ໃນໄລຍະສາມເດືອນຕົ້ນປີນີ້ ຫຼື ໃນຮອບໄຕມາດ I ທົ່ວລະບົບທະນາຄານໃນສີ່ແຂວງພາກໃຕ້ ມີຍອດເງິນຝາກຫຼຸດລົງຖ້າທຽບໃສ່ທ້າຍປີຜ່ານມາ ໃນຂະນະທີ່ການກູ້ສິນເຊື່ອມີອັດຕາເພີ່ມຂຶ້ນຢ່າງສູງ ໂດຍສະເພາະຢູ່ແຂວງຈຳປາສັກກວມເອົາອັດຕາສູງກວ່າໝູ່ດ້ານຫົວໜ້າທະນາຄານແຫ່ງ ສປປ ລາວ ພາກໃຕ້ເຜີຍ: ສາເຫດທີ່ເຮັດໃຫ້ລູກຄ້າເຂົ້າມາຝາກເງິນຫຼຸດລົງນັ້ນ ອາດເກີດຈາກສະພາບທາງດ້ານການເງິນຂອງລັດມີບັນຫາ ແລະການປັບຫຼຸດອັດຕາດອກເບ້ຍເງິນ ຝາກລົງຂອງບັນດາທະນາຄານ.
ທ່ານ ນະ ຈັນຕະລິວົງ ຫົວໜ້າທະນາຄານແຫ່ງ ສປປ ລາວພາກໃຕ້ ໄດ້ເປີດເຜີຍຕໍ່ນັກຂ່າວເສດຖະກິດ-ສັງຄົມ ປະຈຳແຂວງ ເມື່ອບໍ່ດົນມານີ້ໃຫ້ຮູ້ວ່າ: ຜ່ານການຈັດຕັ້ງປະຕິບັດໜ້າທີ່ຕົວຈິງໃນການລະດົມທຶນ, ການຮັບຝາກກະແສລາຍວັນ, ປະຢັດ ແລະຝາກມີກຳນົດຂອງບັນດາທະນາຄານຕ່າງໆທີ່ຂຶ້ນກັບການຄຸ້ມຄອງດູແລຂອງ ທຫລ ພາກໃຕ້ ໃນ 3 ເດືອນຕົ້ນປີ ຫຼື ໃນຮອບໄຕມາດ I ປີ 2016, ຕົວເລກເງິນຝາກທົ່ວລະບົບທະນາຄານມີທັງໝົດ 4.810 ຕື້ກີບ, ເພີ່ມຂຶ້ນ 12,47%, ທຽບໃສ່ໄລຍະດຽວຂອງປີ 2015 ຫຼຸດລົງ 2 ກວ່າ%, ໃນນັ້ນແຂວງຈຳປາສັກໄດ້ກວມເອົາກວ່າ 65% ຂອງ ເງິນຝາກທັງໝົດ ຫຼື ເທົ່າກັບ 3.148 ຕື້ ກີບ ຊຶ່ງຍັງເປັນແຂວງທີ່ມີອັດຕາສ່ວນເງິນຝາກຂະຫຍາຍຕົວໃນລະດັບດີ, ຮອງລົງມາແມ່ນແຂວງອັດຕະປື, ສາລະວັນ ແລະແຂວງເຊກອງ.
ສຳລັບວຽກງານການໃຫ້ສິນເຊື່ອມາຮອດທ້າຍເດືອນມີນາ 2016 ລວມຍອດສິນເຊື່ອທະນາຄານມີທັງໝົດ 5.870 ຕື້ກີບ, ເພີ່ມຂຶ້ນ 3,59% ທຽບໃສ່ທ້າຍປີ 2015 ຊຶ່ງເຫັນວ່າມີການຂະຫຍາຍຕົວ ພໍສົມຄວນສຳລັບທ້ອງຖິ່ນ ໂດຍສະເພາະແມ່ນແຂວງຈຳປາສັກ ກວມເອົາ 55,72% ຂອງການໃຫ້ສິນເຊື່ອທັງໝົດ, ຮອງລົງມາແມ່ນແຂວງອັດຕະປືກວມກວ່າ 24% ຖ້າທຽບໃສປີ 2015 ເຫັນວ່າຫຼຸດລົງ, ເນື່ອງຈາກວ່າປີຜ່ານມາແຂວງອັດຕະປື ເປັນແຂວງທີ່ກູ້ຢືມເງິນຫຼາຍກວ່າແຂວງອື່ນໆໃນບັນດາແຂວງພາກໃຕ້.
ທ່ານກ່າວຕື່ມວ່າ: ສາເຫດທີ່ເຮັດໃຫ້ຍອດເງິນຝາກຫຼຸດລົງຈາກປີຜ່ານມານັ້ນບັນຫາທີໜຶ່ງອາດເກີດສະພາບທາງດ້ານເງິນຂອງລັດມີບັນຫາ ແລະການຫຼຸດອັດຕາດອກເບ້ຍເງິນຝາກລົງກໍເປັນປະເດັນເຊັ່ນດຽວກັນ.
ປະຈຸບັນມີສາຂາທະນາຄານທຸລະກິດທີ່ຢູ່ໃນການຄຸ້ມຄອງຂອງ ທຫລ ພາກໃຕ້ມີທັງໝົດ 24 ສາຂາ, ມີ 74 ໜ່ວຍບໍລິການ, ໃນນັ້ນ ມີສາຂາທະນາຄານທຸລະກິດລັດ12 ແຫ່ງ, ທະນະຄານສະເພາະກິດລັດ 2 ແຫ່ງ, ທະນາການຮ່ວມທຶນ 2 ແຫ່ງ, ທະນາຄານເອກະຊົນ 3 ແຫ່ງ ແລະສາຂາທະນາການທຸລະກິດໃນເຄືອຂ່າຍຂອງຕ່າງປະເທດ 2 ແຫ່ງ, ມີລວມ ຍອດຊັບສິນທັງໝົດຈຳນວນ 5.870 ຕື້ ກີບ, ເພີ່ມຂຶ້ນ 3,60% ທຽບໃສ່ທ້າຍປີ 2015.
ທີ່ມາ: 