ທາງການເວເນຊູເອລາປະກາດເປີດຊາຍແດນທີ່ຕິດກັບປະເທດໂກໂລມບີຊົ່ວຄາວເປັນເວລາ 12 ຊົ່ວໂມງ ເພື່ອໃຫ້ປະຊາຊົນປະມານ 35 ພັນຄົນ ເດີນທາງໄປຈັບຈ່າຍໃຊ້ສອຍສິນຄ້າອຸປະໂພກບໍລິໂພກໃນປະເທດເພື່ອນບ້ານໄດ້ ທ່າມກາງວິກິດຂາດແຄນອາຫານຮຸນແຮງຂອງເວເນຊູເອລລາ.
ສຳນັກຂ່າວຕ່າງປະເທດລາຍງານວ່າ ກ່ອນໜ້ານີ້ ທ່ານ ນິໂຄລັສ ມາຣູໂຣ ປະທານາທິບບໍດີ ຂອງເວເນຊູເອລາ ສັ່ງປິດຊາຍແດນໄປໃນເດືອນສິງຫາປີທີ່ຜ່ານມາ ເພື່ອຫວັງຈະກວາດລ້າງການອາດສະຍາກຳ ລວມທັງເປັນການປ້ອງກັນການລັກລອບຂົນສິນຄ້າຂ້າມໄປຍັງໂກໂລມບີ ລາຍງານລະບຸຕື່ມວ່າ ຄົນເວເນຊູເອລາຂ້າມຊາຍແດນໃນ 7 ຊົ່ວໂມງທຳອິດມີເຖິງ 25 ພັນຄົນ ໂດຍມີລົດຮັບສົ່ງ ພ້ອມຈັດກຳລັງເຝົ້າລະວັງທີ່ຮ້ານຊູເປີມາເກັດໃຫຍ່ຂອງເມືອງກວ່າ 300 ຄົນ ເນື່ອງຈາກອາທິດທີ່ຜ່ານມາມີຄົນເວເນຊູເອລາປະມານ 500 ຄົນຜ່ານດ່ານເຈົ້າໜ້າທີ່ເພື່ອຂ້າມຊາຍແດນໄປຊື້ອາຫານ ໂດຍບັນຍາກາດໃນຊູເປີມາເກັດຕ່າງໆຢູ່ທີ່ຊາຍແດນໂກໂລມບີເປັນໄປຢ່າງຄຶກຄັກ ຄົນເວເນຊູເອລາຕ່າງລະດົມຄົນເຂົ້າໄປຈັບຈ່າຍຊື້ສິນຄ້າ ໂດຍສະເພາະສິນຄ້າເພື່ອບໍລິໂພກເຊັ່ນ: ເຂົ້າ, ແປ້ງ, ນ້ຳຕານ ແລະ ນ້ຳມັນ ທີ່ຫາຊື້ໄດ້ຍາກ ແລະ ມີລາຄາແພງຫຼາຍໃນປະເທດຂອງຕົນ.
ທັງນີ້ ໃນໄລຍະຫຼາຍເດືອນທີ່ຜ່ານມາ ເວເນຊູເອລາຕ້ອງປະເຊີນກັບພາວະຂາດແຄນອາຫານ ແລະ ຢາ, ບໍ່ມີໄຟຟ້າໃຊ້ຢ່າງພຽງພໍ ຈາກປັດໃຈຫຼາຍດ້ານເຊັ່ນ: ການໄດ້ຮັບຜົນກະທົບຈກການຫຼຸດລົງລາຄານ້ຳມັນໂລກ ຊຶ່ງເວເນຊູເອລາຕ້ອງເພິ່ງພາການສົ່ງອອກພະລັງງານເຖິງ 96% ຂອງມູນຄ່າການສົ່ງອອກທັງໝົດ.