ວັນທີ 7 ກໍລະກົດ 2016 ໄດ້ມີ ກອງປະຊຸມການລົງເຜີຍແຜ່ແນະນຳ ແລະ ຊຸກຍູ້ການສ້າງແຜນພັດທະນາເສດຖະກິດ-ສັງຄົມ ແລະແຜນການລົງທຶນຂອງລັດປະຈຳປີ 2017 ຂຶ້ນທີ່ຫ້ອງປະຊຸມຂອງພະແນກແຜນການ ແລະການລົງທຶນແຂວງຈຳປາສັກ,ໂດຍເປັນປະທານຮ່ວມຂອງທ່ານ ສຸພັນ ແກ້ວມີໄຊ ລັດຖະມົນຕີວ່າການກະຊວງແຜນການ ແລະການລົງທຶນ, ທ່ານ ບຸນຖອງ ດີວິໄຊ ເຈົ້າແຂວງໆຈຳປາສັກ, ມີບັນດາທ່ານຫົວໜ້າກົມ, ທ່ານຮອງເຈົ້າແຂວງ, ຫົວໜ້າພະແນກ, ຮອງພະແນກ, ທ່ານເຈົ້າເມືອງ, ບັນດາທ່ານນັກວິຊາການທີ່ກ່ຽວຂອງ ຈາກ 4 ແຂວງເຂົ້າຮ່ວມ.
ກອງປະຊຸມຄັ້ງນີ້ ແມ່ນເພື່ອສະຫຼຸບຕີລາຄາຄືນວຽກງານການຈັດຕັ້ງປະຕິບັດຜ່ານມາຂອງບັນດາພາກສ່ວນກ່ຽວຂ້ອງກໍຄືວຽກງານການລົງທຶນຂອງລັດໃນ 4 ແຂວງພາກໃຕ້, ໂດຍສະເພາະແມ່ນການສະຫຼຸບຄືນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະແຜນງົບປະມານ 9 ເດືອນ, ຄາດຄະເນການຈັດຕັ້ງປະຕິບັດໝົດສົກປີ 2015-2016 ແລະການກະກຽມສ້າງແຜນການ ແລະແຜນງົບປະມານປະຈຳປີ 2017, ຂອງຄຳສັ່ງນາຍົກລັດຖະມົນຕີ ແລະບົດແນະນຳຂອງທ່ານລັດຖະມົນຕີວ່າການກະຊວງແຜນການ ແລະການລົງທຶນ, ກົດໝາຍວ່າດ້ວຍການລົງທຶນສະບັບປັບປຸງໃໝ່ຂອງສະພາແຫ່ງຊາດ ໃຫ້ປາກົດຜົນເປັນຈິງ.
ພ້ອມດຽວກັນນີ້ ໃນກອງປະຊຸມຍັງໄດ້ເຜີຍແຜ່ກ່ຽວກັບກົດໝາຍການລົງທຶນ ຂອງລັດ, ແນະນຳກ່ຽວກັບການປະເມີນການລົງທຶນຂອງລັດ, ເຜີຍແຜ່ແນະນຳກ່ຽວກັບວຽກງານການສົ່ງເສີມການລົງທຶນຂອງເອກະຊົນ, ເຜີຍແຜ່ແນະນຳກ່ຽວກັບວຽກງານການລະດົມທຶນພາກເອກະຊົນ ແລະເຜີຍແຜ່ກ່ຽວກັບວຽກງານກວດກາອື່ນໆ.
ທ່ານ ສຸພັນ ແກ້ວມີໄຊ ກ່າວວ່າ: ກອງປະຊຸມໃນຄັ້ງນີ້ແມ່ນມີຄວາມໝາຍຄວາມສຳຄັນຫລາຍ, ເນື່ອງຈາກວ່າປະຈຸບັນກຳລັງພ້ອມກັນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ ແລະການຈັດຕັ້ງຜັນຂະຫຍາຍກອງປະຊຸມໃຫຍ່ຂອງອົງຄະນະພັກແຂວງ, ດັ່ງນັ້ນ ພວກເຮົາຈະໄດ້ຮ່ວມກັນປຶກສາຫາລືກັນຫຼາຍບັນຫາຕົ້ນຕໍ, ໂດຍສະເພາະແມ່ນການສ້າງແຜນການພັດທະນາເພື່ອນຳເອົາ 4 ແຂວງພາກໃຕ້ໄປສູ່ບາດລ້ຽວໃໝ່ຂອງການພັດທະນາ, ປະກອບສ່ວນໃນການເຮັດໃຫ້ແຜນ 5 ປີຂອງແຂວງ ໄດ້ຮັບຜົນສຳເລັດ, ດັ່ງນັ້ນເພື່ອເຮັດໃຫ້ແຜນງານດັ່ງກ່າວໄປຕາມເປົ້າໝາຍທີ່ວາງໄວ້ພວກເຮົາຕ້ອງໄດ້ຈັດຕັ້ງປະຕິບັດໃຫ້ມີຄວາມຊັດເຈນ, ເປັນເອກະພາບ ແລະມີປະສິດທິຜົນສູງ.
ທີ່ມາ: ເສດຖະກິດ-ສັງຄົມ