ແຂວງຈໍາປາສັກຊີ້ແຈງຜົນການເກັບລາຍຮັບເຂົ້າງົບປະມານຂອງແຂວງໃນ 6 ເດືອນຕົ້ນປີຂອງສົກ 2015-2016 ພົບວ່າບັນລຸໄດ້ພຽງ 529 ຕື້ກີບ ເທົ່າກັບ 41% ຖືວ່າໄດ້ໜ້ອຍ ຫລື ບໍ່ບັນລຸເປົ້າໝາຍທີ່ວາງໄວ້ເມື່ອທຽບໃສ່ແຜນປີ ຍ້ອນເປັນແນວນັ້ນ ທ່ານ ບຸນຖອງ ດີວິໄຊ ເຈົ້າແຂວງຈຳປາສັກພ້ອມຄະນະພິເສດຈິ່ງໄດ້ລົງຕິດກວດກາ ແລະ ຊີ້ນໍາຄືນຕໍ່ເຈົ້າໜ້າທີ່ພາສີ-ອາກອນຈໍານວນໜຶ່ງບໍ່ມີຄວາມຈິງໃຈ ແລະ ເຊື່ອງອໍາບາງແຫລ່ງຮັບຂອງລັດໂດຍສະເພາະຂີ້ຕົວະຕົວເລກຮ້ານຜູ້ປະກອບການທຸລະກິດຄ້າ-ຂາຍ ແລະ ສ້າງໜ່ວຍງານນາຍໜ້າເປັນບໍລິສັດຂົນສິນຄ້ານໍາເຂົ້າແບບເໝົາຝ່າຍດຽວ.

ທ່ານ ບຸນຖອງ ດີວິໄຊ ເຈົ້າແຂວງຈຳປາສັກລາຍງານໃນວັນທີ 6 ກໍລະກົດ 2016 ນີ້ວ່າ: ບັນຫາທີ່ພົ້ນເດັ່ນ ໃນປັດຈຸບັນ ແມ່ນແຂວງພວກເຮົາມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ, ພື້ນຖານໂຄງລ່າງໄດ້ຮັບການປັບປຸງ ແລະ ກໍ່ສ້າງຂຶ້ນໃໝ່ຫລາຍແຫ່ງ. ເດັ່ນກວ່າໝູ່ແມ່ນ ການກໍ່ສ້າງເສັ້ນທາງເປຕົງໃນເທດສະບານເມືອງປາກເຊ 4 ເລນ 6 ເລນ ແລະ ການກໍ່ສ້າງຂົວຂ້າມແມ່ນ້ຳເຊໂດນທີ່ເປັນຂົວໃຫຍ່ ແລະ ກວ້າງກວ່າໝູ່ມີຂະໜາດ 4 ເລນ ເຊິ່ງເຫັນວ່າແຂວງພວກເຮົາບໍ່ເຄີຍມີມາກ່ອນ. ເສດຖະກິດໄດ້ຮັບການພັດທະນາຂະຫຍາຍຕົວຕໍ່ເນື່ອງ, ຄຸນນະພາບຊີວິດຂອງປະຊາຊົນ ໄດ້ຮັບການຍົກລະດັບດີຂຶ້ນເປັນກ້າວໆ, ປະຊາຊົນຍູທ່າງທຳມາຫາກິນ. ເຊິ່ງເປັນພຶື້ນຖານອັນດີໃຫ້ແກ່ການພັດທະນາເສດຖະກິດສັງຄົມພາຍໃນແຂວງ.

