ດ້ວຍເຫດຜົນບາງປະການທີ່ຈະນຳສະເໜີຕໍ່ໄປໃນບົດນີ້ ເຮັດໃຫ້ປະຊາຊົນສະຫະ ຣາຊະອານາຈັກ (ອັງກິດ, ເວລສ໌, ສະກັອດແລນ, ໄອແລນເໜືອ ແລະຢິບຣອລຕາ) ຫຼືເອີ້ນງ່າຍໆເປັນ ອັງກິດ ແຕກອອກເປັນສອງຝ່າຍ ຄືຝ່າຍສະໜັບສະໜຸນໃຫ້ອັງກິດແຍກອອກຈາກການເປັນສະມາຊິກສະຫະພາບເອີຣົບ (Brexit) ແລະອີກຝ່າຍໜຶ່ງສະໜັບສະໜຸນໃຫ້ຄົງຄວາມເປັນສະມາຊິກຢູ່ກັບສະຫະພາບເອີຣົບຕໍ່ໄປ (Bremain) ໃນຂະນະທີ່ ທ່ານ ເດວິດ ຄາເມຣອນ ນາຍົກລັດຖະມົນຕີອັງກິດ ກໍສະໜັບສະໜຸນໃຫ້ອັງກິດຢູ່ຮ່ວມກັບສະຫະພາບເອີຣົບຕໍ່ໄປ. ແຕ່ບັນຫາດັ່ງກ່າວບໍ່ສາມາດແກ້ໄຂໃຫ້ຢຸດຕິລົງໄດ້ ໃນທີ່ສຸດກໍໄດ້ໃຊ້ລະບົບການຕັດສິນດ້ວຍຄວາມເຫັນສ່ວນຫຼາຍຂອງປະຊາຊົນ ໂດຍການລົງປະຊາມະຕິ ແລະຜົນອອກມາກໍເປັນຝ່າຍຜູ້ສະໜັບສະໜຸນໃຫ້ອອກຈາກການເປັນສະມາຊິກສະຫະພາບເອີຣົບເປັນຝ່າຍຊະນະ.
Brexit – Bremain ແມ່ນຫຍັງ?
Brexit ຫຍໍ້ມາຈາກ Britain+exit ກໍຄືການສະໜັບສະໜຸນໃຫ້ສະຫະຣາຊະອານາຈັກ ຫຼືອັງກິດ ແຍກໂຕອອກມາຈາກສະຫະພາບເອີຣົບ ໂດຍຍັງມີຄຳທີ່ຄຽງຄູ່ກັນມາກໍຄື Bremain ຫຍໍ້ມາຈາກ Britain+Remain ກໍຄືການສະໜັບສະໜຸນໃຫ້ອັງກິດຄົງຄວາມເປັນສະມາຊິກສະຫະພາບເອີຣົບຕໍ່ໄປ.
ເປັນຫຍັງປະຊາຊົນສ່ວນຫຼາຍຈຶ່ງຢາກໃຫ້ອັງກິດອອກຈາກ EU ?
ຄົນອັງກິດສ່ວນໜຶ່ງເລິ່ມເບິ່ງເຫັນວ່າ ອັງກິດສູນເສຍອະທິປະໄຕໃນການບໍລິຫານບ້ານເມືອງ ລວມໄປເຖິງຜົນປະໂຫຍດບາງປະການໄປຈາກການເປັນສະມາຊິກກຸ່ມອີຢູໄປ ເຊັ່ນ ເລື່ອງເງິນຄ່າບຳລຸງສະມາຊິກ ແທນທີ່ຈະຕ້ອງເສຍໃຫ້ອີຢູ ເອົາໄປຊ່ວຍເຫຼືອປະເທດສະມາຊິກນ້ອຍໆ ນັ້ນ ໃຫ້ເອົາມາພັດທະນາສ້າງປະໂຫຍດແນວອື່ນພາຍໃນປະເທດຍັງດີກວ່າ ຕົວຢ່າງຈາກກໍລະນີທີ່ໄດ້ເຫັນຄື ກໍລະນີປະເທດກຣີຊເສດຖະກິດຫຼົ່ມ ອີຢູກໍໄດ້ເອົາເງິນສ່ວນນີ້ໄປອັດຮູຮົ່ວ ຊູເສດຖະກິດຂອງກຣີຊເອົາໄວ້ບໍ່ໄດ້ລົ້ມລົງໄປ.
