ລັດອະນຸຍາດໃຫ້ພຽງ 38 ໂຮງ ງານທີ່ນອນໃນ 6 ແຂວງພາກກາງ ແລະ ໃຕ້ສົ່ງອອກຜະລິດຕະພັນໄມ້ປອກ ແລະ ໄມ້ຝານທີ່ຍັງຕົກຄ້າງຢູ່ໂຮງງານ 12 ພັນກວ່າແມັດກ້ອນ ໂດຍນອກຈາກຈຳນວນນີ້ແລ້ວ ລັດບໍ່ອະນຸຍາດໃຫ້ຜະລິດ ແລະ ສົ່ງອອກອີກ.
ທ່ານ ຈະເລີນ ເຢຍປາວເຮີ ລັດຖະມົນຕີປະຈຳສຳນັກງານນາຍົກລັດຖະມົນຕີ, ໂຄສົກລັດຖະບານໄດ້ຖະແຫຼງຂ່າວຕໍ່ສື່ມວນຊົນໃນວັນທີ 15 ກໍລະກົດ 2016 ກ່ຽວກັບການແກ້ໄຂຜະລິດຕະພັນໄມ້ປອກ-ໄມ້ຝານວ່າ: ເພື່ອຄວາມກະຈ່າງ ແຈ້ງ ແລະເຂົ້າໃຈຢ່າງຖືກຕ້ອງຂອງພໍ່ ແມ່ປະຊາຊົນບັນດາເຜົ່າ ແລະຜູ້ປະກອບການທຸລະກິດໄມ້ທົ່ວປະເທດໄດ້ຮັບຊາບຕາມຄວາມເປັນຈິງ.
ກອງປະຊຸມນາຍົກ-ຮອງນາຍົກລັດຖະມົນຕີໄດ້ພິຈາລະນາ ແລະຊີ້ນຳແກ້ໄຂບັນຫາຜະລິດຕະພັນໄມ້ປອກ-ໄມ້ຝານທີ່ ຍັງຕົກຄ້າງ ໂດຍເຫັນດີໃຫ້ກວດກາຄືນລະຫັດໄມ້ປອກ-ໄມ້ຝານທີ່ຍັງຕົກຄ້າງຢູ່ບັນດາໂຮງງານຕ່າງໆ ເພື່ອສົ່ງອອກ, ໂດຍມອບໃຫ້ກະຊວງອຸດສາຫະກຳ ແລະ ການຄ້າ ແລະກະຊວງກະສິກຳ ແລະປ່າໄມ້ເປັນເຈົ້າການສົມທົບກະພາກສ່ວນ ທີ່ກ່ຽວຂ້ອງກວດເບິ່ງຄືນສັນຍາ ແລະຂຶ້ນ ບັນຊີຈຳນວນໄມ້ແຕ່ລະປະເພດທີ່ຍັງຕົກຄ້າງຢູ່ໃຫ້ລະອຽດ ແລະຊັດເຈນແລ້ວຈິ່ງ ຂໍອະນຸຍາດໃຫ້ສົ່ງອອກ ແລະສົ່ງອອກໃນຈຳນວນທີ່ມີໃນໂຮງງານເທົ່ານັ້ນ.
ຜ່ານການກວດກາຕົວຈິງຂອງກະຊວງອຸດສາຫະກຳ ແລະການຄ້າ, ກະຊວງກະສິກຳ ແລະປ່າໄມ້ ໂດຍສົມທົບກັບພາກ ສ່ວນທີ່ກ່ຽວຂ້ອງເຫັນວ່າຈຳນວນໂຮງ ງານທີ່ຜະລິດໄມ້ປອກ ແລະໄມ້ຝານທົ່ວ ປະເທດມີຈຳນວນ 47 ໂຮງງານ ໃນນີ້ ໂຮງງານທີ່ໄດ້ຜະລິດ ແລະຍັງບໍ່ທັນໄດ້ ສົ່ງອອກຜະລິດຕະພັນໄມ້ປອກ-ໄມ້ຝານ ມີ 38 ໂຮງງານໃນ 6 ແຂວງຄືແຂວງສາລະວັນ, ອັດຕະປື, ຈຳປາສັກ, ສະຫວັນນະເຂດ, ຄຳມ່ວນ ແລະແຂວງບໍລິຄຳໄຊ ຊຶ່ງມີບໍລິມາດຜະລິດຕະພັນໄມ້ປອກ-ໄມ້ ຝານ ທີ່ຍັງບໍ່ທັນສົ່ງອອກ 12.456 ກວ່າ ແມັດກ້ອນ ໂດຍຈຳນວນດັ່ງກ່າວແມ່ນ ກຳລັງຂໍອະນຸຍາດຈາກລັດຖະບານ ເພື່ອ ສົ່ງອອກຫຼາຍຄວາມວ່າ ນອກຈາກຈຳ ນວນນີ້ແລ້ວແມ່ນບໍ່ອະນຸຍາດໃຫ້ຜະລິດ ແລະສົ່ງອອກອີກ.
