ປະເທດລາວຖືວ່າເປັນປະເທດທີ່ອຸດົມຮັ່ງມີເຕັມໄປດ້ວຍຊັບພະຍາກອນທາງທຳມະຊາດທີ່ອຸດົມສົມບູນ ຄື ດັ່ງຄຳບຸຮານກ່າວໄວ້ວ່າ: ໃນນ້ຳມີປາ ໃນນາມີເຂົ້າ ຊັບໃນດິນສິນໃນນ້ຳ ວ່າງມໍ່ໆມານີ້ກໍ່ມີຂ່າວປະຊາຊົນພາກັນແຫ່ໄປເກັບກ້ອນຄຳທີ່ເປັນຫີນປູທາງ ທີ່ເມືອງໂພນທອງ ແຂວງ ຈຳປາສັກ ແລະ ໃນວັນທີ 17/6/2016 ກໍ່ໄດ້ມີປະຊາຊົນຈຳນວນຫຼາຍໄດ້ພາກັນແຫ່ໄປຂຸດເອົາຫີນແກ້ວ ຢູ່ເມືອງ ບົວລະພາ ແຂວງ ຄຳມ່ວນ
ຕາມການລາຍງານຂອງປະຊາຊົນທ້ອງຖິ່ນໃຫ້ຊາບວ່າ ກ້ອນຫີນແກ້ວທີ່ຂຸດໄດ້ຈະມີລັກສະນະຂາວໃສເໝືອນກັບຫີນສົ້ມ ເຊິ່ງມີນັກທຸລະກິດຊາວຈີນ ແລະ ຊາວຫວຽດນາມສົນໃຈຊື້ກ້ອນຫີນແກ້ວນີ້ ແລະ ປະຊາຊົນກໍ່ໄດ້ພາກັນໄປຂຸດເອົາເພື່ອນຳໄປຂາຍໃຫ້ນັກທຸລະກິດຊາວຈີນ ແລະ ຫວຽດນາມຜູ້ທີ່ຮັບຊື້.
