ທ່ານ ຄຳມອນ ພົມພິພັກ ຫົວໜ້າຫ້ອງການກະສິກຳ -ປ່າໄມ້ ເມືອງໜອງບົກໃຫ້ຮູ້ວ່າ: ການລົງມືສູ່ການຜະລິດ ລະດູຝົນປີນີ້ ແມ່ນເລີ່ມມາແຕ່ກາງເດືອນພຶດສະພາເປັນຕົ້ນມາ ແລະ ມາຮອດຕົ້ນເດືອນມີຖຸນາຜ່ານມາ ໃນບ່ອນທີ່ມີເງື່ອນໄຂ ແມ່ນໄດ້ລົງມືປັກດຳ. ມາຮອດປັດຈຸບັນແມ່ນສຳເລັດແລ້ວ 4.000 ກວ່າເຮັກຕາ, ໃນນັ້ນເຂດທີ່ປັກດຳຫຼາຍກວ່າໝູ່ ແມ່ນເຂດບ້ານໜອງບົກ, ບ້ານສອງເໝືອງ, ບ້ານຫາດຊຽງດີ, ເຂດບ້ານນາຈຳປາ ແມ່ນສຳເລັດແລ້ວຫຼາຍກວ່າ 25%. ນອກຈາກການປັກດຳແລ້ວ ຊາວກະສິກອນບາງເຂດ ແມ່ນໄດ້ເຮັດນາແບບໃໝ່ ທີ່ໃຊ້ກົນຈັກທີ່ທັນສະໄໝ ເປັນຕົ້ນແມ່ນເຮັດນາຝາຍ (ຫວ່ານ) ເນື້ອທີ່ 7.800 ກວ່າເຮັກຕາ, ມາຮອດປັດຈຸບັນ ແມ່ນສຳເລັດແລ້ວ 75%. ໃນເນື້ອທີ່ນາທົ່ວເມືອງທັງນາທີ່ປັກດຳ ແລະ ນາຫວ່ານ ແມ່ນມີເນື້ອທີ່ທັງໝົດ 15.000 ກວ່າເຮັກຕາ. ຄາດວ່າການປັກດຳນາປີປີນີ້ ຈະໃຫ້ສຳເລັດໃນທ້າຍເດືອນນີ້. ນອກ ຈາກນັ້ນ ຊາວກະສິກອນຍັງໄດ້ຫັນມາປູກພືດສຳຮອງຕື່ມອີກ ໂດຍສະເພາະແມ່ນຢູ່ເຂດບ້ານດອນຂຽວເໜືອ, ບ້ານດອນປາແດກ ເປັນຕົ້ນ ແລະ ເຂດທີ່ມີເງື່ອນໄຂ ຊຶ່ງພືດທີ່ນຳມາປູກແມ່ນຜັກບົ່ວ, ຜັກຫອມປ້ອມ, ໝາກເຂືອ, ສາລີ, ໝາກເຜັດ ແລະ ພືດຜັກອື່ນໆ ໃນເນື້ອທີ່ 500 ເຮັກຕາ.
ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!