ການຮັບປະທານຂີ້ມິ້ນສາມາດຮັກສາໂຣກກະດູກຜ່ອຍໄດ້ ເຊິ່ງຜົງກະຫຼີທີ່ເຮົານຳມາໃຊ້ເປັນສ່ວນປະສົມໃນອາຫານຕ່າງໆກໍ່ເຮັດມາຈາກຂີ້ມິ້ນ ຫຼື ໃຊ້ເປັນເຄື່ອງເທດໃນອາຫານປະເພດຕ່າງໆເຊັ່ນ: ອາຫານປະເພດແກງກະຫຼີ່, ຂົ້ວປູໃສຜົງກະຫຼີ ແລະ ອື່ນໆອີກ ໂດຍໃນຜົງກະຫຼີທີ່ເຮັດຈາກຂີ້ມິ້ນນີ້ຈະມີສ່ວນຊ່ວຍປ້ອງກັນໂຣກກະດູກຂໍ້ອັກເສບ ແລະ ໂຣກກະດູກຜ່ອຍໄດ້.
ໂດຍທີມນັກວິທະຍາສາດ ສະຫະລັດອາເມຣິກາ ຈາກມະຫາວິທະຍາໄລ ອະຣິໂຊນາ ລະບຸວ່າ: ຂີ້ມິ້ນ ສ່ວນໃຫຍ່ມັກໃຊ້ເປັນສ່ວນປະສົມໃນອາຫານປະເພດແກງເຜັດ ຫຼື ແກງສີເຫຼືອງທັງຫຼາຍ ໂດຍມີສັບພະຄຸນຊ່ວຍບໍາບັດພະຍາດໄດ້.
ໃນວົງການແພດເອເຊຍການໃຊ້ຂີ້ມິ້ນໃນການຮັກສາພະຍາດຕ່າງໆແມ່ນເຮັດມາເປັນເວລາດົນຫຼາຍຮ້ອຍປີແລ້ວເຊັ່ນ: ອາການອັກເສບ ແລະ ພົບວ່າ: ສານເຄີຣ໌ຄູມິນ ທີ່ຢູ່ໃນຂີ້ມິ້ນມີປະສິດທິພາບໃນການປ້ອງກັນການເກີດໂຣກຂໍ້ຕໍ່ອັກເສບໄດ້ ແລະ ຊ່ວຍຮັກສາອາການອັກເສບຂອງຜິວໜັງ ຫຼື ອາການບວມຂອງພະຍາດອຶ່ນໆນຳເຊັ່ນ: ພະຍາດຫອບຫືດ, ລໍາໄສ້ອັກເສບ ແລະ ພະຍາດກ່ຽວກັບກະດູກ.
ນອກນີ້ຍັງຊ່ວຍຫຼຸດອາການໄອໄດ້ອີກດ້ວຍ ໂດຍການຊອຍຂີ້ມິ້ນໃຫ້ເປັນປ່ຽງບາງໆແລ້ວນຳມາຈ້ຳເກືອເລັກໜ້ອຍຈະຊ່ວຍໃຫ້ຄໍຊຸມຊື່ນຂຶ້ນ ແລະ ບັນເທົາອາການໄອໄດ້ດີ ເຊິ່ງນີ້ເປັນສູດທີ່ຜູ້ເຖົ້າເພິ່ນແນະນຳມາ ແລະ ໃຊ້ມາແຕ່ບູຮານມາແລ້ວ ໂດຍເປັນວິທີທຳມະຊາດທີ່ໃຊ້ແລ້ວໄດ້ຜົນຕະຫຼອດ.
ທີ່ມາ: ຂ່າວເສດຖະກິດ-ການຄ້າ