ກວດສຸຂະພາບ ກັບ ລາວໂພສຕ໌ ວັນນີ້ເຮົາຈະພາທຸກຄົນມາຮູ້ຈັກກັບ ໂຣກມະເຮັງລຳຄໍ ແມ່ນ ມະເຮັງຈະມັກເກີດຂຶ້ນທີ່ບໍລິເວນຮີມສົບ, ລີ້ນ, ຜົ້ງແກ້ມ, ເຫືອກ ຈະມີກ້ອນຕ່ອມນ້ຳເຫຼືອງບໍລິເວນຄໍ ພົບຫຼາຍທີ່ສຸດ.
ສາເຫດຂອງໂຣກມະເຮັງລຳຄໍ
ປັດຈຸບັນຍັງບໍ່ຮູ້ສາເຫດທີ່ແທ້ຈິງຂອງການເກີດໂຣກມະເຮັງຄໍຫອຍ ແຕ່ຮູ້ປັດໃຈສ່ຽງທີ່ຈະເກີດໂຣກນີ້ໄດ້ເຊັ່ນ:
- ປັດໃຈສ່ຽງທີ່ສຳຄັນທີ່ສຸດຂອງໂຣກນີ້້ຄື: ການສູບຢາ ແລະ ການດື່ມແອລກໍຮໍ ເມື່ອທັງສູບຢາ ແລະ ດື່ມແອລກໍຮໍໄປພ້ອມກັນຈະມີປັດໃຈສ່ຽງສູງຂຶ້ນໄປອີກ ໂດຍມີການສຶກສາພົບວ່າ ຄົນທີ່ສູບຢາວັນລະ 2 ຊອງຂຶ້ນໄປ ຮ່ວມກັບການດື່ມແອລກໍຮໍຕັ້ງແຕ່ວັນລະ 3-4 ຈອກຂຶ້ນໄປ ເປັນປະຈຳ ຈະມີປັດໄຈສ່ຽງຈະສູງເຖິງ 35 ເທົ່າຂອງຄົນບໍ່ສູບຢາ ແລະ ບໍ່ດື່ມແອລກໍຮໍ
- ອາດມີຄວາມຜິດປົກກະຕິທາງພັນທຸກຳບາງຊະນິດທີ່ສົ່ງຜົນໃຫ້ເຊລຂອງຜູ້ປ່ວຍທີ່ມີຕໍ່ສານກໍ່ມະເຮັງຕ່າງໆ ສູງຂຶ້ນກວ່າຄົນທົວໄປ
- ອາດເກີດຈາກການຂາດສານອາຫານບາງຊະນິດ ເພາະມີບາງຜົນການສຶກສາພົບໂຣກນີ້ຈະມັກເກີດຂຶ້ນໃນກຸ່ມຄົນທີ່ຂາດການກິນຜັກ ແລະ ໝາກໄມ້
ອາການຂອງໂຣກມະເຮັງລຳຄໍ
ໂຣກມະເຮັງຄໍຫອຍຈະບໍ່ມີອາການສະເພາະ ແຕ່ຈະເປັນອາການຄ້າຍກັບການອັກເສບຊ້ຳເຮື້ອຂອງລຳຄໍຈາກສາເຫດທົ່ວໄປ ໂດຍອາການທີ່ພົບໄດ້ເລື່ອຍໆຂອງມະເຮັງລຳຄໍໄດ້ແກ່:
- ເຈັບຄໍຊ້ຳເຮື້ອ ຫຼື ຄ້າຍຄືມີກ້າງຄາຄໍຊ້ຳເຮື້ອ
- ມີອາການກືນອາຫານ ຫຼື ດື່ມນ້ຳແລ້ວເຈັບ ຫຼື ຮູ້ສຶກຕິດຂັດກືນບໍ່ລົງ ບາງຄັ້ງເຈັບເຂົ້າໄປເຖິງຫູ ເຊິ່ງທັງໝົດນີ້ຈະມີອາການຊ້ຳເຮື້ອ
