ກອງປະຊຸມປຶກຫາສາລືການພັດທະນາກະສິກຳອິນຊີລາວ ຄັ້ງທີ 5 ຈັດຂຶ້ນໃນລະຫວ່າງວັນທີ 15-16 ມິຖຸນາ 2016 ທີ່ນະຄອນຫຼວງວຽງຈັນ ເປັນກຽດເຂົ້າຮ່ວມຂອງທ່ານ ບຸນຂວາງ ຄຳບຸນເຮືອງ ຮອງລັດຖະມົນຕີກະຊວງກະສິກຳ ແລະປ່າໄມ້, ທ່ານ ວິໄລສຸກ ເຄນນະວົງ ຫົວໜ້າກົມປູກຝັງກະຊວງກະສິກຳ ແລະປ່າໄມ້, ມີຫົວໜ້າກົມ, ຮອງກົມ, ແຂກພາຍໃນ ແລະຕ່າງປະເທດເຂົ້າຮ່ວມ.
ທ່ານ ວິໄລສຸກ ເຄນນະວົງ ກ່າວວ່າ: ຕະຫຼອດໄລຍະຜ່ານມາການພັດທະນາກະສິກຳອິນຊີໄດ້ມີໜໍ່ແໜງທີ່ໂດດເດັ່ນ ໂດຍສະເພາະຜູ້ປະກອບການຫັນລະບົບການຜະລິດເຂົ້າກະສິກຳອິນຊີການພັດທະນາເຄື່ອງມືມະຫາພາກດ້ານນິຕິກຳເປັນຕົ້ນແມ່ນສ້າງມາດຕະຖານກະສິກຳອິນຊີ ແລະລະບົບຮັບຮອງຢັ້ງຢືນຄຸນນະພາບ ແລະມາດຕະຖານຢູ່ພາຍໃຕ້ການຄຸ້ມຄອງຂອງກົມປູກຝັງມາຮອດປະຈຸບັນກົມປູກຝັງອອກໃບຢັ້ງຢືນ ທັງໝົດ 2.215 ເຮັກຕາ ກວມເອົາຜົນຜະລິດສະເລ່ຍ 1.980 ໂຕນ, ປະກອບມີ 10 ກຸ່ມໃຫຍ່ ແລະ 183 ກຸ່ມນ້ອຍ, 13 ບໍລິສັດ 1 ລັດວິສາຫະກິດ, 1 ໂຄງການ ແລະ 2 ສູນຜະລິດກະສິກຳອິນຊີກະຈາຍຢູ່ບັນດາແຂວງຕ່າງໆໃນຂອບເຂດທົ່ວປະເທດ.
ທ່ານ ບຸນຂວາງ ຄຳບຸນເຮືອງ ກ່າວວ່າ: ກະຊວງກະສິກຳ ແລະປ່າໄມ້ຜັນຂະຫຍາຍກະສິກຳສະອາດລົງສູ່ພາກປະຕິບັດຕົວຈິງເຮັດໃຫ້ມີການຈັດຕັ້ງປະຕິບັດກະສິກຳສະອາດ ໂດຍສະເພາະການຜະລິດກະສິກຳອິນຊີ ຊຶ່ງຈັດຕັ້ງປະຕິບັດຢູ່ບັນດາເມືອງ ແລະແຂວງຕ່າງໆ.
ເຖິງວ່າໄລຍະຜ່ານມາພວກເຮົາລິເລີ່ມການສົ່ງເສີມການຜະລິດກະສິກຳສະອາດໃນຫຼາຍດ້ານກໍຕາມ ແຕ່ການພັດທະນາ ແລະການສົ່ງເສີມນັ້ນຍັງຢູ່ໃນຂອບເຂດຈຳກັດ ເນື່ອງຈາກວ່າຍັງບໍ່ທັນມີແຜນເປົ້າໝາຍສູ້ຊົນລະອຽດວ່າຈະຜະລິດກະສິກຳສະອາດຕາມມາດຕະຖານໃດ ບໍ່ວ່າມາດຕະຖານອິນຊີ ຫຼື ມາດຕະຖານກະສິກຳທີ່ດີໃຫ້ໄດ້ຫຼາຍປານໃດ, ຢູ່ເຂດໃດ, ເມືອງໃດ, ແຂວງໃດ ຊຶ່ງໃນກອງປະຊຸມຄັ້ງນີ້ຈະປຶກສາຫາລືເພື່ອຊອກຫາຊ່ອງທາງ ແລະວິທີການທີ່ດີໃນການນຳເອົາທິດທາງນະໂຍບາຍຂອງພັກ-ລັດລົງມາຈັດຕັ້ງປະຕິບັດໃຫ້ເປັນຮູບປະທຳ.
ທີ່ມາ: 