spot_img
Homeຂ່າວພາຍ​ໃນທຫລ ພາກໃຕ້ສົ່ງເສີມ ແລະ ຄຸ້ມຄອງສະຖາບັນການເງິນ

ທຫລ ພາກໃຕ້ສົ່ງເສີມ ແລະ ຄຸ້ມຄອງສະຖາບັນການເງິນ

Published on

ທະ­ນາ­ຄານ​ແຫ່ງ ສປປ ລາວ ພາກ​ໃຕ້​ແຂວງ​ຈຳ­ປາ​ສັກ ໄດ້​ເອົາ­ໃຈ­ໃສ່​ຢ່າງ​ຈິງ​ຈັງ ຕໍ່​ວຽກ​ງານ​ການ​ສົ່ງ­ເສີມ ແລະການ​ຄຸ້ມ​ຄອງ​ບັນ­ດາ​ສະ​ຖາບັນ​ການ​ເງິນ​ຈຸ​ລະ​ພາກ ແລະສະ­ຫະ­ກອນ​ສິນ​ເຊື່ອ​ໃຫ້​ມີ​ຄວາມ​ເຂັ້ມ­ແຂງ​ບົນ​ທ່າ­ແຮງ​ໃນ​ການ​ໝູນ​ໃຊ້ແຫຼ່ງ​ທຶນ​ທ້ອງ​ຖີ່ນ​ພັດ­ທະ­ນາ​ເສດ­ຖະ­ກິດ ພ້ອມ​ກ້າວ​ຍົກ​ລະ­ດັບ​ກາຍ­ເປັນ​ສະ­ມາ­ຄົມ ທີ່​ມີ​ຄວາມ​ເຂັ້ມ­ແຂງ​ໃນການ​ໃຫ້​ສິນ​ເຊື່ອ.

ທ່ານ ນະ ຈັນ​ຕະ​ລິ​ວົງ ຫົວ­ໜ້າ​ທະ​ນາຄານ​ແຫ່ງ ສປປ ລາວ​ພາກ​ໃຕ້, ໄດ້​ໃຫ້ສຳ­ພາດ​ຕໍ່​ນັກ​ຂ່າວ​ໜັງ­ສື­ພິມ​ເສດ­ຖະ­ກິດ-ສັງ­ຄົມ ປະ­ຈຳ​ແຂວງ​ໃຫ້​ຮູ້­ເມື່ອ​ບໍ່​ດົນ​ມານີ້​ວ່າ: ທະ­ນາ­ຄານ​ແຫ່ງ ສປປ ລາວ ພາກ​ໃຕ້ແມ່ນ​ເປັນ​ເສ­ນາ​ທິ​ການ​ໃຫ້​ຄະ­ນະ​ຜູ້​ວ່າ­ການ​ທະ­ນາ­ຄານ​ແຫ່ງ ສປປ ລາວ ກ່ຽວ​ກັບ​ວຽກ​ງານ​ການ​ເງິນ, ເງິນ­ຕາ ແລະ​ເປັນ​ທີ່​ປຶກ­ສາ​ທາງ​ດ້ານ​ການ​ເງິນໆ ຕາ​ໃຫ້​ແກ່​ອຳ­ນາດ​ການ​ປົກ­ຄອງ​ທ້ອງ​ຖີ່ນ​ຢູ່​ໃນ 4 ແຂວງ​ພາກ​ໃຕ້, ຊຶ່ງ​ມີ­ໜ້າ ທີ່​ຫຼັກໆ​ແມ່ນ​ປະ­ກອບ­ສ່ວນ​ໃນ​ການ​ຮັກສາ​ສະ­ຖຽນ​ລະ​ພາບ​ເງິນ­ຕາ​ຂອງ​ຊາດ ໃຫ້​ມີ​ຄວາມ​ໝັ້ນ​ທ່ຽງ, ຄຸ້ມ​ຄອງ​ບັນ­ດາທະ­ນາ­ຄານ ແລະ​ສະ​ຖາ​ບັນ​ການ​ເງິນ​ໃຫ້​ມີ​ຄວາມ​ເຂັ້ມ­ແຂງ, ໂດຍ​ສະ­ເພາະ​ແມ່ນ​ຄຸ້ມ​ຄອງ​ບັນ­ດາ​ທະ­ນາ­ຄານ​ທີ່​ມາ​ເຄື່ອນໄຫວ​ທຸ­ລະ​ກິດ​ຢູ່​ພາຍ​ໃນ 4 ແຂວງ​ພາກໃຕ້ ແລະ​ບັນ­ດາ​ສະ​ຖາ​ບັນ​ການ​ເງິນ​ທີ່ເຄື່ອນ​ໄຫວ​ທຸ­ລະ​ກິດ.