ເຖິງແມ່ນວ່າຈະມີສຽງຄັດຄ້ານຈາກຝ່າຍ Bremain ວ່າ ອັງກິດເອງກໍໄດ້ຜົນປະໂຫຍດຈາກການເຂົ້າຮ່ວມອີຢູ ໂດຍສະເພາະແມ່ນດ້ານລາຍໄດ້ຈາກການສົ່ງອອກ ເພາະເຄິ່ງໜຶ່ງຂອງສິນຄ້າທີ່ອັງກິດສົ່ງອອກ ກໍຖືກສົ່ງໄປຍັງອີຢູ ນັ້ນເອງ ແຖມຍັງໄດ້ລາຍໄດ້ເຕັມເມັດເຕັມໜ່ວຍ ບໍ່ມີກຳແພງພາສີພ້ອມ.
ສະຫະພາບເອີຣົບ ຫຼື EU ນັ້ນເກີດຂຶ້ນຈາກການໂຮມໂຕກັນທາງເສດຖະກິດແລະການເມືອງຂອງບັນດາປະເທດສະມາຊິກ ເຊິ່ງປັດຈຸບັນມີຢູ່ 28 ປະເທດ ແນ່ນອນວ່າ ການໂຮມໂຕກັນນີ້ເຮັດໃຫ້ເກີດຄວາມແຂງແກ່ນໃນດ້ານເສດຖະກິດ ໂດຍຖ້າເບິ່ງຈາກ GDP ຂອງເອີຣົບແລ້ວກໍມີສະໜາດໃຫຍ່ທີ່ສຸດໃນໂລກ ແລະຍັງເປັນກຸ່ມທີ່ມີອຳນາດໃນການເຈລະຈາຕໍ່ລອງການຄ້າສູງ ນອກຈາກນີ້ປະເທດສະມາຊິກກໍມີການອຸດໜຸນຊ່ວຍເຫຼືອກັນ ການເຄື່ອນຍ້າຍຂອງທຶນແລະແຮງງານລະຫວ່່າງກັນເປັນໄປດ້ວຍໂດຍງ່າຍ ການສົ່ງອອກລວມທັງນຳເຂົ້າສິນຄ້າຈາກປະເທດສະມາຊິກເຮັດໄດ້ໂດຍບໍ່ມີກຳແພງພາສີ ໂດຍສະມາຊິໃນກຸ່ມ EU ຈະຕ້ອງເສຍຄ່າບຳລຸງສະມາຊິກ ເພື່ອເອົາໄປເປັນເງິນກອງກາາງໃນການຊ່ວຍເຫຼືອພັດທະນາປະເທດສະມາຊິກກັນເອງ.
ສ່ວນລະບົບການບໍລິຫານຂອງສະຫະພາບເອີຣົບນັ້ນຄ້າຍຄືລັດ ຄື ມີລັດຖະສະພາເອີຣົບ ເຮັດໜ້າທີ່ອອກກົດໝາຍຂໍ້ບັງຄັບຕ່າງໆ ມາເປັນແນວທາງຄຸມຄຸມບັນດາປະເທດສະມາຊິກອີກເທື່ອໜຶ່ງ ແລະກໍມີສານຍຸດຕິທຳເອີຣົບ ອັນຈະເຮັດໜ້າທີ່ຕັດສິນເລື່ອງລາວຕ່າງໆ ອັນກ່ຽວຂ້ອງກັບກົດໝາຍຂອງກຸ່ມ.
ປະຊາຊົນອັງກິດຄົງສະຫຼຸບບົດຮຽນທີ່ຜ່ານມາແລະພົບເຫັນແລ້ວວ່າ ການໃຊ້ເງິນສະກຸນເອີໂຣແລ້ວມີບັນຫາຕິດຕາມມາຄືຫຍັງ (ຊູ່ມື້ນີ້ຄ່າເງິນປອນກໍຍັງແຂງກວ່າເງິນເອີໂຣ) ເພາະຕ້ອງການບໍລິຫານການເງິນຜ່ານທະນາຄານກາງເອີຣົບເປັນສຳຄັນ ໃນຂະນະທີ່ເມື່ອໃຊ້ເງິນປອນຢູ່ສາມາດຈັດການໄດ້ລົງໂຕແລະງ່າຍກວ່າ ແລະການຖອນໂຕອອກຈາກການເປັນສະມາຊິກສະຫະພາບເອີຣົບ ກໍເທົ່າກັບປິດທາງທີ່ສະຫະຣາຊະອານາຈັກຈະເຂົ້າລະບົບການເງິນເອີໂຣໄປເລີຍ ເວົ້າໄດ້ວ່າຄືນສູ່ສະຖານະເດິມ.
