ວັນທີ 29 ມິຖຸນາ ປີ 2000 ຫຼືມື້ນີ້ເມື່ອ 16 ປີທີ່ແລ້ວ ເປັນມື້ວາງຈຳໜ່າຍຂອງເກມ Street Fighter III: 3rd Strike ເກມໄຟຕິ້ງຊື່ດັງຈາກຄ້າຍ Capcom ທີ່ເຄີຍເຮັດໃຫ້ກັບຕູ້ອາເຂດຢອດຫຼຽນມາກ່ອນໃນປີ 1999, ໂດຍພາກນີ້ຍັງເຄີຍສ້າງຕຳນານໜ້າໜຶ່ງໃຫ້ກັບວົງການເກມໄຟຕິ້ງ ແລະເຮັດໃຫ້ຊື່ຂອງທ່ານໄດໂກະ ອຸເມຮາຣາ ເປັນທີ່ຮູ້ຈັກກັນໃນບັນດາເກມເມີ້ນັບຕັ້ງແຕ່ນັ້ນມາ.

ສຳລັບລະບົບຂອງ Street Fighter III: 3rd Strike ຈະມີການເພີ່ມຕື່ມໃນສ່ວນຂອງໂຕລະຄອນມາອີກ 5 ໂຕ (ເພີ່ມຈາກພາກ 2nd Impact) ໄດ້ແກ່ Chun-Li, Q, Remi, Twelve ແລະ Makoto ພ້ອມກັບປັບໃຫ້ Akuma ເປັນໂຕລະຄອນທີ່ສາມາດຫຼິ້ນໄດ້ຕັ້ງແຕ່ເລີ່ມເກມໂດຍທີ່ບໍ່ຕ້ອງປົດລ໋ອກ ແລະມີການແນະນຳລະບົບໃໝ່ທີ່ຊື່ວ່າ Judgement System ທີ່ຈະຄຳນວນຄວາມສາມາດຂອງຜູ້ຊະນະແຕ່ລະແມັດ ໂດຍອີງຈາກປະສິດທິພາບໃນການບຸກ, ການຕັ້ງຮັບ ແລະລວມເຖິງເທັກນິກທີ່ໃຊ້ລະຫວ່າງສູ້.

Fact ເລັກນ້ອຍກ່ຽວກັບເກມ Street Fighter III: 3rd Strike

• ໃນບັນດາປະໂຫຍກທີ່ໂຕລະຄອນ Chun-Li ເວົ້າເວລາຊະນະການຕໍ່ສູ້ ຈະມີປະໂຫຍກໜຶ່ງທີ່ລາວອ້າງອີງເຖິງການ “ດຶກປະຫຼັກແຂນອອກໄປ” ເຊິ່ງແຟນໆຂອງ ຊີຣີ Street Fighter ໜ້າຈະຈື່ປະໂຫຍກໜຶ່ງກັນໄດ້ວ່າໃນ Street Fighter II ເຄີຍມີມຸກຕາຫຼົກທີ່ເປັນຂ່າວລືວ່າ Chun-Li ສາມາດດຶກປະຫຼັກແຂນໄປໂຈມຕີຄູ່ຕໍ່ສູ້ໃນໄລຍະໄກໄດ້ ໂດຍຂ່າວລືດັ່ງກ່າວນັ້ນ ສຸດທ້າຍທາງ Capcom ກໍເລີຍມີການປັບໃຫ້ Chun-Li ມີທ່າໄມ້ຕາຍໂຈມຕີໄລຍະໄກທີ່ຊື່ວ່າ: “Kikkoken” ທີ່ເປັນການປ່ອຍພະລັງອອກຈາກຝາມື ເຊິ່ງທ່າ Kikkoken ນີ້ມີໃຫ້ເຫັນຄັ້ງທຳອິດໃນ Street Fighter II Turbo ນັ້ນເອງ

