ນັກຂ່າວລາວໂພສຕ໌ປະຈຳເມືອງຫົງສາ ໄດ້ແຈ້ງວ່າເຈ້າໜ້າທີ່ ປກສ ເມືອງຫົງສາ ຈັບຜູ້ຮ່ວມຂະບວນການຄ້າຂາຍຢາ ເສບຕິດໄດ້ 3 ຄົນ ຈໍານວນ 3.000 ເມັດ
ໃນສັງຄົມປະຈຸບັນ ບັນຫາຢາເສບຕິດແມ່ນໄດ້ແພ່ລະບາດຢ່າງກວ້າງຂວາງ ຊຶ່ງບັນຫາດັ່ງກ່າວ ໄດ້ສ້າງຄວາມບໍ່ສະຫງົບ ແລະ ຄວາມບໍ່ເປັນລະບຽບຮຽບຮ້ອຍໃຫ້ແກ່ສັງຄົມ ເຖິງວ່າເຈົ້າໜ້າທີ່ພວກເຮົາໄດ້ເອົາໃຈໃສ່ເລີກຮື້ ແລະ ແກ້ໄຂຢ່າງຕັ້ງໜ້າກໍຕາມມັນກໍຍັງເກີດຂຶ້ນຢູ່.
ໃນວັນທີ 06 ເດືອນກໍລະກົດ 2016 ທີີ່ຜ່ານມານີ້, ເຈົ້າໜ້າທີ່ ສະກັດກັ້ນກອງຄະດີ ປກສ ເມືອງຫົງສາ ແຂວງໄຊຍະບູລີ ໄດ້ກັກຕົວຜູ້ຄ້າຂາຍຢາເສບຕິດປະເພດຢາບ້າ ຈໍານວນ 3 ຄົນຄື: ນາງ ພອນ ພອນສີວັນ ອາຍຸ 56 ປີ ແລະ ທ້າວ ບຸນໝອມ ພອນສີວັນ ອາຍຸ 25 ປີ (ເປັນສອງແມ່ລູກ) ອາຊີບຊາວສວນ, ຄົນເຜົ່າກຶມມຸ ປະຊາຊົນບ້ານປາກແບງ ເມືອງ ປາກແບງ ແຂວງ ອຸດົມໄຊ ພ້ອມຂອງກາງຢາບ້າ, ລົດຈັກຍີ່ຫໍ້ຄຼິກ ສີ ຂາວ-ດຳ 1 ຄັນ ບໍ່ມີທະບຽນ, ໂທລະສັບ 3 ໜ່ວຍ, ສາຍຄໍຄຳ 2 ບາດ (ເປັນທອງຄ້າຍຄືຄຳ), ເງິນໝັນ 2 ໝັນ ແລະ ທ້າວ ລາວເກີວາ ອາຍຸ 28 ປີ, ອາຊີບຊາວສວນ, ຄົນເຜົ່າມົ້ງ, ປະຊາຊົນບ້ານພຽນຫຍ້າ ເມືອງຮຸນ ແຂວງ ອຸດົມໄຊ ພ້ອມລົດຈັກເວບ ສີດຳ-ແດງ ບໍ່ມີທະບຽນ, ໂທລະສັບ 1 ໜ່ວຍ ເປັນຜູ່ຮ່ວມຂະບວນການຄ້າຂາຍຢາເສບຕິດ.
ຜ່ານການສືບສວນ-ສອບສວນຜູ້ຖືກຫາທັງສອງແມ່ລູກ ໄດ້ໃຫ້ການສາລະພາບຕໍ່ເຈົ້າໜ້າທີວ່າ: ຕົນເອງໄດ້ໄປຊື້ຢາບ້ານຳທ້າວ ລາວເກີ ວາ ປະຊາຊົນບ້ານພຽນຫຍ້າ ເມືອງຮຸນ ແຂວງ ອຸດົມໄຊ ຈໍານວນ 15 ຖົງ ຫຼື ເທົ່າກັບ 3.000 ເມັດ, ຕົກເປັນເງິນ ຈຳນວນ 18,000,000 ກີບ. ແລ້ວສອງແມ່ລູກກໍ່ໄດ້ນຳເອົາຢາບ້າທີ່ຊື້ມານັ້ນ, ໄປສົ່ງໃຫ້ລູກຄ້າຢູ່ທີ່ເມືອງຫົງສາ ໂດຍບໍ່ຮູ້ຊື່. ພໍຂີ່ລົດຈັກມາຮອດໜ້າເດີນກິລາເມືອງໆ ເງິນ ທາງເຈົ້າໜ້າທີເມືອງຫົງສາ-ເມືອງເງິນ ຈຶ່ງເຂົ້າຈັບກຸ້ມສອງແມ່ລູກດັ່ງກ່າວໄວ້ ແລ້ວຄຸມຕົວມາດຳເນີນການສືບສວນ-ສອບສວນຢູ່ ປກສ ເມືອງຫົງສາເພື່ອຫາຜູ່ຮ່ວມຂະບວນການ.
ຕົກມາວັນທີ 7 ຂອງເດືອນດຽວກັນ ເມືອເຈົ້າໜ້າທີສືບຮູ້ວ່າ: ຢາເສບຕິດດັ່ງກ່າວ, ແມ່ນໄດ້ຈາກ ທ້າວ ລາວເກີ ວາ ອາຍຸ 28 ປີ, ອາຊີບຊາວສວນ, ຄົນເຜົ່າມົ້ງ, ປະຊາຊົນບ້ານພຽນຫຍ້າ ເມືອງຮຸນ ແຂວງ ອຸດົມໄຊ ທີ່ເປັນຜູ່ຮ່ວມຂະບວນການຄ້າຂາຍຢາເສບຕິດຄັ້ງນີ້, ທາງເຈົ້າໜ້າທີ ກໍ່ໄດ້ສົ່ງກຳລັງເຈົ້າໜ້າທີ ປກສ ເມືອງຫົງສາ ສົບທົບກັບ ທາງເຈົ້າໜ້າທີ ປກສ ເມືອງປາກແບງ ແລ້ວເຂົ້າໄປຈັບກຸມຕົວທ້າວ ລາວເກີ ວາ ເມື່ອຈັບກຸມສຳເລັດແລ້ວ ເຈົ້າໜ້າທີກໍ່ໄດ້ຄຸມຕົວມາດຳເນີນການສືບສວນ-ສອບສວນ.
ເຊິ່ງໃນປະຈຸບັນນີ້. ຄະດີດັ່ງກ່າວ, ແມ່ນຍັງຢູ່ໃນລະຫວ່າງການດໍາເນີນສືບສວນ-ສອບສວນ ພວກກ່ຽວຂ້ອງ ເພື່ອຂະຫຍາຍຜົນຫາຜູ້ຮ່ວມຂະບວນການ ແລະ ປະກອບສຳນວນຄະດີສົ່ງໄປ ປກສ ແຂວງ ເພື່ອທຳການຕັດສິນລົງໂທດຕາມລະບຽບກົດໝາຍບ້ານເມືອງໃນຂັ້ນຕໍ່ໄປ.
ກິດຕິສັກ ບົວໄລ ນັກຂ່າວລາວໂພສຕ໌ ປະຈຳເມືອງຫົງສາ ແຂວງໄຊຍະບູລີ