ສຳລັບ 6 ເດືອນຕົ້ນປີໆນີ້ ການເກັບລາຍຮັບເຂົ້າງົບປະມານຂອງແຂວງບັນລຸໄດ້ພຽງ 529 ຕື້ກີບ ເທົ່າກັບ 41% ຖືວ່າໄດ້ໜ້ອຍເມື່ອທຽບໃສ່ແຜນປີ ໃນນັ້ນລາຍຮັບຂອງສູນກາງບັນລຸໄດ້ 259 ຕື້ກີບເທົ່າກັບ 35% ຂອງແຂວງ ເມື່ອເຫັນວ່າການຈັດເກັບລາຍຮັບບໍ່ໄດ້ຕາມແຜນ ທາງຂ້າພະເຈົ້າເອງກໍ່ໄດ້ລົງຊຸກຍູ້ຊີ້ນຳ ແລະ ໃຊ້ມາດຕະການຕ່າງໆ ເພື່ອໃຫ້ບັນລຸແຜນ ຜ່ານໃນໄລຍະ 2 ເດືອນຄືເດືອນ 5-6 ໄດ້ເຮັດໃຫ້ການຈັດເກັບລາຍຮັບເພີ່ມຂຶ້ນ ມາຮອດປັດຈຸບັນສາມາດເກັບລາຍຮັບໄດ້ 917 ຕື້ກີບເທົ່າກັບ 63% ຂອງແຜນການຖືວ່າເປັນຜົນງານທີ່ໜ້າເພິ່ງພໍໃຈຄືລາຍຮັບຂອງສູນກາງບັນລຸໄດ້ 432 ຕື້ກີບຈາກ 35% ມາເປັນ 54% ສ່ວນລາຍຮັບຂອງແຂວງຈາກ 276 ຕື້ກີບ ເພີ່ມມາເປັນ 484 ຕື້ກີບເທົ່າ 70%.
ການທີ່ລາຍຮັບເພີ່ມຂືຶ້ນຄືດັ່ງກ່າວແມ່ນຍ້ອນໄດ້ນຳໃຊ້ມາດຕະການເກັບຄົບ,ເກັບຖືກ,ເກັບທັນເວລາ ໂດຍກວດກາລາຍການສິນຄ້າແຈ້ງເຂົ້າເສຍພາສີອາກອນຢູ່ດ່ານ ແລ້ວນຳຕິດຕາມກວດນັບຮອດປາກສາງລູກຄ້າ ຖ້າລາຍການສິນຄ້າເພີ່ມຕ້ອງໄດ້ເສຍຄືນເພີ່ມອີກ. ພ້ອມນັ້ນ ກໍຈຳກັດນາຍໜ້າ ເຊິ່ງຜ່ານມາເຫັນວ່າບັນດາບໍລິສັດໄດ້ມອບໃຫ້ນາຍໜ້າເປັນຜູ້ເສຍຖືກກວ່າບໍລິສັດແຈ້ງເສຍເອງ ເຮັດໃຫ້ລັດເຮົາອັບປະໂຫຍດ.ຈິ່ງເຮັດໃຫ້ລາຍຮັບຫລຸດລົງ.

ປັດຈຸບັນ ແມ່ນໃຫ້ບໍລິສັດແຈ້ງເສຍເອງ ຈິ່ງເຮັດໃຫ້ການເກັບລາຍຮັບພົ້ນເດັ່ນຂຶ້ນ ຈາກນັ້ນກໍ່ໄດ້ມອບໃຫ້ບໍລິສັດໃຫຍ່ໆ ຖືບັນຊີຊື້ຂາຍຜ່ານລະບົບເອເລັກໂຕຼນິກ ປັດຈຸບັນເຮັດໄດ້ແລ້ວ 2ບໍລິສັດ ພ້ອມນີ້ ໃນໄລຍະໄຟໄໝ້ຢູ່ຕະຫລາດໃໝ່ປາກເຊ ກໍ່ກວດພົບເຫັນ 200 ກວ່າຮ້ານ ທີ່ບໍ່ລາຍງານ ຕົວເລກແຈ້ງເສຍອາກອນ, ຈາກການນຳໃຊ້ມາດຕະການດັ່ງກ່າວເຫັນວ່າສາມາດກໍາຈັດໄດ້ບັນຫາການສໍ້ລາດບັງຫລວງ ແລະ ຮັບປະກັນໄດ້ຄວາມໂປ່ງໃສ ແລະ ມີຄວາມຍຸຕິທໍາເພີ່ມຂຶ້ນ ຄາດວ່າການຈັດເກັບລາຍຮັບເຂົ້າງົບປະມານຂອງແຂວງຈຳປາສັກຈະໃຫ້ໄດ້ຕາມແຜນ ແລະ ລື່ນຄາດໝາຍທີ່ລັດຖະບານມອບໝາຍໃຫ້.

ຂ່າວ: ຂປລ