ວັນທີ 10 ກໍລະກົດ ປີ 2008 ຫຼືມື້ນີ້ເມື່ອ 8 ປີທີ່ແລ້ວ ເປັນມື້ວາງຈຳໜ່າຍຂອງເກມ Resident Evil 0 ເທິງເຄື່ອງ Wii ທີ່ປະເທດຍີ່ປຸ່ນ ໂດຍເວີຊັ່ນທີ່ລົງ Wii ນີ້ ເປັນການພອຣ໌ດຈາກເວີຊັ່ນທີ່ລົງໃຫ້ກັບເຄື່ອງ GameCube ເມື່ອປີ 2002 ມາກ່ອນ ແລະຍັງເປັນພາກສຸດທ້າຍຂອງຍຸກ Original Resident Evil ທີ່ຍັງຄົງໃຊ້ມຸມກ້ອງໃນເກມແບບກ້ອງວົງຈອນປິດ (CCTV) ກ່ອນທີ່ຈະປ່ຽນຮູບແບບຂອງເກມໃນພາກ Resident Evil 4.

ສຳລັບເຫດການຂອງ Resident Evil 0 ແມ່ນເລີ່ມຂຶ້ນໃນວັນທີ 23 ກໍລະກົດ 1998 ເມື່ອມີລົດໄຟຂະບວນໜຶ່ງຈາກບໍລິສັດ Umbrella ທີ່ມີຊື່ວ່າ Ecliptic Express ໄດ້ຖືກລອບໂຈມຕີໂດຍຝູງປີງນັບບໍ່ຖ້ວນເຊິ່ງຄວບຄຸມໂດຍຊາຍເລິກລັບຄົນໜຶ່ງ ຈົນມາເຖິງ 2 ຊົ່ວໂມງຕໍ່ມາ, ໜ່ວຍ STARS ທີ່ເປັນໜ່ວຍພິເສດຂອງສະຖານີຕຳຫຼວດຈາກເມືອງແຮັກຄູນກໍໄດ້ຮັບຮູ້ມາວ່າມີຄະດີຂ້າຕະກຳເກີດຂຶ້ນທີ່ພູເຂົາ Arklay ເຊິ່ງຕັ້ງຢູ່ນອກເມືອງແຮັກຄູນ ໂດຍລະຫວ່າງທີ່ກຳລັງຈະຮອດບ່ອນເກີດເຫດ ເຮລິຄອບເຕີ້ຂອງທີມບຣາໂວ້ໄດ້ເກີດຂັດຂ້ອງຈົນຕ້ອງລົງຈອດສຸກເສີນໃນປ່າແຮັກຄູນ ສະມາຊິກທີມບຣາໂວ້ຈຶ່ງຕ້ອງອອກສຳຫຼວດພາກພື້ນດິນແທນ ແລະກໍໄດ້ພົບລົດຂອງເຈົ້າໜ້າທີ່ຈາກກອງທັບພິກຄວ່ຳຢູ່ ພ້ອມກັບສົບເຈົ້າໜ້າທີ່ 2 ຄົນ ແລະລາຍຊື່ນັກໂທດນາມວ່າ ບິວລີ້ ໂຄເອນ (Biily Coen) ທີ່ຫຼົບໜີໄປຢ່າງໄຮ້ຮ່ອງຮອຍ ທີມບຣາໂວ້ເລີຍຕັດສິນໃຈແຍກກັນເພື່ອຫາບິວລີ້ແລະສືບຄະດີໄປພ້ອມກັນ. ທາງດ້ານຣີເບກກ້າ ເຈົ້າໜ້າທີ່ໜ້າໃໝ່ຂອງທີມບຣາໂວ້ກໍໄດ້ໄປພົບກັບຂະບວນລົດໄຟ Ecliptic Express ທີ່ຈອດຊື່ໆຢູ່ ແລະນາງກໍໄດ້ພົບກັບບິວລີ້ບ່ອນຫັ້ນ ເຊິ່ງກໍເປັນຈຸດເລີ່ມຕົ້ນໂດຍບັງເອີນຂອງການປະຈົນໄພເອົາຊີວິດລອດຂອງທັງສອງ.

