ເມືອງຮົ່ມເປັນເມືອງທີ່ຕັ້ງຫ່າງຈາກເທສະບານແຂວງໄຊສົມບູນ ໄປທາງທິດຕາເວັນອອກສຽງໃຕ້ປະມານ 97 ກິໂລແມັດທິດເໜຶອຕິດກັບເມືອງອານຸວົງ, ທິດໃຕ້ຕິດກັບເມືອງທ່າພະບາດ ແຂວງບໍລິຄຳໄຊ, ທິດຕາເວັນ ອອກຕິດກັບເມືອງທ່າໂທມ ແຂວງ ໄຊສົມບູນ ແລະເມືອງບໍລິຄັນ ແຂວງບໍລິຄຳໄຊ, ທິດຕາເວັນຕົກຕິດກັບເມືອງລ້ອງຊານ, ເມືອງຮົ່ມປະກອບມີ 13 ບ້ານ, 1.711 ຫຼັງຄາເຮືອນ ແລະມີພົນລະເມືອງ ທັງໝົດ 11.821 ຄົນ ຍິງ 5.651 ຄົນ ມີ 5 ຊົນເຜົ່າຄື: ເຜົ່າມົ້ງ ກວມ ເອົາ 93,48%, ເຜົ່າລາວ1,83%, ເຜົ່າກືມມຸ 0,11%, ເຜົ່າອີວມຽນ 4,17%, ເຜົ່າໄຕ 0,4%, ປະຊາ ຊົນສ່ວນຫຼາຍຖືສາສະໝາຜີ.
ການຕັ້ງພູລຳເນົາທີ່ຢູ່ອາໄສເຫັນວ່າເໝາະສົມກັບການດຳລົງຊີວິດຂອງປະຊາຊົນບັນດາເຜົ່າເພາະວ່າເມືອງມີເນື້ອທີ່ທຳການຜະລິດທີ່ອຸດົມສົມບູນເໝາະແກ່ການປູກຝັງ ແລະລ້ຽງສັດ, ມີແມ່ນ້ຳ ແລະຫ້ວຍຮ່ອງຫຼາຍສາຍສາມາດສ້າງລະບົບຊົນລະປະທານ ເອົານ້ຳເຂົ້າໃສ່ນາໄດ້ສອງລະດູ ແລະແທດເໝາະກັບການສ້າງເຂື່ອນໄຟຟ້າຫຼາຍແຫ່ງ, ມີຊັບພະຍາກອນໃຕ້ດິນ, ໜ້າດິນຫຼາຍຊະ ນິດ, ນອກນັ້ນ ຍັງມີສະຖານທີ່ທຳມະຊາດສາມາດສ້າງເປັນແຫຼ່ງທ່ອງທ່ຽວໄດ້ຫຼາຍແຫ່ງບັນດາສິ່ງດັ່ງກ່າວລ້ວນແຕ່ເປັນເງື່ອນ ໄຂ ແລະທ່າແຮງທີ່ສາມາດສ້າງ ລາຍຮັບໃຫ້ແກ່ປະຊາຊົນບັນດາ ເຜົ່າກໍຄືຊາວເມືອງຮົ່ມທຸກໆຄົນ.
ໃນໄລຍະ 1 ປີຜ່ານມາການພັດທະນາເສດຖະກິດຂອງ ເມືອງຮົ່ມ ໄດ້ສືບຕໍ່ຂະຫຍາຍຕົວຢ່າງໜັ້ນທ່ຽງ ແລະໜັກແໜ້ນຂຶ້ນ ເທື່ອລະກ້າວສາມາດຮັກສາການຈະເລີນເຕີບໂຕຂອງເສດຖະກິດໄດ້ຢ່າງຕໍ່ເນື່ອງ ໂດຍສະເພາະການຜະລິດໃຫ້ກາຍເປັນສິນຄ້າ ເຮັດໃຫ້ຊີວິດຂອງປະຊາຊົນບັນດາເຜົ່າໄດ້ຮັບການປັບປຸງດີຂຶ້ນ ແລະຈັງຫວະການຂະຫຍາຍຕົວຂອງເສດຖະກິດຢູ່ໃນລະດັບສະເລ່ຍ 7,5% ຕໍ່ປີ ລວມຍອດລາຍຮັບຜະລິດຕະພັນພາຍໃນເມືອງບັນລຸໄດ້ 43,73 ຕື້ກວ່າກີບ, ສະເລ່ຍໃສ່ພົນລະເມືອງໄດ້ 3,7 ລ້ານກວ່າກີບຕໍ່ຄົນຕໍ່ປີ. ນອກນີ້ ຍັງໄດ້ສຸມໃສ່ຂະຫຍາຍເນື້ອທີ່ການຜະລິດຕິດພັນກັບການນຳໃຊ້ເຕັກນິກວິທະຍາສາດໃໝ່ ແລະກົນຈັກເຂົ້າສູ່ການຜະລິດຊຶ່ງເຮັດໃຫ້ຜົນຜະລິດເພີ່ມຂຶ້ນ, ໂດຍສະເພາະແມ່ນສະມັດຖະພາບການຜະລິດສູງຂຶ້ນກວ່າແຕ່ກ່ອນ. ເນື້ອທີ່ສວນ ແລະນາທັງ ໝົດ 1 ພັນກວ່າເຮັກຕາ, ຜົນຜະລິດໄດ້ 3 ພັນກວ່າໂຕນສະເລ່ຍຕໍ່ປະຊາກອນໄດ້ 300 ກວ່າກິໂລກຣາມຕໍ່ຄົນຕໍ່ປີ. ນອກນັ້ນ ຍັງມີເນື້ອທີ່ປູກມັນຕົ້ນ, ສາລີ ແລະພືດ ຜັກອື່ນໆອີກ.
