ກົມອຸຕຸນິຍົມ ແລະ ອຸທົກກະສາດ ໃຫ້ຮູ້ວ່າ: ໃນໄລຍະວັນທີ 16-19 ມີຖຸນານີ້, ລົມມໍລະສຸມຕາເວັນຕົກສ່ຽງໃຕ້ ຈະເພີ່ມກຳລັງແຮງພັດປົກຄຸມ ແລະ ຈະເຮັດໃຫ້ມີຝົນຕົກເພີ່ມຂຶ້ນໃນແຕ່ລະພາກໃນລະດັບຄ່ອຍຫາປານກາງ ແລະ ຕົກໜັກຢູ່ບາງທ້ອງຖິ່ນແຂວງພາກເໜືອ ແລະ ພາກກາງ, ໂດຍສະເພາະວັນທີ 16-17 ມີຖຸານນີ້, ພາກເໜືອ ດ້ານຕາເວັນອອກ: ຈະມີຝົນຕົກຟ້າຄະນອງໃນລະດັບຄ່ອຍເປັນສ່ວນຫລາຍ ແລະ ຕົກໃນລະດັບປານກາງຫາໜັກຢູ່ບາງທ້ອງຖິ່ນແຂວງຊຽງຂວາງ ແລະ ຜົ້ງສາລີ. ອຸນຫະພູມຕ່ຳສຸດ 20-22 ອົງສ ແລະ ສູງສຸດ 30-32 ອົງສາ, ພາກເໜືອດ້ານຕາເວັນຕົກ: ຍັງຈະມີຝົນຕົກໃນລະດັບຄ່ອຍ ຫາປານກາງຢູ່ເກືອບທົ່ວໄປ, ອຸນຫະພູມຕ່ຳສຸດ 22-24 ອົງສາ ແລະ ສູງສຸດ 33-35 ອົງສາ.
ນະຄອນຫລວງວຽງຈັນ: ອາກາດຈະຮ້ອນ. ອຸນຫະພູມຕ່ຳສຸດ 25-27 ອົງສາ ແລະ ສູງສຸດ 33-35 ອົງສາ. ພາກກາງ: ຈະມີຝົນຕົກໃນລະດັບຄ່ອຍຫາປານກາງ, ພ້ອມມີລົມພັດແຮງ ແລະ ອາກາດຈະຮ້ອນແຮງຂຶ້ນ. ອຸນຫະພູມຕ່ຳສຸດ 25-27 ອົງສາ ແລະ ສູງສຸດ 35-37 ອົງສາ ແລະ ພາກໃຕ້: ຈະມີຝົນຕົກໃນລະດັບຄ່ອຍເປັນສ່ວນໃຫຍ່, ຈາກນັ້ນຕົ້ນອາທິດໜ້າ ຝົນຈະຫລຸດລົງ, ອາກາດຈະຮ້ອນຂຶ້ນຕື່ມ. ອຸນຫະພູມຕ່ຳສຸດ 25-27 ອົງສາ ແລະ ສູງສຸດ 35-37 ອົງສາ. ດັ່ງນັ້ນ ຈຶ່ງຂໍເຕືອນເຖິງປະຊາຊົນທີ່ອາໄສຢູ່ເຂດດັ່ງກ່າວ ຈົ່ງມີສະຕິລະມັດລະວັງຕໍ່ການປ່ຽນແປງຂອງອາກາດດັ່ງກ່າວ.
ຂ່າວຈາກ: ລາວພັດທະນາ