ເມື່ອທ້າຍເດືອນມີຖຸນາຜ່ານມາ, ທ່ານ ກົ້ງເຮີ່ ເຮີ່ຈະເລີນ ຫົວໜ້າພະແນກສິ່ງແວດລ້ອມ ແລະ ສັງຄົມ ທີ່ປະຕິບັດງານປະຈຳໂຄງການກໍ່ສ້າງ ເຂື່ອນດອນສະໂຮງ ເມືອງໂຂງ ແຂວງຈຳປາສັກ ໄດ້ຢັ້ງຢືນຕໍ່ສື່ມວນຊົນວ່າ: ເຂື່ອນແຫ່ງນີ້ເປັນເຂື່ອນທີ່ດີທີ່ສຸດໃນ ສປປ ລາວ ຫຼື ອາດເວົ້າໄດ້ວ່າດີທີ່ສຸດໃນໂລກ. ໃນຖານະຜູ້ເຮັດວຽກຢູ່ ພາກສະໜາມກວ່າສອງປີ, ທ່ານ ກົ້ງເຮີ່ ເຮີ່ຈະເລີນ ສາມາດຊີ້ແຈງເຖິງຄຸນລັກສະນະ, ປະສິດທິພາບ, ຜົນກະທົບດ້ານສິ່ງແວດລ້ອມ ແລະ ສັງຄົມ ຂອງເຂື່ອນໄຟຟ້າດອນສະໂຮງ ໄດ້ຢ່າງຊັດເຈນ ໂດຍສະເພາະບັນຫາຜົນກະທົບດ້ານສິ່ງແວດລ້ອມ ແລະ ສັງຄົມ ຊຶ່ງທ່ານໃຫ້ເຫດຜົນວ່າ: ເຂື່ອນໄຟຟ້າດອນສະໂຮງ ມີຜົນກະທົບຕໍ່ສິ່ງແວດລ້ອມ ແລະ ສັງຄົມໜ້ອຍ ແຕ່ມີປະສິດທິພາບສູງ ຖ້າທຽບກັບເຂື່ອນໄຟຟ້າຫຼາຍແຫ່ງຢູ່ ລາວ ແລະ ຫຼາຍປະເທດໃນໂລກ ຕົວຢ່າງ: ເຂື່ອນດອນສະໂຮງ ມີຂະໜາດອ່າງເກັບນ້ຳພຽງ 2,8 ກິໂລແມັດມົນທົນ ແຕ່ກຳລັງຕິດຕັ້ງສູງເຖິງ 360 ເມກາວັດ ຖ້າທຽບໃສ່ເຂື່ອນໄຟຟ້ານ້ຳງື່ມ I ຢູ່ແຂວງວຽງຈັນ ທີ່ມີອ່າງກັບນ້ຳ 470 ກິໂລແມັດມົນທົນ, ກຳລັງຕິດຕັ້ງໄດ້ພຽງ 150 ເມກາວັດ ແລະ ອີກຫຼາຍເຂື່ອນ ກໍມີລັກສະນະອ່າງເກັບນ້ຳກວ້າງ ແຕ່ກຳລັງການຜະລິດຕ່ຳ, ສ່ວນດ້ານສິ່ງແວດລ້ອມ ໃນເຂດເຂື່ອນດອນສະໂຮງ ກໍເຫັນວ່າມີຜົນກະທົບໜ້ອຍທີ່ສຸດ ເຊັ່ນ: ປະຊາຊົນມີພຽງ 14 ຫຼັງຄາເຮືອນ ຕ້ອງຍ້າຍອອກຈາກເຂດກໍ່ສ້າງເຂື່ອນ ໄປຕັ້ງຖິ່ນຖານໃໝ່ຫ່າງ ຈາກບ້ານເດີມພຽງ 1 ກິໂລແມັດກວ່າໆ, ບັນຫາທາງປາຂຶ້ນ-ລົງ ໃນບໍລິເວນດັ່ງກ່າວ ກໍໄດ້ຮັບການປັບປຸງ ໃຫ້ສະດວກກວ່າເກົ່າ ຍ້ອນມີການທຳລາຍສິ່ງກີດຂວາງ ແລະ ເລີກຮື້ເຄື່ອງມືຫາປາທີ່ຜິດກົດໝາຍ, ຈັດລະບຽບການຫາປາ ໃຫ້ສອດຄ່ອງກັບກົດໝາຍ ແລະ ອື່ນໆ ຈົນສາມາດຮັກສາຄວາມສົມດຸນຂອງ ຊີວະນາໆພັນທາງນ້ຳໄດ້ເປັນຢ່າງດີ, ປັດຈຸບັນປາຢູ່ດ້ານເທິງຂອງເຂື່ອນນັບມື້ນັບຫຼາຍ, ພຽງແຕ່ຂໍ້ມູນບາງດ້ານ ກໍສາມາດເວົ້າໄດ້ວ່າ: ເຂື່ອນໄຟຟ້າດອນສະໂຮງ ເປັນເຂື່ອນທີ່ດີທີ່ສຸດ.
ເຂື່ອນໄຟຟ້າດອນສະໂຮງ ມີກຳນົດການກໍ່ສ້າງແຕ່ທ້າຍປີ 2015 ຮອດທ້າຍປີ 2019 ໃຫ້ສຳເລັດ ແລະ ຜະລິດກະແສໄຟຟ້າຢ່າງເປັນທາງການ ເພື່ອສົ່ງຂາຍໃຫ້ປະເທດເພື່ອນບ້ານເປັນສ່ວນໃຫຍ່ ແລະ ສ່ວນໜຶ່ງ ແມ່ນຊົມໃຊ້ພາຍໃນ.
ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!