດັ່ງກ່າວຈະສ້າງບົນພື້ນຖານ Nokia Mobile Phones ແຕ່ຈະຜະລິດໂດຍ HMD global Oy. ເມື່ອຍ້ອນກັບໄປຕອນທີ່ HMD Global Oy ປະກາດໃນວັນທີ 18 ພຶດສະພາ 2016 ວ່າໄດ້ເຂົ້າຊື້ທຸລະກິດຟີເຈີໂຟນທີ່ເປັນສ່ວນໜຶ່ງຈາກ Microsoft Mobile ແລະກໍຈະເຂົ້າມາເປັນຜູ້ຜະລິດໂທລະສັບແລະແທັບເລັດພາຍໃຕ້ແບຣນ Nokia ໃນອະນາຄົດນີ້.
ສຳລັບຂໍ້ມູນໂທລະສັບທັງ 2 ລຸ້ນທີ່ຫຼຸດອອກມາບອກເຖິງ ໜ້າຈໍທີ່ຈະນຳມາໃຊ້ຄື: ລຸ້ນນ້ອຍສຸດຈະໃຊ້ຈໍຂະໜາດ 5.2 ແລະລຸ້ນໃຫຍ່ສຸດຈະໃຊ້ຈໍຂະໜາດ 5.5 ນິ້ວ. ໂດຍທີ່ທັງສອງນັ້ນຈະໃຊ້ຄວາມລະອຽດຈໍດຽວກັນຄື 2K ແລະຈະຄອບທັບດ້ວຍລະບົບ Z-Launcher UI ທີ່ສ້າງບົນພື້ນຖານ Android 7.0 Nougat (Android N).
ສ່ວນທາງດ້ານສະເປັກທັງສອງເຄື່ອງຈະໃຊ້ຊິບເຊັດ Snapdragon 820, ໂດຍໂຕເຄື່ອງນັ້ນຈະເປັນແບບໂລຫະໝົດໂຕ ແລະມາພ້ອມກັບມາດຕະຖານ IP68 ທີ່ສາມາດກັນນ້ຳ ແລະຝຸ່ນໄດ້. ຖ້າຫາກອີງຕາມຂ່າວທີ່ຫຼຸດອອກມາກ່ອນໜ້ານີ້ໂທລະສັບຈາກ Nokia ຈະມາພ້ອມກັບກ້ອງຄວາມລະອຽດສູງເຖິງ 22.6 ລ້ານພິກເຊວ ແລະຈະວາງຈຳໜ່າຍໃນລາຄາປະມານ 3000 ຢວນ (3.650.000 ກີບ).
ທີ່ມາ:gizmochina