ປະ­ຈຸ​ບັນ​ຢູ່ 4 ແຂວງ​ພາກ​ໃຕ້​ມີ​ສາ­ຂາທະ­ນາ­ຄານ​ທຸ­ລະ​ກິດ​ທັງ​ໝົດ 24 ສາ­ຂາ, ມີ 74 ໜ່ວຍ​ບໍ­ລິ­ການ, ມີ​ສະ​ຖາ​ບັນ​ການ ເງິນ​ຈຸ​ລະ​ພາກ​ທີ່​ເຄື່ອນ​ໄຫວ​ຢູ່​ພາຍ​ໃຕ້​ການ​ຄຸ້ມ​ຄອງ​ດູ​ແລ​ທັງ​ໝົດ 16 ແຫ່ງ, ໃນ​ນັ້ນ​ມີ​ສະ­ຫະ­ກອນ​ສິນ​ເຊື່ອ ແລະ​ເງິນຝາກ​ປະ­ຢັດ 8 ແຫ່ງ, ສະ​ຖາ​ບັນ​ການ​ເງິນຈຸ​ລະ​ພາກ​ບໍ່​ຮັບ​ເງິນ​ຝາກ 3 ແຫ່ງ, ສະ​ຖາບັນ​ການ​ເງິນ​ຈຸ​ລະ​ພາກ​ທີ່​ຮັບ​ເງິນ​ຝາກ 1 ແຫ່ງ, ໂຮງ​ຊວດ​ຈຳ 2 ແຫ່ງ ແລະບໍ­ລິ­ສັດ​ເຊົ່າ​ສິນ​ເຊື່ອ 2 ແຫ່ງ, ສ່ວນ​ໃຫຍ່​ແມ່ນ​ໄດ້​ເຄື່ອນ​ໄຫວ​ທຸ­ລະ​ກິດ​ພາຍ​ໃນ ແຂວງ​ຈຳ­ປາ​ສັກ ຊຶ່ງ​ບັນ­ດາ​ສະ​ຖາ​ບັນ​ການ​ເງິນ​ດັ່ງ­ກ່າວ​ສ່ວນ​ໃຫຍ່​ແມ່ນ​ເກີດມາ​ຈາກ​ກອງ​ທຶນ​ພັດ­ທະ­ນາ​ບ້ານ, ມີ​ກອງ​ທຶນ​ບ້ານ​ທັງ​ໝົດ 517 ກອງ​ທຶນ, ຂອງ​ຈຳນວນ 666 ບ້ານ, ຕາມ​ການລົງ​ເກັບ​ກຳ​ຂໍ້​ມູນ​ໃນ​ເບື້ອງ​ຕົ້ນ​ແມ່ນ​ມີ​ມູນ​ຄ່າ​ທັງ​ໝົດ 96 ຕື້​ກີບ, ພາຍ­ຫຼັງ​ທີ່​ໄດ້​ມີ​ການ​ປັບ­ປຸງ, ເກັບ​ກຳ​ຂໍ້​ມູນ ແລະ​ລົງ​ສຳ​ຫຼວດ​ເອົາ​ຈຳນວນ​ສະ­ມາ­ຊິກ ແລະ​ຄັດ​ເລືອກ​ເອົາ​ກອງທຶນ​ໃດ​ທີ່​ເຫັນ​ວ່າ​ສາ­ມາດ​ຍົກ​ລະ­ດັບ​ເປັນສະ​ຖາ​ບັນ​ການ​ເງິນ​ຈຸ​ລະ​ພາກ​ໄດ້, ດັ່ງ ນັ້ນ​ມາ​ໃນ​ຕົ້ນ​ປີ 2016 ພວກ​ເຮົາ​ສາ­ມາດສະ­ຫຼຸບ​ຍອດ​ຊັບ​ສິນ​ຂອງ​ທັງ​ໝົດ 16 ແຫ່ງ ມີ​ຈຳ­ນວນ​ເງິນ 85 ຕື້​ກີບ, ໃນ​ນັ້ນ ຂອງສະຫະ­ກອນ​ສິນ​ເຊື່ອ ແລະ​ຮັບ​ເງິນ​ຝາກປະ­ຢັດ​ມີ​ປະ­ມານ 22 ຕື້​ກີບ, ຊຶ່ງ​ສ່ວນ​ໃຫຍ່ແມ່ນ​ຂອງ​ສະ​ຖາ​ບັນ​ການ​ເງິນ​ຈຸ​ລະ​ພາກທີ່​ຮັບ​ເງິນ​ຝາກ​ປະ­ມານ 50 ຕື້​ກີບ.