ສ່ວນລະບົບຂອງພາກນີ້ຈະຍັງຄົງໃຊ້ການຄວບຄຸມບັງຄັບຄືກັບ Resident Evil ພາກກ່ອນໆ ທີ່ເອີ້ນວ່າ Tank Control ທີ່ບໍ່ວ່າໂຕລະຄອນຈະຫັນໜ້າໄປທິດທາງໃດກໍຈະຕ້ອງໃຊ້ປຸ່ມ “ເທິງ” ຂອງ D-Pad ໃນການຍ່າງໄປດ້ານໜ້າສະເໝີ, ພ້ອມກັນນີ້ໂຕເກມພາກ 0 ກໍຈະຕັດລະບົບຝາກໄອເທັມໃນຄລັງ Item Box ອອກໄປ, ແລ້ວໃຊ້ລະບົບຖິ້ມເຄື່ອງລົງພື້ນແທນ ໂດຍຖ້າຜູ້ຫຼິ້ນຖິ້ມເຄື່ອງໄວ້ບ່ອນໃດ ກໍຕ້ອງກັບມາເອົາຄືນຢູ່ຈຸດນັ້ນເທົ່ານັ້ນ ແລະດ້ວຍຄວາມທີ່ໂຕເອກຂອງເກມພາກນີ້ມີ 2 ຄົນ ໄດ້ແກ່: ຣີເບກກ້າ ກັບ ບິວລີ້ ຈຶ່ງເປັນທີ່ມາຂອງລະບົບ Partner Zapping ທີ່ຜູ້ຫຼິ້ນສາມາດສະຫຼັບໂຕລະຄອນໄປມາໄດ້ເຖິງວ່າຈະຢູ່ຄົນລະຟາກຂອງສະຖານທີ່ກໍຕາມ. ໂດຍຣີເບກກ້າຈະມີຈຸດເດັ່ນຄືສາມາດປະສົມສະໝຸນໄພ ແລະສານເຄມີໄດ້, ໃນຂະນະທີ່ບິວລີ້ຈະສາມາດຍູ້ວັດຖຸທີ່ໜັກຫຼາຍໆໄດ້ ແລະມີພະລັງຊີວິດທີ່ສູງກວ່າຣີເບກກ້າ ເຊິ່ງການສະຫຼັບໂຕໄປມາຈະມີປະໂຫຍດຕໍ່ການແກ້ປິດສະໜາໃນຫຼາຍໆຈຸດ, ໂດຍລັກສະນະການຫຼິ້ນສ່ວນໃຫຍ່ຈະເປັນການເອົາບິວລີ້ໄປລຸຍກຳຈັດສັດຕູກ່ອນ ແລ້ວຈຶ່ງເອົາຣີເບກກ້າເຂົ້າມານຳຫຼັງເພື່ອແກ້ປິດສະໜານັ້ນເອງ.

Fact ເລັກນ້ອຍກ່ຽວກັບເກມ Resident Evil 0

• ໃນຊ່ວງທຳອິດທາງ Capcom ເຄີຍວາງແຜນວ່າຈະພັດທະນາ Resident Evil 0 ເພື່ອລົງໃຫ້ກັບເຄື່ອງ Nintendo 64 ມາກ່ອນ ພ້ອມກັບມີການປ່ອຍພາບຕົວຢ່າງຂອງເກມມາໃຫ້ຊົມເລັກນ້ອຍ ແຕ່ແລ້ວໂປຣເຈັກດັ່ງກ່າວກໍຕ້ອງພັບເກັບໄປເນື່ອງຈາກເຄື່ອງ Nintendo 64 ນັ້ນມີຂໍ້ຈຳກັດໃນເລື່ອງຂອງການໃຊ້ກະແຊັດໃນການຫຼິ້ນ ດ້ວຍເຫດນີ້ມັນຈຶ່ງບໍ່ສາມາດບັນຈຸຂໍ້ມູນໄດ້ເທົ່າແຜ່ນຊີດີ ແຖມຍອດຂາຍອຸປະກອນເສີມຂອງ Nintendo 64 ທີ່ມີຊື່ວ່າ 64DD ກໍຢູ່ໃນຂັ້ນໜ້າເປັນຫ່ວງ (64DD ແມ່ນອຸປະກອນທີ່ເຮັດໃຫ້ Nintendo 64 ຫຼິ້ນແຜ່ນ Magnetic Disk ໄດ້). ດັ່ງນັ້ນ Capcom ເລີຍເກັບໂປຣເຈັກພັດທະນາ Resident Evil 0 ໄປ ເພື່ອຖ້າແພລັດຟອຣ໌ມທີ່ເໝາະສົມອອກມາ, ຈົນການມາຂອງ GameCube ບໍລິສັດຈຶ່ງນຳເອົາໂປຣເຈັກດັ່ງກ່າວມາພັດທະນາຕໍ່.