• ພາກນີ້ມີຊື່ເຕັມວ່າ Street Fighter III: 3rd Strike – Fight for the Future ແລະເປັນພາກຍ່ອຍທີ 3 ຂອງ Street Fighter III ໂດຍ 2 ພາກກ່ອນໜ້ານີ້ຈະໃຊ້ຊື່ວ່າ Street Fighter III: New Generation ແລະ Street Fighter III: 2nd Impact – Giant Attack ຕາມລຳດັບ ແລະຖ້ານັບລວມ Street Fighter III: 3rd Strike Online Edition ນຳ ກໍຈະເທົ່າກັບວ່າຊີຣີ Street Fighter III ນັ້ນມີພາກຍ່ອຍທັງໝົດ 4 ພາກດ້ວຍກັນ.

•  ຫາກນັບກັນຕາມ Timeline ຂອງເນື້ອເລື່ອງແລ້ວ ເຫດການໃນ Street Fighter III ຈະເກີດເປັນລຳດັບຫຼັງສຸດ ໂດຍສາມາດລຽນຕາມລຳດັບໄດ້ດັ່ງນີ້:

1. Street Fighter

2. Street Fighter Alpha (ຫຼື Street Fighter Zero ໃນເວີຊັ່ນຍີ່ປຸ່ນ)

3. Street Fighter II

4. Street Fighter IV

5. Street Fighter V

6. Street Fighter III

• Street Fighter III: 3rd Strike ເຄີຍຖືກຈັດອັນດັບໂດຍ Complex ເຊິ່ງເປັນວາລະສານຊື່ດັງແນວ Lifestyle ຈາກສະຫະລັດອາເມຣິກາວ່າເປັນເກມໄຟຕິ້ງທີ່ດີຫຼາຍແລະເປັນອັນດັບ 11 ເຊິ່ງຈັດອັນດັບໄປເມື່ອປີ 2013 ທີ່ຜ່ານມາ

• ສຳລັບໃຜທີ່ມີໂອກາດໄດ້ຫຼິ້ນໂໝດ Trial ໃນ Street Fighter III: 3rd Strike Online Edition ເທິງເຄື່ອງ PS3 ແລະ Xbox 360 ຈະພົບວ່າ 10 ພາລະກິດສຸດທ້າຍຂອງ Trial ທີ່ໃຫ້ເຮົາຝຶກການ Parry ນັ້ນມີຊື່ວ່າ EVO Moment #37 ເຊິ່ງຈະເປັນການທົດສອບສຸດມະຫາໂຫດທີ່ຜູ້ຫຼິ້ນຈະຕ້ອງເຮັດການ Parry ແບບຕໍ່ເນື່ອງໃຫ້ໄດ້ຄືກັນກັບທ່ານ ໄດໂກະ ອຸເມຮາຣາ (Daigo Umehara) ຮອງແຊ້ມຈາກການແຂ່ງຂັນ EVO 2004 ໄດ້ໃຊ້ທ່າ Parry ຕັ້ງຮັບທ່າໄມ້ຕາຍຂອງ Chun-Li ທີ່ຫຼິ້ນໂດຍ ຈັສຕິນ ຫວ່ອງ (Justin Wong) ກ່ອນທີ່ຈະສວນກັບຈົນຊະນະໄປໃນທີ່ສຸດ. ທັງນີ້ ການແຂ່ງຂັນດັ່ງກ່າວໄດ້ຖືກຂະໜານນາມວ່າ: “The Daigo Incident” ແລະໄດ້ຮັບການຍົກໃຫ້ເປັນ 1 ໃນການແຂ່ງຂັນທີ່ດີທີ່ສຸດຕະຫຼອດການຂອງວົງການເກມໄຟຕິ້ງຈົນເຖິງຍຸກປັດຈຸບັນນີ້ (ສຳລັບໃຜທີ່ຕ້ອງການເບິ່ງ The Daigo Incident ເຮົາມີຄລິບໃຫ້ເບິ່ງທີ່ດ້ານລຸ່ມນີ້)

https://youtu.be/Lq1ey4-ewyQ

ທີ່ມາ:online station,ເດັກລາວ