ເປັນເວລາບໍ່ດົນທີ່ Huawei ໄດ້ປະກາດເປີດໂຕສະມາດໂຟນເຮືອທຸງຂອງປີນີ້ ໃນຊ່ວງເດືອນເມສາ ນັ້ນກໍຄື P9 ແລະ P9 Plus, ໂດຍຈຸດເດັ່ນຂອງມືຖືເຮືອທຸງຈາກຄ້າຍຫົວເຫວີ່ຍກໍຄົງໜີບໍ່ພົ້ນຈາກການຮ່ວມມືກັນລະຫວ່າງບໍລິສັດ Leica ກັບ Huawei ທີ່ຊ່ວຍກັນພັດທະນາເທັກໂນໂລຢີເລື່ອງກ້ອງມືຖືຂຶ້ນມາ. ດ້ວຍເຫດນີ້ແລ້ວຈຶ່ງບໍ່ແປກໃຈທີ່ສະມາດໂຟນຈາກຫົວເຫວີ່ຍທັງສອງລຸ້ນນັ້ນຈະມີຍອດຂາຍເຖິງ 2.6 ລ້ານເຄຶ່ອງໃນທົ່ວໂລກ (ອັນນີ້ບໍ່ຮູ້ຄືກັນວ່ານັບແຍກຫຼືນັບລວມກັນທັງສອງລຸ້ນ).
ອີງຕາມລາຍງານແລ້ວໂທລະສັບມືຖື Huawei P9 ແມ່ນມີໂຕເລກທີ່ສູງກວ່າ P8 ທີ່ປະກາດໄປເມື່ອປີກ່ອນ ເຖິງ 130%. ໂດຍຖ້າທຽບກັບຍອດຂາຍຂອງ P8 ແລ້ວ, P9 ແມ່ນມີຍອດຂາຍທີ່ດີຫຼາຍຢູ່ຝຣັ່ງໂດຍເພີ່ມຂຶ້ນເຖິງ 1000%, ແລະ 400% ທີ່ໂປແລນ ແລະຟິນແລນ. ສ່ວນໃນແຖບປະເທດ UK ກໍຖືວ່າເຮັດໄດ້ດີໂດຍມີຍອດຂາຍເພີ່ມຂຶ້ນ 300% ເມື່ອທຽບກັບເຮືອທຸງແບບ P8.
ສະນັ້ນແລ້ວ, ນີ້ຖືເປັນສັນຍານທີ່ດີຂອງບໍລິສັດທີ່ຢູ່ອັນດັບ 3 ຂອງໂລກ, ເຖິງວ່າຈະທຽບກັບຍອດຂາຍລວມຂອງບໍລິສັດ Samsung ແລະ Apple ບໍ່ໄດ້ກໍຕາມ. ແຕ່ຈາກລາຍງານຫຼ້າສຸດທັງ 2 ບໍລິສັດຕ່າງກໍມີຍອດຂາຍທີ່ຊະລໍຕົວລົງຢູ່ເລື້ອຍໆ ເຮັດໃຫ້ອັດຕາການເຕີບໃຫຍ່ຫຼຸດລົງ ແລະນີ້ເອງກໍຖືເປັນສັນຍານທີ່ດີໃຫ້ກັບ Huawei ທີ່ຈະດຳເນີນແຜນການລົ້ມຍັກໃຫຍ່ວົງການໂທລະສັບມືຖືລົງໄດ້ພາຍໃນ 5 ປີນີ້ຫຼືບໍ່? ກະລຸນາຕິດຕາມຕອນຕໍ່ໄປ 55+
ທີ່ມາ:gizmochina