ໃນແຜນການອີກ 5 ປີຕໍ່ໜ້າ ສປປ ລາວ ຄາດຄະເນວ່າຈະສູ້ຊົນດຶງ ດູດນັກທ່ອງທ່ຽວຈາກທົ່ວທຸກມຸມໂລກ ເຂົ້າມາຢ້ຽມຢາມໃຫ້ໄດ້ 6 ລ້ານຄົນ, ສ້າງແຜນພັດທະນາການທ່ອງທ່ຽວໃຫ້ ໄດ້ 25 ແຫ່ງ, ດ້ານຜູ້ຊີ້ນຳວຽກນີ້ໄດ້ ເນັ້ນໃຫ້ເອົາໃຈໃສ່ 3 ບາດກ້າວສຳຄັນ ເພື່ອພັດທະນາພັດທະນາວຽກງານທ່ອງ ທ່ຽວໃຫ້ກ້າວສູ່ຄຸນນະພາບໃໝ່, ທັນສະ ໄໝ, ສີວິໄລ ແລະຍືນຍົງ.
ວັນທີ 12 ກໍລະກົດ 2016 ທີ່ຫໍວັດນະທະທຳ ນະຄອນຫຼວງວຽງຈັນ ໄດ້ມີກອງປະຊຸມວິຊາການຂະແໜງການທ່ອງ
ທ່ຽວທົ່ວປະເທດຄັ້ງທີ 1 ໂດຍການເປັນ ປະທານຂອງທ່ານ ອຸ່ນທວງ ຂາວພັນ ຄະນະປະຈຳພັກກະຊວງ ຜູ້ຊີ້ນຳວຽກ ງານທ່ອງທ່ຽວ ມີບັນດາຫົວໜ້າ, ຮອງຫົວໜ້າພະແນກທ່ອງທ່ຽວໃນບັນດາ ແຂວງທົ່ວປະເທດ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ອຸ່ນທວງ ຂາວພັນ ໄດ້ເນັ້ນໃຫ້ຂະແໜງການທ່ອງທ່ຽວເອົາໃຈໃສ່ຄື: 1 ພັດທະນາຂະແໜງອຸດສາຫະກຳທ່ອງ
ທ່ຽວທີ່ມີເອກະລັກສະເພາະຂອງລາວ ຕາມທິດສົ່ງເສີມການທ່ອງທ່ຽວທຳມະ ຊາດ, ວັດທະນະທຳ ແລະປະຫວັດສາດ, ເຮັດໃຫ້ ສປປ ລາວ ກາຍເປັນຈຸດໝາຍປາຍທາງການທ່ອງທ່ຽວຂອງນັກທ່ອງ ທ່ຽວໃນທົ່ວໂລກ, ເປັນສ່ວນປະກອບ ສຳຄັນຂອງການທ່ອງທ່ຽວອາຊຽນ ແລະ ໂລກ, ສົ່ງເສີມການທ່ອງທ່ຽວໃຫ້ກາຍເປັນຂະແໜງເສດຖະກິດສຳຄັນ ໜຶ່ງຂອງຊາດ, 2 ການພັດທະນາການທ່ອງທ່ຽວ ໃນແຕ່ລະແຂວງ ເຫັນຄວນໄດ້ກຳນົດຜະ ລິດຕະພັນທີ່ໂດດເດັ່ນຂອງຕົນ ແລະສ້າງຜະລິດຕະພັນການທ່ອງທ່ຽວໃຫ້ເຊື່ອມ ໂຍງກັບບັນດາທ້ອງຖິ່ນ ແລະກ້າວໄປເຖິງເຊື່ອມໂຍງກັບບັນດາປະເທດໃກ້ຄຽງ ແລະພາກພື້ນ, 3 ສຳລັບພາກທຸລະກິດທ່ອງທ່ຽວ, ໂຮງແຮມ, ຮ້ານອາຫານ ແລະທຸລະກິດທີ່ກ່ຽວຂ້ອງກໍເຫັນຄວນເພີ່ມທະວີການມີສ່ວນຮ່ວມ ເພື່ອພັດທະນາ ຄຸນນະພາບການບໍລິການໃຫ້ດີຂຶ້ນ ແລະ
ສ້າງຕະຫຼາດທ່ອງທ່ຽວໃຫ່ເຂັ້ມແຂງ, ຍືນຍົງ ແລະມີສ່ວນຮ່ວມຂອງທຸກພາກສ່ວນ.
