ຕາມການເປີດເຜີຍຈາກເຈົ້າໜ້າທີ່ພະແນກສະກັດກັ້ນ ແລະຕ້ານຢາເສບຕິດ ປກສ ແຂວງຫົວພັນໃຫ້ຮູ້ວ່າໃນວັນທີ 14 ມີຖຸນາ 2016 ນີ້ ໄດ້ສົມທົບກັບທິມງານຊາຍແດນຂອງ ແຂວງເຊິນລາ ສສ ຫວຽດນາມອອກຕິດຕາມກວດກາມ້າງ ເປົ້າໝາຍຄ້າຂາຍຢາເສບຕິດຢູ່ເຂດບ້ານນາໝໍ້ເມືອງຊ່ອນ ແຂວງຫົວພັນ ຮອດວັນທີ 15 ມິຖຸນາ 2016 ເວລາ 5:00 ໂມງ ຈິ່ງໄດ້ແບ່ງກຳລັງອອກເປັນສອງຈຸດກວດກາຕິດຕາມ ພົບເຫັນພວກສົງໄສຂີ່ລົດຈັກເຟເກິນບໍ່ມີປ້າຍທະບຽນທັງສອງຄັນມຸ່ງໜ້າມາຕາມເສັ້ນທາງເພື່ອເຂົ້າມາຫາເທສະບານເມືອງຊ່ອນ ແຕ່ຜູ້ກ່ຽວໄດ້ເຫັນເຈົ້າໜ້າທີ່ຕັ້ງດ່ານກວດພວມໂບກມືຈະລັດລົດຈັກຜູ້ສົງໄສຈິ່ງໄດ້ລ້ຽວລົດກັບຄືນ ແຕ່ຖືກເຈົ້າໜ້າທີ່ຢູ່ຈຸດລັດສະກັດລົດຈັກສອງຄັນເອົາ ໄວ້ໄດ້ ພ້ອມທັງກວດຄົ້ນຕົວຜູ້ກ່ຽວພົບ ເຫັນຢາຝິ່ນດິບຈຳນວນ 32,5 ກິໂລ ກຣາມ ຈາກນັ້ນ ຈິງນຳພວກຖືກຫາ ທັງສອງມອບໃຫ້ພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງຫົວພັນ ເພື່ອທຳການສືບສວນສອບສວນ ແລະ ຂະຫຍາຍຜົນຫາຜູ້ຮ່ວມຂະບວນການ.
ຜ່ານການສືບສວນສອບສວນຂອງເຈົ້າໜ້າທີຈິ່ງຮູ້ວ່າ: ຜູ້ຖືກຫາທີ 1 ຊື່ ທ້າວ ໄມ, ອາຍຸ 30 ປີ ແລະຜູ້ທີ 2 ຊື່ທ້າວ ບົວທອງ, ອາຍຸ 39 ປີ ທັງສອງເປັນປະຊາຊົນບ້ານນາໝໍ້ ເມືອງຊ່ອນ ແຂວງຫົວ ພັນ, ທັງສອງໄດ້ຮັບສາລະພາບວ່າຢາ ຝິ່ນດິບຈຳນວນດັ່ງກ່າວເປັນຂອງຕົນແທ້ ຊຶ່ງປະຈຸບັນຄະດີດັ່ງກ່າວຍັງຢູ່ໃນຂັ້ນຕອນຂອງການຂະຫຍາຍຜົນ ເພື່ອຊອກຫາທີ່ໄປທີ່ມາຂອງຢາເສບຕິດດັ່ງກ່າວ ແລະ ຂະຫຍາຍຜົນຫາກຸ່ມແກ້ງຜູ້ຮ່ວມຂະບວນການມາດຳເນີນຄະດີຕາມລະບຽບກົດໝາຍ.
ທີ່ມາ: 