ຫຼ້າສຸດນີ້ຜູ້ໃຊ້ງານຈາກເວັບໄຊ Weibo ນາມວ່າ @KJuma ໄດ້ໂພສຮູບພາບໂທລະສັບລຸ້ນໃໝ່ຂອງ LeEco ລົງແລະໄດ້ບອກວ່າຮູບເຫຼົ່ານີ້ແມ່ນຫຼຸດມາຈາກພະນັກງານພາຍໃນບໍລິສັດ.
ສຳລັບຮູບທີ່ຫຼຸດອອກມານີ້ຈະເຫັນໄດ້ວ່າມີການອອກແບບໃນສ່ວນຂອງເລນກ້ອງມາແນວໃໝ່ ໂດຍເປັນກ້ອງຫຼັງແບບຄູ່ ວາງໄວ້ຫ່າງກັນໜ້ອຍໜຶ່ງ ແລະແຟລັດ LED ທີ່ວາງໄວ້ລະຫວ່າງກາງຂອງກ້ອງດ້ານລຸ່ມ ແຖມຍັງມີໂລຫະວົງມົນອ້ອມຮອບໄວ້ ເຮັດໃຫ້ໜ້າຕາອອກຕະຫຼົກຯ ແດ່ ເບິ່ງຄືກັນກັບ ໜ້າຂອງວິນຍານຕົ້ນໄມ້ຍີ່ປຸ່ນ ຈາກອະນິເມະເລີຍ 55+
ຖັດຈາກດ້ານລຸ່ມຂອງກ້ອງຫຼັງແລ້ວກໍຍັງມີເຊັນເຊີ້ສະແກນນິ້ວມື ແລະມີຮູບໂລໂກ້ຂອງ LeEco ຕິດຢູ່.
ສ່ວນໂຕເຄື່ອງຂອງໂທລະສັບລຸ້ນນີ້ຈະເປັນແບບໂລຫະໝົດໂຕ ແລະການອອກແບບຈະຄ້າຍໆກັນກັບ Meizu Pro 6.
ໂທລະສັບລຸ້ນນີ້ຍັງມາພ້ອມກັບຈໍໂຄ້ງ 2.5D ແລະຂອບເສັ້ນດຳທີ່ບາງລົງ. LeEco ຍັງໄດ້ມີການປ່ຽນແປງການອອກແບບຂອງປຸ່ມ capacitive ໂດຍການແທນທີ່ປຸ່ມທາງກາງດ້ວຍໂລໂກ້ຂອງ LeEco.
ສຳລັບຂໍ້ມູນຂອງໂຕເຄື່ອງໃນຕອນນີ້ນັ້ນຍັງບໍ່ທັນມີຫຼາຍເທື່ອ ເຊັ່ນ: RAM, ROM ຫຼືແມ້ແຕ່ຊິບປະມວນຜົນກໍຍັງບໍ່ມີການລາຍງານອອກມາແຕ່ຢ່າງໃດ, ແຕ່ກໍຄາດວ່າອາດຈະໃຊ້ຊິບເຊັດໂຕໃໝ່ແບບ Snapdragon 821 ກໍເປັນໄດ້.
ທີ່ມາ:gizmochina