- ອາດມີນ້ຳລາຍ ຫຼື ຂີ້ກະເທີ່ (ເສມຫະ) ເປັນເລືອດ ເຊິ່ງເປັນເລືອດທີ່ອອກມາຈາກແຜມະເຮັງ
- ມີກິ່ນປາກຈາກແຜມະເຮັງ ເໜົ່າຕິດເຊື້ອ
- ເມື່ອໂຣກນີ້ລຸກລາມເຂົ້າໄປທີ່ກ່ອງສຽງ ອາດສົ່ງຜົນໃຫ້ສຽງແຫບ ແລະ ມີກ້ອນເນື້ອໃຫຍ່ຈົນປິດທາງເດີນຫາຍໃຈ ສົ່ງຜົນໃຫ້ຫາຍໃຈລຳບາກ ແໜ້ນອຶດອັດ, ຫາຍໃຈບໍ່ອອກ
- ເມື່ອໂຣກລຸກລາມເຂົ້າຕ່ອມນ້ຳເຫຼືອງລຳຄໍ ຕ່ອມນ້ຳເຫຼືອງລຳຄໍຈະໃຫຍ່ຂຶ້ນ ບາງຄັ້ງອາດຈະມີພຽງຕ່ອມດຽວ ຫຼາຍຕ່ອມ ຫຼື ມີທັງສອງຂ້າງຂອງລຳຄໍເລີຍກໍ່ມີ
ໂຣກມະເຮັງລຳຄໍ ມີ 4 ໄລຍະເຊັ່ນດຽວກັບໂຣກມະເຮັງອື່ນໆ ແລະ ແຕ່ລະໄລຍະອາດຈະແບ່ງຍ່ອຍອອກໄປອີກ ຄື:
- ໄລຍະທີ 1 ກ້ອນມະເຮັງມີຂະໜາດໃຫຍ່ ບໍ່ເກີນ 2 ຊມ ແລະ ລຸກລາມຢູ່ສະເພາະໃນເນື້ອເຍື່ອທີ່ເກີດໂຣກເທົ່ານັ້ນ
- ໄລຍະທີ 2 ກ້ອນມະເຮັງມີຂະໜາດໃຫຍ່ກວ່າ 2 ຊມ ແຕ່ບໍ່ເກີນ 4 ຊມ ແລະ ລຸກລາມເຂົ້າກ່ອງສຽງແຕ່ຍັງລຸກລາມບໍ່ຫຼາຍ
- ໄລຍະທີ 3 ກ້ອນມະເຮັງມີຂະໜາດໃຫຍ່ຫຼາຍກວ່າ 4 ຊມ ແລະ ລຸກລາມເຂົ້າກ່ອງສຽງຫຼາຍ ຫຼື ລາມເຂົ້າຫຼອດອາຫານ ຫຼື ລາມເຂົ້າຕ່ອມນ້ຳເຫຼືອງລຳຄໍເບື້ອງເກີດໂຣກ 1 ຕ່ອມ ໂດຍຕ່ອມມີຂະໜາດໃຫຍ່ບໍ່ເກີນ 3 ຊມ
- ໄລຍະທີ 4 ກ້ອນມະເຮັງລຸກລາມຫຼາຍຈົນເຂົ້າສູ່ກະດູກ, ຕ່ອມໄທຣອຍ ແລະ ຫຼອດເລືອດແດງຂອງລຳຄໍ ຫຼື ລຸກລາມເຂົ້າຕ່ອມນ້ຳເຫຼືອງລຳຄໍ 1 ຕ່ອມ ໂດຍຕ່ອມມີຂະໜາດໃຫຍ່ກວ່າ 3ຊມ ແລະ ແຜ່ລາມໄປສູ່ກະແສເລືອດ, ເນື້ອເຍື່ອ, ອະໄວຍະວະສ່ວນອື່ນໆ ລວມທັງປອດ ແລະ ຕັບ
ທີ່ມາ: http://haamor.com/