ຜະລິດຕະພັນໄມ້ປອກ-ໄມ້ຝານແມ່ນ ຜະລິດຕະພັນໄມ້ຈາກໂຮງງານປຸງແຕ່ງ ໄມ້ທີ່ຜ່ານຂະບວນການປອກ ຫຼື ຝານ ຊຶ່ງນຳໃຊ້ວັດຖຸດິບຈາກໄມ້ທ່ອນ, ຜະລິດຕະພັນດັ່ງກ່າວມີມູນຄ່າປານກາງສາມາດສະໜອງໃຫ້ໂຮງງານປຸງແຕ່ງໄມ້ ເພື່ອສືບຕໍ່ປຸງແຕ່ງເປັນຜະລິດຕະພັນສຳເລັດຮູບເປັນຕົ້ນໄມ້ອັດ, ແຜ່ນໄມ້, ແຜ່ນໜ້າໂຕະ ແລະອື່ນໆ ຊຶ່ງຜະລິດຕະພັນໄມ້ປອກ (ວິເນຍ) ແລະໄມ້ຝານ (ສະໄລຊິງ) ແມ່ນຜະລິດຕະພັນໄມ້ຕາມການກຳນົດຂອງສາກົນ ISIC (ເລກລະຫັດກິດຈະ ການແມ່ນ 1621) ມີລະຫັດສິນຄ້າ 4408 ຕາມຂໍ້ກຳນົດໃນຂໍ້ຕົກລົງ 2005/ອຄ.ກອຫ ລົງວັນທີ 28 ກັນຍາ 2015 ຂອງກະຊວງອຸດສາຫະກຳ ແລະການຄ້າ ວ່າດ້ວຍຜະລິດຕະພັນໄມ້ ໂດຍຜະລິດຕະ ພັນໄມ້ປອກ ແລະໄມ້ຝານມີຄວາມໜາ ແຕ່ 0,1-0,5 ມິລິແມັດ, ກວ້າງ 1,20 ຊັງຕີແມັດ ແລະຍາວ 2,50 ຊັງຕີແມັດ ສຳລັບການນຳໃຊ້ວັດຖຸດິບແມ່ນນຳໃຊ້ໄມ້ປະເພດເນື້ອອ່ອນ ຊຶ່ງເປັນໄມ້ຄຸ້ມຄອງ 1, 2, 3 ເປັນຕົ້ນໄມ້ຍາງ, ໄມ້ຊີ, ໄມ້ ບາກ ແລະອື່ນໆ.
ນອກຈາກບັນຫາໄມ້ປອກ-ໄມ້ຝານແລ້ວ ກອງປະຊຸມນາຍົກ-ຮອງນາຍົກລັດ ຖະມົນຕີຍັງໄດ້ຊີ້ນຳໃຫ້ກະຊວງກ່ຽວ ຂ້ອງຮີບຮ້ອນຄົ້ນຄວ້າ, ສະເໜີທິດທາງ ແລະວິທີແກ້ໄຂກ່ຽວກັບໄມ້ປູກ ເພື່ອໃຫ້ລັດຖະບານພິຈາລະນາຕົກລົງຕາມຄວາມເໝາະສົມ.
ທີ່ມາ: ເສດຖະກິດ-ສັງຄົມ