• Resident Evil 0 ເວີຊັ່ນ GameCube ສາມາດເຮັດຍອດຂາຍທົ່ວໂລກໄດ້ 1.25 ລ້ານຊຸດ ໂດຍໄດ້ຮັບຄຳຍ້ອງໃນເລື່ອງກຣາບຟິກທີ່ງາມກວ່າ Resident Evil ພາກຣີເມກເລັກນ້ອຍ, ແຕ່ວ່າໃນ Wii ພັດໄດ້ຮັບຄຳວິຈານໄປໃນທາງລົບຫຼາຍກວ່າ ຢ່າງທຳອິດເລີຍກໍຄື Wii ນັ້ນເປັນການພອຣ໌ດຈາກເວີຊັ່ນ GameCube ແບບຄືກັນສຸດໆ ແຕ່ພັດບໍ່ປັບປຸງໃຫ້ໂຕເກມຮອງຮັບກັບ Wiimote ໄດ້ແບບເຕັມທີ່ນັ້ນເອງ.

• ຊິນຈິ ມິຄາມິ ຜູ້ໃຫ້ກຳເນີດຊີຣີ Resident Evil ແລະຮັບໜ້າທີ່ເປັນທີ່ປຶກສາໃຫ້ກັບ Resident Evil 0 ໄດ້ໃຫ້ສຳພາດກ່ຽວກັບປະເດັນທີ່ຍອດຂາຍຂອງພາກ 0 ໜ້ອຍກວ່າພາກອື່ນໆ ທີ່ອອກມາກ່ອນໜ້າວ່າ: “ມັນເຖິງເວລາແລ້ວທີ່ຊີຣີນີ້ຕ້ອງປະຕິວັດໂຕເກມຄັ້ງໃຫຍ່ ເພື່ອໃຫ້ໂຕເກມສາມາດຕໍ່ຍອດໄປໄດ້ອີກ ຫຼັງຈາກທີ່ໂຕເອງໄດ້ລອງຫຼິ້ນ Resident Evil 0 ແລ້ວຮູ້ສຶກວ່າລະບົບເກມຂ້ອນຂ້າງຈະເກົ່າແລ້ວ ແລະບໍ່ມີຫຍັງເປັນຕາຕື່ນເຕັ້ນຫຼາຍ” ແລະນີ້ກໍເປັນຈຸດເລີ່ມຕົ້ນທີ່ເຮັດໃຫ້ລາວລົງມືກຳກັບພາກ Resident Evil 4 ດ້ວຍໂຕເອງ, ຈົນຊີຣີນີ້ໄດ້ເຂົ້າຍຸກປ່ຽນຜ່ານຈາກ Original Resident Evil ມາເປັນຍຸກ Modern Resident Evil ຈົນເຖິງປັດຈຸບັນ.

• ຜູ້ຫຼິ້ນສາມາດປົດລ໋ອກຄວາມລັບຕ່າງໆ ໃນເກມດ້ວຍການເຄລຍເກມໃນລະດັບຄວາມຍາກ Normal ຫຼື Hard ພາຍໃນໄລຍະເວລາດັ່ງນີ້:

