ຖືວ່າຊ່ວງນີ້ບໍລິສັດ Nubia ມາແຮງຂຶ້ນເລື້ອຍໆເລີຍ ບໍ່ວ່າຈະເປັນການທີ່ມີນັກເຕະບານຄົນດັງມາເປັນພຣີເຊັນເຕີໃຫ້ຄື Cristiano Ronaldo, ນອກນີ້ກໍຍັງໄດ້ເປີດໂຕໂທລະສັບມືຖືລຸ້ນໃໝ່ Nubia Z11 Max ໄປກ່ອນໜ້ານີ້ແລ້ວ ແລະ ໃນຕອນນີ້ເອງທາງບໍລິສັດກໍມີແຜນທີ່ຈະເປີດໂຕແຟລັບເລັດເຮືອທຸງລຸ້ນໃໝ່ຂອງບໍລິສັດນັ້ນກໍຄື Nubia Z11 ໂດຍຈະຈັດຂຶ້ນທີ່ສູນປະຊຸມແຫ່ງຊາດປັກກິ່ງ ໃນວັນທີ 28 ມິຖຸນານີ້.

ສຳລັບຂໍ້ມູນຂອງງານເປີດໂຕດັ່ງກ່າວແມ່ນມາຈາກໂປສເຕີທີ່ທາງບໍລິສັດ Nubia ໄດ້ປ່ອຍອອກມາ, ໂດຍເປັນຮູບຂອງນັກເຕະບານ Christiano Ronaldo ກັບລາຍລະອຽດງານເປີດໂຕ. ຢ່າງໃດກໍຕາມນັກເຕັກບານ ຄຣິສເຕຍໂນ ໂຣນັນໂດ້ອາດຈະບໍ່ສາມາດມາຮ່ວມງານເປີດໂຕນີ້ໄດ້ ເພາະຕອນນີ້ຕິດພາລະກິດເຂົ້າຮ່ວມທີມຊາດເຂົ້າແຂ່ງບານຢູໂຣໃນຕອນນີ້.

ສຳລັບລາຍສະເປັກຂອງ Nubia Z11 ທີ່ຈະເປິດໂຕໃນວັນທີ 28 ມິຖຸນານີ້, ຄາດວ່າຈະມາພ້ອມຊິບປະມວນຜົນ Snapdragon 820 ຄວາມແຮງຢູ່ທີ່ 2.15GHz ພ້ອມກັບ RAM 4GB ແລະພື້ນທີ່ຈັດເກັບ 64GB. ນອກນີ້ກໍມີໜ້າຈໍຂະໜາດ 5.5 ນິ້ວ, ຄວາມລະອຽດ FullHD (1920 x 1080 ພິກເຊວ) ແລະຄາດວ່າຈະຕິດຕັ້ງກ້ອງຫຼັງມາ 16 ລ້ານພິກເຊວ ແລະກ້ອງໜ້າ 8 ລ້ານພິກເຊວ, ສ່ວນແບັດເຕີຣີໜ້າຈະປະມານ 2900mAh,

ແຕ່ວ່ານີ້ກໍເປັນພຽງຂໍ້ມູນທີ່ຍັງບໍ່ມີການຢືນຢັນອອກມາ ຄົງຕ້ອງໄດ້ຖ້າສະຫຼຸບໃນມື້ເປີດໂຕຢ່າງເປັນທາງການໃນວັນທີ 28 ມິຖຸນານີ້

ທີ່ມາ: gizmochina