ການຄຽດຄືຕົ້ນເຫດສຳຄັນຂອງການບີບໂຕຂອງຫົວໃຈ ແລະເສັ້ນເລືອດ ເຊິ່ງບໍ່ເປັນຜົນດີຕໍ່ຮ່າງ ກາຍແລະຈິດໃຈເລີຍ ໃນທາງການແພດເຊື່ອວ່າ ຄວາມຄຽດຈະເຮັດໃຫ້ເກີດອາການ ແລະນຳໄປສູ່ການເກີດເປັນໂລກຮ້າຍຕ່າງໆໄດ້ ຕັ້ງແຕ່ອາການປວດເມື່ອຍຕາມຮ່າງກາຍ ໄປຈົນເຖິງຂັ້ນເປັນມະເຮັງ.

ທີ່ນະຄອນນິວຢອກ ປະເທດສະຫະລັດອາເມຣິກາ ມີກຸ່ມສຳຫລວດຄວາມຄິດເຫັນສາທາລະນະເພື່ອການຕະຫລາດ ແລະສື່ມວນຊົນ ຊື່ “ໂຣເພີສະຕາດເວີນໄວ”ທຳການສຳຫລວດເລື່ອງຄວາມຄຽດອອກມາ ໂດຍການສຳຫລວດຈາກກຸ່ມຕົວຢ່າງໃນຫລາຍປະເທດ ຕາມພູມພາກຕ່າງໆທົ່ວໂລກ ປະມານ 30 ປະເທດ ມີທັງ ອາເມຣິກາ ອັງກິດ ເຢຍລະມັນ ຝຣັ່ງ  ຣັດເຊຍ ຮົງກາຣີ ອາຝຣິກາໃຕ້ ບາຊິນ ອາກຊັງຕິນ ຈີນ ອິນເດຍ ອິນໂດເນເຊຍ ຟີລິບປິນ ແລະອື່ນໆ.

ກຸ່ມຕົວຢ່າງທັງໝົດຈະມີປະມານ 30,000 ຄົນຢູ່ໃນໄວອາຍຸ 13-65 ປີ ເຊິ່ງກໍພົບວ່າ ກຸ່ມທີ່ມີຄວາມຄຽດຫລາຍທີ່ສຸດ ເຖິງໜຶ່ງໃນສີ່ຄືປະມານ 24 ເປີເຊັນຈະເປັນກຸ້ມແມ່ບ້ານທີ່ມີລູກຢູ່ໃນໄວກຳລັງໃຫຍ່ ທີ່ບໍ່ເກີນ 13 ປີ ທີ່ຕ້ອງເບິ່ງແຍງດູແລ ແລ້ວຕົນເອງກໍຕ້ອງອອກໄປເຮັດວຽກເປັນປະຈຳອີກດ້ວຍ ກຸ່ມນີ້ຈະມີຄວາມຄຽດເກີດຂຶ້ນທຸກມື້.

ສ່ວນກຸ່ມທີ່ມີຄວາມຄຽດນ້ອຍທີ່ສຸດ ໄດ້ແກ່ກຸ່ມເດັກສາວໄວລຸ້ນ ພວກນີ້ມີພຽງ 14 ເປີເຊັນເທົ່ານັ້ນທີ່ຈະເກີດຄວາມຄຽດ ຮອງຈາກນີ້ກໍຄືກຸ່ມ “ແມ່ແຕ່ຍັງສາວ” ທີ່ບໍ່ມີລູກລ້ຽງເທື່ອ ພວກນີ້ມີຄວາມຄຽດຢູ່ 17 ເປີເຊັນ.

ນອກຈາກນີ້ຍັງພົບວ່າ ຜູ້ຍິງໃນໄວຕ່າງໆຈະມີຄວາມຄຽດຫລາຍກວ່າຜູ້ຊາຍໃນໄວດຽວກັນ. ສາວໂສດມີຄວາມຄຽດຫລາຍກວ່າຊາຍໂສດໃນອັດຕາ 17 ຕໍ່ 12 ເປີເຊັນ ຜູ້ຍິງທີ່ແຕ່ງງານແລ້ວ ຈະຄຽດກວ່າຜູ້ຊາຍໂສດ 21 ຕໍ່ 17 ເປີເຊັນ ສ່ວນຄູ່ຜົວເມຍທີ່ຢູ່ຮ່ວມກັນ ຝ່າຍເມຍທີ່ມີຄວາມຄຽດມີ 24 ເປີເຊັນ ຝ່າຍຜົວມີພຽງ 19 ເປີເຊັນ.

ແມ່ໝ້າຍຈະມີຄວາມຄຽດ 21 ເປີເຊັນ ສ່ວນພໍ່ໝ້າຍພຽງແຕ່ 10 ເປີເຊັນ ໃນການຢ່າຮ້າງກັນຝ່າຍຍິງຈະເກີດຮູ້ສຶກຄຽດ 28 ເປີເຊັນ ຝ່າຍຊາຍພຽງ 20 ເປີເຊັນ ແລະຜູ້ຍິງທີ່ເຮັດວຽກໃນລະດັບຜູ້ບໍລິຫານຈະມີຄວາມຄຽດເປັນພິເສດ 23 ເປີເຊັນ ຝ່າຍຊາຍຈະຮູ້ສຶກຄຽດພຽງແຕ່ 19 ເປີເຊັນເທົ່ານັ້ນ.

ເປັນຫຍັງ ? ຜູ້ຍິງຈຶ່ງຮູ້ສຶກຄຽດຫລາຍກວ່າຜູ້ຊາຍ ຄຳຕອບກໍເພາະວ່າ ເພາະຜູ້ຍິງເປັນເພດທີ່ມີອາລົມອ່ອນໄຫວ ຊ່າງຈົດຈຳແລະເກັບເອົາເຫດການອ້ອມຂ້າງ ຫລືປະສົບການມາຄິດຫລາຍກວ່າຜູ້ຊາຍ.