ນັ້ນໝາຍເຖິງວ່າເມື່ອຖອນໂຕອອກແລ້ວ ຈະຫວິດຈາກຂໍ້ຜູກມັດຕ່າງໆ ບໍ່ວ່າຈະໄດ້ປະໂຫຍດຫຼືເສຍປະໂຫຍດຈາການເກາະກຸ່ມດຽວກັນໃນເອີຣົບ ເຊິ່ງໃນປະຫວັດສາດແລ້ວຄົນອັງກິດທ້າຍທີ່ສຸດມັກຈະເບິ່ງຄົນໃນຊາດຂອງຕົນເອງເປັນສຳຄັນກວ່າ ແລະຢຶດຕິກັບຄວາມພາກພູມໃຈໃນເສລີພາບທາງການເມທືອງ ແລະລະບອບທີ່ເປັນຢູ່ ແລະເນີນມາຢ່າງຕໍ່ເນື່ອງ ອີກທັງຄົງຈະເບື່ອໜ່າຍກັບບັນຫາຂອງອີຢູທີ່ເກີດຂຶ້ນຕະຫຼອດ ບໍ່ວ່າຈະເປັນບັນຫາດ້ານການອົບພະຍົບເຂົ້າເມືອງຂອງສະມາຊິກສະຫະພາບເອີຣົບ ບັນຫາໃຫ້ຄວາມຮ່ວມມືດ້ານຜູ້ອົບພະຍົບຈາກຕາເວັນອອກກາງ ບັນຫາທີຕ້ອງຮ່ວມກັນຮັບຜິດຊອບຈ່າຍຄ່າສະມາຊິກເຊິ່ງຈ່າຍໄປແລ້ວກວ່າ 11,000 ລ້ານປອນ ໃນຂະນະທີ່ມີຜົນຕອບແທນກັບມາພຽງເລັກນ້ອຍ ລວມທັງກົດລະບຽບຂອງອີຢູທີ່ແພ່ປົກຄຸມອຳນາດລັດຖະສະພາ.
ທະນາຄານກາງເອີຣົບເອງກໍບໍ່ສາມາດທີ່ຈຸຫຼຸດບັນຫາທີ່ເກີດຂຶ້ນແກ່ປະເທດສະມາຊິກໄດ້ທັງໝົດ ຕົວຢ່າງປະເທດກຣີຊທີ່ຕ້ອງອຸ້ມຊູໃຫ້ເສດຖະກິດຟື້ນຂຶ້ນມາໃຫ້ໄດ້ ເພາະເປັນພັນທະຮ່ວມກັນຂອງປະເທດສະມາຊິກ ທີ່ຈະຕ້ອງເບິ່ງແຍງກັນແລະກັນ ບໍ່ໃຫ້ດັບຫາຍຕາຍໄປຈາກກັນ ທະນາຄານກາງເອີຣົບຈະຫຼຸດດອກເບ້ຍກໍເຮັດໃຫ້ຍາກ ຂະນະທີ່ລັດຖະບານຊາດຕ່າງໆ ທີ່ເປັນສະມາຊິກຈະອອກມາຕະການກະຕຸ້ນເສດຖະກິດໃດໆ ກໍຕ້ອງດຳເນີນການຢ່າງລະມັດລະວັງ ເພາະທະນາຄານກາງເອີຣບຄວບຄຸມງົບປະມານຢູ່ ບໍ່ໃຫ້ມີການໃຊ້ຈ່າຍຂາດດຸນຕາມຫຼັກເກນອັນເຂັ້ມງວດຂອງການລວມເງິນສະກຸນດຽວກັນ.
ອັງກິດໄດ້ເຂົ້າຮ່ວມເປັນສະມາຊິກ ໃນກຸ່ມສະຫະພາບເມື່ອປີ 1973 ເຊິ່ງຕອນນັ້ນ ສະຫະພາບເອີຣົບຍັງເປັນພຽງປະຊາຄົມເສດຖະກິດເອີຣົບ ກ່ອນຈະກາຍເປັນສະຫະພາບເອີຣົບເຕັມໂຕໃນປີ 1993 ແລະຄົງສະພາບເປັນສະມາຊິກເລື້ອຍໆ ມາຈົນມາເຖິງການລົງປະຊາມະຕິ ໃນມື້ວານນີ້ ເຊິ່ງສຽງໂຫວດໃຫ້ອອກຫຼາຍກວ່າ.
ເຊິ່ງແນ່ນອນວ່າ ການອອກຈາກອີຢູຂອງອັງກິດ ຈະສົ່ງຜົນສະທ້ອນຕໍ່ລະບົບເສດຖະກິດ-ການເງິນຂອງໂລກຢ່າງແນ່ນອນ ແລະຈົ່ງຕິດຕາມຂ່າວຢ່າງຕໍ່ເນື່ອງວ່າ ອັງກິດຈະເປັນແນວໃດຕໍ່, ອີຢູຈະເປັນແນວໃດ ແລະສະພາບເສດຖະກິດໂລກຈະເປັນແນວໃດ ໃນອັນດັບຕໍ່ໄປ?