ທ່ານ ນະ ຈັນ​ຕະ​ລິ​ວົງ ໃຫ້​ຮູ້​ຕື່ມ​ວ່າ: ຄຽງ​ຄູ່​ກັບ​ການ​ສົ່ງ­ເສີມ​ບັນ­ດາ​ສະ​ຖາບັນ​ການ​ເງິນ​ໃຫ້​ມີ​ຄວາມ​ເຂັ້ມ­ແຂງ​ແລ້ວ ທະ­ນາ­ຄານ​ແຫ່ງ ສປປ ລາວ ພາກ​ໃຕ້ ຍັງ​ໄດ້​ເອົາ­ໃຈ­ໃສ່​ໃນ​ການ​ຄຸ້ມ​ຄອງ​ຕິດຕາມ​ຢ່າງ​ເປັນ​ປະ­ຈຳ​ໃນ​ແຕ່​ລະ 3 ເດືອນ 6 ເດືອນ ແລະ​ປະ­ຈຳ​ປີ, ນອກ­ຈາກ​ນີ້​ບັນດາ​ສະ​ຖາ​ບັນ​ການ​ເງິນ​ຍັງ​ໄດ້​ສົ່ງ​ລາຍ​ງານ ເພື່ອ​ໃຫ້​ສາ­ມາດ​ຕິດ­ຕາມ​ການ​ເຄື່ອນໄຫວ​ຢ່າງ​ເປັນ​ປົກ­ກະ­ຕິ, ຊຶ່ງ​ເຮັດ​ໃຫ້​ສາ­ມາດ​ມີ​ສະ­ຫະ­ກອນ​ສິນ​ເຊື່ອ​ດີ­ເດັ່ນ​ໃນ​ການ­ເຄື່ອນ­ໄຫວ​ທຸ­ລະ​ກິດ​ຄື: ສະ­ຫະ­ກອນ​ສິນ​ເຊື່ອ​ເງິນ​ຝາກ​ປະ­ຢັດ​ບ້ານ​ຫົວ​ແຊຈະ­ເລີນ​ແລະ​ສະ­ຫະ­ກອນ​ສິນ​ເຊື່ອ​ເງິນ​ຝາກ​ປະ­ຢັດ​ບ້ານ​ໜອງ​ໄຮ​ໂຄກ​ສອງ​ສາມ​ປີ​ຊ້ອນ, ປະ­ຈຸ​ບັນ​ແມ່ນ​ໄດ້​ສຶບ​ຕໍ່​ໃນ​ການເອົາ­ໃຈ­ໃສ່​ຕິດ­ຕາມ​ດູ​ແລ​ຄຸ້ມ​ຄອງ​ການ​ບໍ­ລິ­ຫານ​ຂອງ​ສະ​ຖາ​ບັນ​ການ​ເງິນ​ຈຸ​ລະ​ພາກ​ໃຫ້​ມີ​ຄວາມ​ເຂັ້ມ­ແຂງ​ຂຶ້ນ​ກວ່າ​ເກົ່າ​ໄປ​ຄຽງ​ຄູ່​ກັບ​ກາ​ສົ່ງ­ເສີມ​ຍົກ​ລະ­ດັບ​ບັນ­ດາ​ສະ­ຫະ­ກອນ​ສິນ​ເຊື່ອ​ໃຫ້​ມີ​ຄວາມ​ເຂັ້ມ­ແຂງ​ເຊັ່ນ​ດຽວ​ກັນ ແລະ​ໃນ​ເວ­ລາ​ນີ້​ພວກ​ເຮົາ​ກຳ­ລັງ​ປັບ­ປຸງ​ຍົກ​ລະດັບ​ບັນ­ດາ​ສະ­ຫະກອນ​ໃຫ້​ກາຍ­ເປັນ​ສະ­ມາ­ຄົມ​ສິນ​ເຊື່ອ​ທີ່​ມີ​ຄວາມ​ເຂັ້ມ­ແຂງ ແລະ​ຄາດ​ວ່າ​ສະ­ມາ­ຄົມ​ດັ່ງ­ກ່າວ​ຈະ​ໃຫ້​ເກີດຢ່າງ​ເປັນ​ຮູບ​ປະ​ທຳ​ໃນ​ທ້າຍ​ປີ 2016 ນີ້.

