ເມື່ອບໍ່ດົນມານີ້, ທາງໂຄງການພັດທະນາຕົວເມືອງຕາມແລວເສດຖະກິດຕາເວັນອອກ-ຕາເວັນຕົກ ໄດ້ຮ່ວມກັບຫ້ອງການໂຍທາທິການ ແລະຂົນສົ່ງເມືອງພີນ ໄດ້ຈັດກອງປະຊຸມຜ່ານແບບແຕ້ມການສ້າງເສັ້ນທາງອ້ອມຕົວເມືອງຂອງເມືອງພີນຂຶ້ນໂດຍການເຂົ້າຮ່ວມຂອງທ່ານ ສະແຫວງ ນັນທະວົງ ຮອງເຈົ້າເມືອງໆພີນ, ທ່ານ ຄຳຕັນ ນັນທະເສນ ຫົວໜ້າຫ້ອງການ ຍທຂ ເມືອງ, ມີທ່ານ ພົມມາ ວົງພະຈິດ ຮອງຫົວໜ້າໂຄງການພັດທະນາຕົວເມືອງມີອຳນາດການປົກຄອງບ້ານ ແລະພໍ່ແມ່ປະຊາຊົນທີ່ຢູ່ ໃນຂອບເຂດການກໍ່ສ້າງເຂົ້າຮ່ວມຮັບຟັງນຳ.
ໂດຍປະຕິບັດຕາມແຜນພັດທະນາ ຂອງແຂວງສະຫວັນນະເຂດກໍຄື 3 ຕົວເມືອງທີ່ນອນຕາມແລວເສດຖະກິດຕາເວັນອອກ-ຕາເວັນຕົກຄື: ເມືອງໄກສອນ ພົມວິຫານ, ເມືອງພີນ ແລະເມືອງເຊໂປນ (ບ້ານແດນສະຫວັນ) ດັ່ງນັ້ນ, ຈິ່ງໄດ້ມີ ການຈັດກອງປະຊຸມດັ່ງກ່າວຂຶ້ນທັງນີ້ກໍເພື່ອເປັນການຜ່ານແບບແຕ້ມການກໍ່ສ້າງໃນເບື້ອງຕົ້ນ ພ້ອມທັງມີການປຶກ ສາຫາລືແລກປ່ຽນຄຳຄິດເຫັນກ່ຽວກັບ ແບບດັ່ງກ່າວ ເພື່ອໃຫ້ມີຄວາມຖືກຕ້ອງເໝາະສົມແທດເໝາະກັບສະພາບຄວາມ ເປັນຈິງຂອງການພັດທະນາ ຕາມການ ອອກແບບເສັ້ນທາງອ້ອມຕົວເມືອງຂອງ ເມືອງພີນນີ້ລວມມີມູນຄ່າການກໍ່ສ້າງໃນ ເບື້ອງຕົ້ນ 5,6 ລ້ານກວ່າໂດລາສະຫະ ລັດ ໂດຍທາງດັ່ງກ່າວມີຄວາມກວ້າງ 07 ແມັດ, ຍາວ 9.978 ແມັດ ສ່ວນລະດັບ ຂອງທາງແມ່ນລະບົບອັດແໜ້ນ ແລະປູດ້ວຍຢາງ, ທັງສອງຂອບທາງແມ່ນມີໄຟ ເຍືອງຕະຫຼອດເສັ້ນສຳລັບທຶນໃນການກໍ່ສ້າງໂດຍໄດ້ຮັບການຊວ່ຍເຫຼືອຈາກ ໂຄງການ ADB ແລະໂຄງການນີ້ຈະໄດ້ລົງມືກໍ່ສ້າງພາຍຫຼັງການຜ່ານແບບເປັນ ທີ່ຮຽບຮ້ອຍ ແລະຄາດວ່າຈະໄດ້ລົງມື ແລະໃຫ້ສຳເລັດໃນສົກ 2016-2017 ທີ່ຈະເຖິງນີ້.
ທີ່ມາ: ເສດຖະກິດ-ສັງຄົມ