ໂອກາດດຽວກັນ ທ່ານ ສູນ ມະນີວົງ ຫົວໜ້າກົມພັດທະນາການທ່ອງທ່ຽວ ໄດ້ລາຍງານການຈັດຕັ້ງປະຕິບັດວຽກ ງານທ່ອງທ່ຽວໃນໄລຍະ 5 ປີ (2011-2015) ແລະທິດທາງແຜນການ 5 ປີ (2016-2020) ຊຶ່ງໃນໄລຍະ 5 ປີຜ່ານມາໄດ້ມີນັກທ່ອງທ່ຽວມາຢ້ຽມຢາມ ສປປ ລາວ ເພີ່ມຂຶ້ນທຸກໆປີ ແຕ່ປີ 2011 ມີຈຳນວນນັກທ່ອງທ່ຽວ 2,7 ລ້ານກວ່າຄົນ, ມາຮອດປີ 2015 ມີຈຳນວນ 4,6 ລ້ານກວ່າຄົນ, ເພີ່ມຂຶ້ນ 13% ທຽບໃສປີ 2014 ສາມາດສ້າງ
ລາຍຮັບໄດ້ 725 ລ້ານກວ່າໂດລາສະ ຫະລັດ, ສາມາດປະກອບສ່ວນເຂົ້າໃນ GDP ປະມານ 7,5% ແລະຄາດຄະເນ ຮອດປີ 2020 ຈະສ້າງລາຍຮັບສະເລ່ຍ 550760 ລ້ານໂດລາສະຫະລັດ.
ສຳລັບ ຕະຫຼາດທ່ອງທ່ຽວທີ່ສຳຄັນ ແມ່ນຈາກຂົງເຂດອາຊີປາຊີຟິກ ໂດຍສະ ເພາະແມ່ນຈາກກຸ່ມປະເທດອາຊຽນຄື: ໄທ ແລະຫວຽດນາມ, ຂົງເຂດອາຊີປາ ຊີຟິກຄື: ຈີນ, ຍີ່ປຸ່ນ, ສ.ເກົາຫຼີ ແລະອົດສະຕຣາລີ, ນອກຈາກນັ້ນຍັງມີນັກທ່ອງ ທ່ຽວທີ່ມີລາຍຮັບສູງຈາກເອີຣົບ ແລະ ອາເມລິກາເຊັ່ນ: ຝຣັ່ງ, ອັງກິດ, ເຢຍລະ ມັນ ແລະອາເມລິກາ.
ສ່ວນທິດທາງແຜນການໄລຍະ 5 ປີ ຕໍ່ໜ້າແມ່ນຈະສູ້ຊົນດຶງດູດນັກທ່ອງທ່ຽວເຂົ້າມາຢ້ຽມຊົມໃຫ້ໄດ້ 6 ລ້ານຄົນ,
ສ້າງແຜນພັດທະນາການທ່ອງທ່ຽວໃຫ້ໄດ້ 25 ແຫ່ງ, ສຳຫຼວດ ແລະຈັດສັນ ແຫຼ່ງທ່ອງທ່ຽວໃຫ້ໄດ້ 40 ແຫ່ງ, ສ້າງພະນັກງານທີ່ເຮັດວຽກໃນຂະແໜງການທ່ອງທ່ຽວໃຫ້ໄດ້ຮັບການຍົກລະດັບທາງດ້ານວິຊາການຢ່າງໜ້ອຍ 4 ພັນຄົນ, ຂະຫຍາຍຜູ້ຕາງໜ້າ ຫຼື ຕົວແທນການທ່ອງ ທ່ຽວຢູ່ຕ່າງປະເທດທີ່ເປັນຕະຫຼາດຕົ້ນຕໍຂອງ ສປປ ລາວໃຫ້ໄດ້ 5 ປະເທດ, ສູ້ ຊົນຈັດປີທ່ອງທ່ຽວລາວຄັ້ງທີ 3 ໃນປີ 2018 ໃຫ້ປາກົດຜົນເປັນຈິງ.
ທີ່ມາ: ເສດຖະກິດ-ສັງຄົມ