ທີ່ມາ: logo

ບົດຄວາມຫຼ້າສຸດ

ປັບສູງສຸດ 2,000 ໂດລາ ສິງກະໂປເຂັ້ມງວດ ຈັດຢາສູບໄຟຟ້າ ຢູ່ໃນໝວດຢາເສບຕິດ

ສິງກະໂປເຂັ້ມງວດ ຈັດຢາສູບໄຟຟ້າ ຢູ່ໃນໝວດຢາເສບຕິດ ພ້ອມທັງຕັ້ງຄ່າປັບໄໝສູງສຸດ 2,000 ໂດລາ ຫຼື ປະມານ 45 ລ້ານກີບ ສຳນັກຂ່າວຕ່າງປະເທດລາຍງານໃນວັນທີ 18 ສິງຫາ 2025 ຜ່ານມາ,...

ປະຫວັດ “ບຸນຫໍ່ເຂົ້າປະດັບດິນ” ປະເພນີລາວທີ່ສືບທອດມາແຕ່ບູຮານນະການ

ວັນບຸນຫໍ່ເຂົ້າປະດັບດິນ ບຸນປະເພນີທີ່ບູຮານໄດ້ພາກັນປະຕິບັດກັນມາ ເພື່ອເປັນການອຸທິດບຸນກຸສົນ ໃຫ້ກັບຍາດຕິພີ່ນ້ອງ ຜູ້ທີ່ລ່ວງລັບໄປແລ້ວ ລວມທັງສັມພະເວສີ ຜີທີ່ບໍ່ມີຍາດ. ຄວາມ​ໝາຍ​ຄວາມ​ສໍາຄັນ​ຂອງ​ບຸນ​ຫໍ່​ເຂົ້າປະດັບດິນ: ຫໍ່​ເຂົ້າປະດັບດິນ ໝາຍ​ເຖິງ ການ​ນໍາ​ເອົາ​ອາຫານ​ຫວານ​ຄາວ ຊີ້ນ​ແຫ້ງ​ປາ​ຕາຍ, ເຂົ້າຕົ້ມເຂົ້າໜົມ, ໝາກ​ໄມ້​ນານາ​ຊະນິດ ແລະ...

ເງື່ອນໄຂ-ການປະຕິບັດນະໂຍບາຍ ຕໍ່ຄູອາສາສະໝັກ ທີ່ຈະເຂົ້າເປັນລັດຖະກອນປ້ອງກັນຊາດ

ເປີດເງື່ອນໄຂ-ການປະຕິບັດນະໂຍບາຍ ຕໍ່ຄູອາສາສະໝັກ ທີ່ຈະເຂົ້າເປັນລັດຖະກອນປ້ອງກັນຊາດ ໃນລະຫວ່າງວັນທີ 15-19 ສິງຫາ 2025 ນີ້, ຄະນະຮັບຜິດຊອບການບັນຈຸຄູອາສາສະໝັກເຂົ້າເປັນກຳລັງປ້ອງກັນຊາດ ນຳໂດຍ ທ່ານ ນາງ ຄຳພັດ ໄຊຍະລິນຄຳ ຮອງຫົວໜ້າກົມສ້າງຄູ...

ກອງປະຊຸມຄະນະກຳມະການນະໂຍບາຍເງິນຕາ ຂອງສະພາບໍລິຫານທະນາຄານແຫ່ງ ສປປ ລາວ ຄັ້ງທີ III ປະຈຳປີ 2025

ກອງປະຊຸມຄະນະກຳມະການນະໂຍບາຍເງິນຕາ ຂອງສະພາບໍລິຫານທະນາຄານແຫ່ງ ສປປ ລາວ ຄັ້ງທີ III ປະຈຳປີ 2025 ໃນອາທິດຜ່ານມາ, ທະນາຄານແຫ່ງ ສປປ ລາວ (ທຫລ) ໄດ້ຈັດກອງປະຊຸມຄະນະກຳມະການນະໂຍບາຍເງິນຕາ ຄັ້ງທີ...