ທ່ານນາງ ປານີ ຢ່າທໍ່ຕູ້ ປະທານສະພາແຫ່ງຊາດ ພ້ອມດ້ວຍຄະນະ ແລະ ການນຳຂອງ ແຂວງ ໄດ້ລົງຢ້ຽມຢາມໂຄງການລ້ຽງງົວຂອງບໍລິສັດລາວສຳພັນ.
ປັດຈຸບັນໂຄງການດັ່ງກ່າວລ້ຽງງົວຊົນ, ຄວາຍຊົນ, ມ້າ, ໝູ ແລະ ແບ້ ເຊິ່ງເປັນການລ້ຽງແບບທອມ , ສັດດັ່ງກ່າວເປັນແນວພັນພື້ນເມືອງລາວ ການຈຳໜ່າຍແມ່ນມີສະມາຄົມຊື້ສັດ-ຂາຍສັດ ມາຊື້ເພື່ອສົ່ງອອກປະເທດຫວຽດນາມ ແລະ ຈີນ ໃນຕໍ່ໜ້າທາງບໍລິສັດມີແຜນຈະປະສົມພັນທຽມສັດແບບທັນສະໄໝ ເພື່ອໃຫ້ໄດ້ລູກທີ່ແຂງແຮງ .
ໃນໂອກາດນີ້ ທ່ານນາງ ປານີ ຢ່າທໍ່ຕູ້ ກຳມະການກົມການເມືອງສູນກາງພັກ ປະທານສະພາແຫ່ງຊາດ ກໍ່ໄດ້ສະແດງຄວາມດີໃຈຕໍ່ບໍລິສັດທີ່ລົງທຶນລ້ຽງສັດ ເຊິ່ງຖືກກັບບູລິມາສິດການພັດທະນາແຂວງຊຽງຂວາງກໍ່ຄືແຜນການຂອງຂັ້ນເທິງ ໂດຍເນັ້ນໃຫ້ພະແນກກະສິກໍາແລະປ່າໄມ້ຕ້ອງໃຫ້ຄວາມຮ່ວມມື ຄວາມສະດວກແກ່ໂຄງການລ້ຽງສັດນີ້ ພ້ອມກັບຊຸກຍູ້ ສົ່ງເສີມ ໃຫ້ປະຊາຊົນປູກຝັງລ້ຽງສັດໃຫ້ກາຍເປັນສິນຄ້າ ເພື່ອຫຼຸດຜ່ອນຄວາມທຸກຍາກໃນຄອບຄົວ
ຂ່າວຈາກ: ຂ່າວເສດຖະກິດ-ການຄ້າ