1. Ranking D (ເຄລຍເກມໂດຍໃຊ້ເວລາກາຍ 9 ຊົ່ວໂມງຂຶ້ນໄປ) ຈະປົດລ໋ອກກະແຈຕູ້ເສື້ອຜ້າແລະມິນິເກມ Leech Hunter
2. Ranking C (ເຄລຍເກມໂດຍໃຊ້ເວລາລະຫວ່າງ 7 ຊົ່ວໂມງ – 9 ຊົ່ວໂມງ) ຈະປົດລ໋ອກກະແຈຕູ້ເສື້ອຜ້າແລະມິນິເກມ Leech Hunter.
3. Ranking B (ເຄລຍເກມໂດຍໃຊ້ເວລາລະຫວ່າງ 5 ຊົ່ວໂມງ – 7 ຊົ່ວໂມງ) ຈະປົດລ໋ອກກະແຈຕູ້ເສື້ອຜ້າແລະມິນິເກມ Leech Hunter.
4. Ranking A (ເຄລຍເກມໂດຍໃຊ້ເວລາລະຫວ່າງ 3 ຊົ່ວໂມງເຄິ່ງ – 5 ຊົ່ວໂມງ) ຈະປົດລ໋ອກກະແຈຕູ້ເສື້ອຜ້າ, ມິນິເກມ Leech Hunter ແລະປືນ Sub-machine Gun ແບບລູກປືນບໍ່ຈຳກັດມາໃຊ້ໃນການຫຼິ້ນຮອບຕໍ່ໄປ.
5. Ranking S (ເຄລຍເກມໂດຍໃຊ້ເວລາໄວກວ່າ 3 ຊົ່ວໂມງເຄິ່ງ) ຈະປົດລ໋ອກກະແຈຕູ້ເສື້ອຜ້າ, ມິນິເກມ Leech Hunter, ປືນ Sub-machine Gun ແລະ Rocket Launcher ແບບລູກປືນບໍ່ຈຳກັດມາໃຊ້ໃນການຫຼິ້ນຮອບຕໍ່ໄປ.

• ສຳລັບມິນິເກມ Leech Hunter ຈະເປັນໂໝດພິເສດທີ່ຣີເບກກ້າ ແລະບິວລີ້ຈະຕ້ອງຊ່ອຍກັນເກັບປີງທີ່ມີໃນສາກໃຫ້ໄດ້ຫຼາຍທີ່ສຸດ ແລ້ວຈຶ່ງອອກມາປະຕູດ້ານໜ້າຄະລືຫາດເພື່ອນັບຈຳນວນປີງທີ່ເກັບໄດ້ແລ້ວມາແລກເປັນລາງວັນ ໂດຍຣີເບກກ້າຈະເກັບໄດ້ສະເພາະປີງສີຂຽວ ແລະບິວລີ້ຈະເກັບໄດ້ແຕ່ປີງສີຟ້າ, ແຕ່ວ່າໃນຫ້ອງຕ່າງໆກໍຈະມີສັດຕູເຝົ້າຢູ່ ຜູ້ຫຼິ້ນຈຶ່ງຄວນໄລ່ກຳຈັດສັດຕູທຸກຫ້ອງໃຫ້ໝົດກ່ອນແລ້ວຈຶ່ງມາເກັບປີງຮວດດຽວ ເຊິ່ງລາງວັນຕ່າງໆຂອງໂໝດ Leech Hunter ກໍຈະມີດັ່ງນີ້:

1. ເກັບປີງໄດ້ລວມ 1-29 ອັນ ຈະປົດລ໋ອກລູກປືນ Sub-machine Gun ໃຫ້ມີເກັບໄດ້ໃນໂໝດເນື່ອເລື່ອງ
2. ເກັບປີງໄດ້ລວມ 30-59 ອັນ ຈະປົດລ໋ອກປືນ Handgun ແບບລູກປືນບໍ່ຈຳກັດໃນໂໝດເນື້ອເລື່ອງ
3. ເກັບປີງໄດ້ລວມ 60-89 ອັນ ຈະປົດລ໋ອກປືນ Hunting Rifle ແບບລູກປືນບໍ່ຈຳກັດໃນໂໝດເນື້ອເລື່ອງ
4. ເກັບປີງໄດ້ລວມ 90-99 ອັນ ຈະປົດລ໋ອກປືນ Magnum Revolver ແບບລູກປືນບໍ່ຈຳກັດໃຫ້ເກັບໄດ້ໃນໂໝດເນື້ອເລື່ອງ
5. ເກັບປີງໄດ້ຄົບ 100 ອັນ ຈະເຮັດໃຫ້ປືນທຸກຊະນິດໃນໂໝດເນື້ອເລື່ອງມີລູກປືນໃຫ້ໃຊ້ບໍ່ຈຳກັດ

ທີ່ມາ:online station,ເດັກລາວ