ບໍ່ແມ່ນແຕ່ອາຫານຈານດ່ວນ ເປັນຕົ້ນວ່າ ເບເກີລີ, ເຂົ້າໜົມອົບ, ເຂົ້າໜົມຫວານ, ນ້ຳຫວານ, ນ້ຳອັດລົມເທົ່ານັ້ນທີ່ເປັນອັນຕະລາຍຕໍ່ຮ່າງກາຍເທົ່ານັ້ນ ແຕ່ອາຫານທີ່ເຈືອປົນສານປຸງແຕ່ງອື່ນໆ ເຊັ່ນ ສານແຕ່ງລົດແຕ່ງກິ່ນ, ສານໃຫ້ຄວາມຫວານ, ແປ້ງນົວ, ຜັກທີ່ມີຢາຂ້າແມງໄມ້ ຫລືອາຫານສຳເລັດຮູບທີ່ໃສ່ສານກັນບູດທັງຫລາຍ ຊີ້ນສັດທີ່ກິນກັນທຸກມື້ນີ້ກໍເຕັມໄປດ້ວຍສານເຄມີ ເພາະວ່າການລ້ຽງໃນອຸດສາຫະກຳ ສານພິດຈາກອາຫານເຫລົ່ານີ້ ເປັນສານທີ່ກໍ່ໃຫ້ເກີດໂລກມະເຮັງ ແລະໂລກອື່ນໆແກ່ຮ່າງກາຍ.
ພາຊະນະທີ່ໃສ່ອາຫານຕ່າງໆ ເຊັ່ນ ພາສະຕິກ, ອະລູມີນຽມ ຕ່າງກໍມີຜົນຕໍ່ກັຍຮ່າງກາຍເຮົາທັງນັ້ນ ເພາະພາຊະນະເຫລົ່ານີ້ສາມາດກໍ່ໃຫ້ເກີດສານປົນເປື້ອນໃນອາຫານ ພາສະຕິກທຸກຊະນິດເປັນອັນຕະ ລາຍ ເຖິງວ່າຈະເປັນພາສະຕິກໃສໆ ບໍ່ມີສີ ກໍບໍ່ແມ່ນຈະປອດໄພ ເຖິງຈະບໍ່ໄດ້ໃສ່ຂອງຮ້ອນໂດຍກົງ ແຕ່ອຸນຫະພູມ ຫລືແສງແດດ ກໍພຽງພໍທີ່ຈະເຮັດໃຫ້ສານລະລາຍຈາກພາສະຕິກອອກມາປົນເປື້ອນກັບອາຫານ ແລ້ວສົ່ງຜົນໃຫ້ເກີດໂລກ ເມື່ອໃຊ້ໝໍ້ກະທະອະລູມີນຽມໄປດົນໆ ໝໍ້ຈະຖືກກັດບາງລົງເລື້ອຍໆ ສ່ວນທີ່ເສຍໄປນັ້ນ ໄດ້ໄປປະສົມກັບອາຫານທີ່ເຮົາກິນຮຽບຮ້ອຍແລ້ວ ອະລູມີນຽມອາດຈະເປັນສາເຫດໃຫ້ເກີດໂລກສະໝອງຝໍ່, ໄຂຂໍ້ອັກເສບ, ອັນໄຊເມີ ພາຊະນະທີ່ໃຊ້ໃນການປຸງອາຫານທີ່ດີທີ່ສຸດຄື ໝໍ້ດິນ ຮອງລົງມາຄືໝໍ້ທອງເຫລືອງ ແຕ່ຖ້າໃຫ້ປອດໄພທີ່ສຸດຄື ບໍ່ຕ້ອງປຸງອາຫານເລີຍ ກິນໝາກໄມ້ ແລະຜັກສົດໃນປະລິມານທີ່ສົມດຸນ ພໍດີ ກໍພຽງພໍຕໍ່ກັບຄວາມຕ້ອງການຂອງຮ່າງກາຍແລ້ວ.
ນອກຈາກນີ້ ຍັງມີສານເຄມີອີຢ່າງຫລວງຫລາຍທີ່ເຮົາຮັບເຂົ້າສູ່ຮ່າງກາຍ ເປັນຕົ້ນວ່າເຄື່ອງຂອງທີ່ຊົມໃຊ້ໃນຊີວິດປະຈຳວັນ ນັບຕັ້ງແຕ່ຕື່ນນອນຕົນເຖິງເຂົ້ານອນ ເລີ່ມຕັງແຕ່ຢາສີແຂ້ວ, ສະບູ່, ໂລຊັ້ນ, ເຄື່ອງສຳອາງ ໆລໆ ຜະລິດຕະພັນເຫລົ່ານີ້ ລ້ວນແຕ່ມີສ່ວນປະກອບຂອງສານເຄມີ ເຊິ່ງເປັນອັນຕະລາຍຕໍ່ຮ່າງກາຍ ພວກເຮົາຄວນຫັນມານຳໃຊ້ເຄື່ອງມືຈາກທຳມະຊາດແທນ ຖ້າຫລີກລຽງບໍ່ໄດ້ແທ້ໆ ເລື່ອງອາຫານການກິນກໍຄວນກິນຂອງທີ່ມາຈາກທຳມະຊາດ ເພາະຮ່າງກາຍຂອງມະນຸດນັ້ນກຳເນີດມາຈາກທຳມະຊາດ ເຮົາຈຶ່ງຄວນໃຊ້ແຕ່ສິ່ງທີ່ມາຈາກທຳມະຊາດ ແລະຜ່ານຂະບວນການຜະລິດໃຫ້ນ້ອຍທີ່ສຸດ.