ພ້ອມດຽວກັນນັ້ນ ຍັງໄດ້ຊຸກຍູ້ ແລະຄຸ້ມຄອງບັນດາຫົວໜ່ວຍທຸລະກິດຕ່າງໆຢູ່ພາຍໃນເມືອງໃຫ້ເຄື່ອນໄຫວຖືກຕ້ອງຕາມລະບຽບກົດໝາຍ, ສົ່ງເສີມໃຫ້ເອກະຊົນລົງທຶນຂະຫຍາຍຕະຫຼາດ ແລະຫ້າງຮ້ານບໍລິການຕ່າງໆສົ່ງເສີມການຜະລິດເປັນສິນຄ້າເພື່ອສົ່ງອອກ,ຫຼຸດຜ່ອນການນຳເຂົ້າສິນຄ້າທີ່ເຫັນວ່າບໍ່ມີຄວາມຈຳເປັນໂດຍສະເພາະແມ່ນສິນຄ້າກະສິກຳ. ຕິດຕາມ ແລະກວດກາການເໝັງຕີງ ຂອງລາຄາສິນຄ້າໃນທ້ອງຕະຫຼາດເປັນປະຈຳແຕ່ລະວັນ.
ຕິດຕາມການກໍ່ສ້າງຕາຂ່າຍໄຟຟ້າແຮງກາງ ແລະແຮງຕ່ຳຢູ່ບັນດາບ້ານໃນຂອບເຂດຂອງເມືອງຮົ່ມຮັບຜິດຊອບ ແລະຕິດຕາມໂຄງການກໍ່ສ້າງຂະໜາດກາງເຂົ້າໃສ່ສຳນັກງານປົກຄອງ ເມືອງມາຮອດປະຈຸບັນທົ່ວເມືອງມີໄຟຟ້າຖາວອນນຳໃຊ້ ທັງໝົດ 7 ບ້ານເທົ່າກັບ 69,23% ຂອງອັດຕາການນຳໃຊ້ໄຟຟ້າທົ່ວເມືອງ, ນຳໃຊ້ໄຟຟ້າແສງຕາເວັນມີ 3 ບ້ານເທົ່າກັບ 23% ແລະບໍ່ທັນມີໄຟຟ້າໃຊ້ 3 ບ້ານ. ປະຈຸບັນໄດ້ມີ ການສຳຫຼວດເຂື່ອນໄຟຟ້ານ້ຳຕົກຂະໜາດນ້ອຍຄືເຂື່ອນໄຟຟ້ານ້ຳ ພວນແມ່ນໄດ້ສຳເລັດການສຳຫຼວດ-ອອກແບບເຂື່ອນເບື້ອງຕົ້ນແລ້ວ. ສ່ວນວຽກງານບໍ່ແຮ່ໃນໄລຍະ 1 ປີຜ່ານມາໄດ້ເອົາໃຈໃສ່ຄຸ້ມຄອງ, ຕິດຕາມ, ກວດກາ ແລະອຳນວຍຄວາມສະດວກໃຫ້ແກ່ບັນດາບໍລິສັດນັກລົງທຶນທັງພາຍໃນ ແລະຕ່າງປະເທດທີ່ເຂົ້າມາສຳຫຼວດແຮ່ທາດ ແລະບັນດາຫົວໜ່ວຍທຸລະກິດທີ່ມາດຳເນີນຢູ່ພາຍໃນ ເມືອງໃຫ້ເຄື່ອນໄຫວຖືກຕ້ອງສອດ ຄ່ອງຕາມລະບຽບກົດໝາຍ.
ໂດຍປະຈຸບັນທົ່ວເມືອງມີໂຮງ ຮຽນທັງໝົດ 17 ແຫ່ງ ມີຫ້ອງຮຽນ 124 ຫ້ອງ, ມີນັກຮຽນ 3.921ຄົນ, ຍິງ 1.771 ຄົນ, ພະນັກງານ ຫ້ອງການ ແລະຄູສອນທັງໝົດ 207 ຄົນ ຍິງ 28 ຄົນ ສຳລັບວຽກງານສາທາລະນະສຸກປີຜ່ານ ມາໄດ້ຖືເອົາການຮັກສາສຸຂະພາບຂັ້ນຕົ້ນເປັນປັດໄຈກາງໃນການກັນພະຍາດ-ສົ່ງເສີມສຸຂະພາບທົ່ວສັງຄົມ, ເອົາການປິ່ນປົວເປັນສິ່ງສຳຄັນ ໂດຍສົມທົບກັບອົງການປົກຄອງແຕ່ລະຂັ້ນ ເພື່ອຂະຫຍາຍຕາໜ່າງສາທາລະນະສຸກລົງສູ່ຮາກຖານບ້ານ. ມາຮອດປະຈຸບັນສາມາດສ້າງບ້ານຕົວແບບດ້ານສາທາລະນະສຸກໄດ້ 8 ບ້ານ ທົ່ວເມືອງມີສຸກສາລາ 2 ແຫ່ງ ແລະໄດ້ສ້າງຖົງຢາງປະຈຳບ້ານໄດ້ 10 ບ້ານ, ໄດ້ໃຊ້ນ້ຳສະອາດ ກວມ75% ແລະປະຊາຊົນໄດ້ໃຊ້ວິດຖ່າຍ ກວມ 65%.
ທີ່ມາ: ເສດຖະກິດ-ສັງຄົມ