ບໍລິສັດເທມາເສ໊ກ ໂຮລດິງ ກອງທຶນເພື່ອການລົງທຶນຂອງລັດຖະບານສິງກະໂປເປີດເຜີຍໃນທ້າຍອາທິດທີ່ຜ່ານມາວ່າ ບໍລິສັດປະສົບພາວະຂາດທຶນປະຈຳປີເປັນເທື່ອທຳອິດນັບຕັ້ງແຕ່ເກີດວິກິດການເງິນໃນ 7 ປີກ່ອນ.
ສຳນັກຂ່າວຕ່າງປະເທດລາຍງານວ່າ ເທເມເສ໊ກປະກາດວ່າ ນັບຈົນເຖິງເດືອນມີນາທີ່ຜ່ານມາ ມູນຄ່າຊັບສິນຂອງບໍລິສັດ ທົ່ວໂລກມີມູນຄ່າ 242 ຕື້ໂດລາສິງກະໂປ ຫຼຸດລົງ 9% ຈາກມູນຄ່າຂອງຊັບສິນໃນປີທີ່ຜ່ານມາຢູ່ທີ່ 266 ຕື້ໂດລາສິງກະໂປ ຊຶ່ງເປັນມູນຄ່າທີ່ຫຼາຍທີ່ສຸດເປັນປະຫວັດສາດ ເທມາເສ໊ກກ່າວຕື່ມວ່າ ຜົນກຳໄລສຸດທິຂອງບໍລິສັດໃນໄລຍະປີທີ່ຜ່ານມາຫຼຸດລົງໄປ 43% ໄປຢູ່ທີ່ 8 ຕື້ໂດລາສິງກະໂປ ຊຶ່ງເປັນຜົນມາຈາກຄວາມກັງວົນກ່ຽວກັບເສດຖະກິດຂອງສປ ຈີນຫຼັງລັດຖະບານປະກາດຫຼຸດຄ່າເງິນຢວນ ແລະ ໃນຕົ້ນປີທີ່ຜ່ານມາມີຄວາມກັງວົນກ່ຽວກັບທ່າອຽງທ່າງເສດຖະກິດຂອງຈີນ ແລະ ຄວາມສາມາດຂອງຜູ້ນຳຈີນໃນການຮັບມືໃນໄລຍະຍາວກັບການຂະ ຫຍາຍຕົວທາງເສດຖະກິດທີ່ຫຼຸດລົງ ທັງສອງເຫເການເຮັດໃຫ້ມູນຄ່າຊັບສິນທົ່ວໂລກຂອງເທມາເສ໊ກມີມູນຄ່າຫຼຸດລົງຫຼາຍພັນຕື້ໂດລາສິງກະໂປ.
ເທມາເສ໊ກກ່າວໃນລາຍງານປະຈຳປີວ່າ ສະຖານະການໃນປີນີ້ຍັງບໍ່ສົດໄສ ເນື່ອງຈາກເສດຖະກິດອາເມລິກາມີການຂະຫຍາຍຕົວໃນລະດັບປານກາງ ໃນຂະນະທີ່ຈີນຍັງຂະຫຍາຍຕົວຊ້າລົງ ສ່ວນເສດຖະກິດເອີຣົບກໍເກີດເຫດການອັງກິດລົງປະຊາມະຕິຖອນຕົວອອກຈາກສະມາຊິກສະຫະພາບເອີຣົບ (ອີຢູ).